White House Firing
అమెరికాలో గన్ కల్చర్ గురించి ప్రత్యేకంగా చెప్పక్కర్లేదు. ఎవరి దగ్గర పడితే వాళ్ళ దగ్గర తుపాకీలు ఉంటాయి.. కాల్పులు జరిపి పలువురి అమాయకుల ప్రాణాలు తీసిన ఘటనలు ఉన్నాయి. అదే సమయంలో కట్టుదిట్టమైన భద్రత, పోలీస్ యంత్రాంగం కూడా ఉంటుంది. ముఖ్యంగా వైట్ హౌస్(White House) కు ఎలాంటి అత్యుత్తమ భద్రత ఉంటుందో అందరికీ తెలుసు. అలాంటి వైట్ హౌస్ (White House Firing)పై కాల్పులకు తెగబడ్డారంటే అందరికీ ఆశ్చర్యంగా ఉంది.
దీంతో వైట్‌హౌస్ ఉగ్రదాడిపై తాలిబన్లు అనుమానాలు వ్యక్తం చేస్తున్నారు. నిందితుడు అంత కట్టుదిట్టమైన భద్రతలోనూ పాయింట్‌ రేంజ్ లో కాల్పులు జరిపాడు. అమెరికాకు వలస వచ్చిన ఆఫ్ఘనిస్తాన్ యువకుడే నేషనల్ గార్డులపై కాల్పులు జరిపినట్టు వైట్ హౌస్(White House) తెలిపింది. వైట్‌హౌస్ చెప్పినట్టు రహ్మనుల్లా ఆఫ్ఘాన్ కు చెందిన వ్యక్తి. 2021లో బైడెన్ హయాంలో ప్రత్యేక కారుణ్య పథకం కింద తన కుటుంబంతో కలిసి అమెరికా వచ్చాడు. అలాంటి వ్యక్తి జవాన్లపై ఎందుకు కాల్పులకు తెగబడ్డాడనేది తెలియడం లేదు.
అయితే దీనిపై స్పందించిన ట్రంప్ బైడెన్ హయాంలో అమెరికాకు వలస వచ్చిన ఆఫ్ఘాన్ జాతీయుల కార్యకలాపాలపై విచారణ జరపాలని అధికారులను ఆదేశించారు. అఫ్గాన్‌ పౌరుల ఇమిగ్రేషన్‌ దరఖాస్తులను వెంటనే రద్దు చేయాలని తేల్చిచెప్పారు. మరోవైపు తాలిబాన్‌ ప్రభుత్వ ప్రతినిధి సుహైల్‌ షాహీన్‌ ఈ దాడి వెనుక పాక్ గూఢచార సంస్థ డైరెక్టరేట్ ఆఫ్ ఇంటర్-సర్వీసెస్ ఇంటెలిజెన్స్ ప్రమేయం ఉందనిపిస్తోందని అనుమానించారు.
తమ దేశ గౌరవానికి భంగం కలిగించే ప్రయత్నంలో భాగమే ఈ దాడి అయ్యి ఉండొచ్చన్నారు. ఆఫ్ఘాన్లను ఇతర దేశాల భద్రతా ముప్పుగా చూపించే ప్రయత్నం చేస్తున్నారని మండిపడ్డారు. తమ దేశ పౌరులు ఎప్పుడూ ఇలాంటి దాడులకు పాల్పడరని స్పష్టం చేశారు. ఈ ఘటనపై అమెరికా అన్ని కోణాల్లో సమగ్ర దర్యాప్తు జరిపించాలని కోరారు. ప్రస్తుతం తాలిబన్లు, పాకిస్తాన్ మధ్య తీవ్ర ఉద్రిక్తతలు కొనసాగుతున్నాయి.
ఇటీవల జరిపిన శాంతి చర్చలు ఫలించలేదు. ఇలాంటి కుట్రలకు పాక్ కేరాఫ్ అడ్రస్ గా నిలుస్తుందని తాలిబన్లు బలంగా నమ్ముతున్నారు. ఎన్నోసార్లు ఇలాంటివి చేసిన ఘనత కూడా పాక్ కు ఉందంటూ గుర్తు చేస్తున్నారు. మొత్తం మీద వైట్ హౌస్ (White House)ఉగ్రదాడి వెనుక అసలు కారణంగా వెలుగులోకి వస్తే తప్ప పాక్ ను అనుమానించాల్సిందేనని తాలిబన్లు చెబుతున్నారు.
