H-1B
అమెరికా అధ్యక్షుడు డోనాల్డ్ ట్రంప్ తీసుకున్న ఒక సంచలనాత్మక నిర్ణయం ప్రపంచవ్యాప్తంగా, ముఖ్యంగా భారతదేశంలో ఉన్న లక్షలాది మంది టెక్ నిపుణులను తీవ్ర ఆందోళనకు గురిచేసింది. H-1B వీసా నిబంధనలలో ఆయన చేసిన కీలక మార్పుల వల్ల ఇకపై వీసా దరఖాస్తుకు 100,000 డాలర్ల (దాదాపు 89 లక్షల రూపాయలు) భారీ ఫీజు చెల్లించాల్సి ఉంటుంది. అంతేకాకుండా, ఇప్పటివరకు ఉన్న H-1B లాటరీ విధానానికి ముగింపు పలికి, అత్యధిక జీతం పొందే అభ్యర్థులకు, అత్యుత్తమ ప్రతిభ ఉన్నవారికి మాత్రమే వీసా ఇస్తామని ఆయన ప్రకటించారు.
ఈ నిర్ణయం అమెరికాలోని టెక్ కంపెనీలకు, భారతీయ ఐటీ నిపుణులకు, అమెరికాలో చదువుకోవాలనుకునే విద్యార్థులకు పెద్ద సవాలుగా మారింది. హెచ్ వన్ -బి వీసా హోల్డర్లలో 70% కంటే ఎక్కువ మంది భారతీయులే ఉన్నందున, ఈ ప్రభావం భారతదేశంపై చాలా ఎక్కువగా ఉంటుంది. ఇప్పుడు కొత్తగా అమెరికా వెళ్లాలనుకునే యువ గ్రాడ్యుయేట్లకు, చిన్న కంపెనీలలో పనిచేసేవారికి ఈ భారీ ఫీజు ఒక పెద్ద అడ్డంకిగా మారనుంది. అలాగే, ప్రస్తుతం అమెరికాలో ఉన్న హెచ్ వన్ -బి వీసా హోల్డర్లు కూడా తమ వీసాను పునరుద్ధరించుకోవడానికి (renewal) ఈ కొత్త ఫీజు చెల్లించాల్సి ఉంటుందని నిపుణులు హెచ్చరిస్తున్నారు. దీనివల్ల అనేక మంది టెక్ నిపుణులు తిరిగి భారతదేశానికి లేదా ఇతర దేశాలకు వెళ్లాల్సిన పరిస్థితి రావచ్చు.
ఈ నిర్ణయం వెనుక ట్రంప్ ప్రభుత్వం యొక్క ప్రధాన ఉద్దేశం, అమెరికాలో తక్కువ వేతనాలకు విదేశీ ఉద్యోగులను నియమించుకోవడం ద్వారా స్థానిక అమెరికన్లకు ఉద్యోగ అవకాశాలను దూరం చేస్తున్నారని ఆరోపించడమే. అయితే, ఈ కొత్త విధానం అమెరికన్ కంపెనీలకు కూడా తీవ్ర నష్టాన్ని కలిగించనుంది. మైక్రోసాఫ్ట్, గూగుల్, జేపీ మోర్గాన్ వంటి సంస్థలు వేలకొలది H-1B ఉద్యోగులపై ఆధారపడి ఉంటాయి. పెరిగిన ఖర్చుల వల్ల ఈ సంస్థలు తమ ఐటీ ప్రాజెక్టులను భారత్, చైనా లేదా ఇతర దేశాలకు తరలించే అవకాశం ఉంది. దీనివల్ల అమెరికాలో ఉద్యోగ సృష్టి తగ్గడమే కాకుండా, విదేశీ మేధా వలస తగ్గి, సాంకేతిక ఆవిష్కరణలలో అమెరికా వెనుకబడిపోయే ప్రమాదం ఉందని నిపుణులు ఆందోళన వ్యక్తం చేస్తున్నారు.
మరిన్ని ఇంటర్నేషనల్ వార్తల కోసం ఇక్కడ క్లిక్ చేయండి
ఈ నిర్ణయం వల్ల భవిష్యత్తులో అమెరికాలో చదువుకోవాలనుకునే విద్యార్థుల సంఖ్య కూడా గణనీయంగా తగ్గుతుంది. ఎందుకంటే, చదువు పూర్తి అయిన తర్వాత H-1B వీసా పొందే అవకాశం తక్కువగా ఉంటుంది. ఈ పాలసీపై ఇప్పటికే న్యాయపరమైన సవాళ్లు ఎదురయ్యే అవకాశం ఉంది. ఈ పరిణామం దీర్ఘకాలంలో అమెరికా మరియు భారతదేశం మధ్య టెక్నాలజీ, వ్యాపార సంబంధాలపై ఎలాంటి ప్రభావం చూపుతుందో చూడాలి.
