Kamal
నియంతృత్వాన్ని, సనాతన బానిసత్వాన్ని భగ్నం చేయగల ఆయుధం ఒకటే… అది విద్య” – కమల్ హాసన్ తాజా వ్యాఖ్యలు దేశవ్యాప్తంగా చర్చకు దారితీశాయి. తమిళనాడులో ఎడ్యుకేషన్ చారిటీ కార్యక్రమంలో పాల్గొన్న ఆయన మాటలు, మళ్లీ హిందూ సనాతన ధర్మం(Sanatana Dharma) దిశగా దూసుకెళ్లాయి.
సినిమాల్లో తిరుగులేని నటుడిగా పేరు తెచ్చుకున్న కమల్, రాజకీయాల్లోకి వచ్చిన తర్వాత మాత్రం తరచూ సనాతన ధర్మ, రాజకీయ హిందుత్వం, నీతీ నియమాల పేరుతో జరిగే వివక్షలపై ఘాటు విమర్శలు చేస్తూ వార్తల్లో నిలుస్తున్నారు. సనాతన ధర్మం అనేది సమానత్వాన్ని ఒప్పుకోదనే మాటను ఇప్పటికే ఆయన అనేక వేదికలపై పలికారు. ఇక ఈసారి “విద్య లేకపోతే బహుసంఖ్యాక మూర్ఖులు మనల్ని ఓడించగలరు” అనే మాట చెప్పడంపై వాదనలు చెలరేగుతున్నాయి.
హిందుత్వ వాదులు, సనాతన ధర్మాన్ని సంస్కృతి రూపంగా విశ్వసించేవారు కమల్ (Kamal) వ్యాఖ్యలపై ఆగ్రహం వ్యక్తం చేస్తున్నారు. “సనాతన ధర్మం అంటే సమాజాన్ని అభివృద్ధిపరిచే నైతిక విలువలు” అని చెప్పే మతపరమైన వర్గాలు, కమల్ వ్యాఖ్యలను అర్ధం తప్పుగా ప్రస్తావిస్తున్నారంటూ ఎదురుదాడికి దిగుతున్నారు.
ఇంకా ఒక కోణం ఏమిటంటే… ప్రధాని మోదీ, ఉత్తరప్రదేశ్ సీఎం యోగి ఆదిత్యానంద్, ఏపీ డెప్యూటీ సీఎం పవన్ కళ్యాణ్ వంటి నేతలు సనాతన ధర్మాన్ని భారతీయతకు మూలాధారంగా చూపిస్తూ ప్రసంగిస్తున్న సమయంలో, కమల్ మాత్రం దీన్ని నియంతృత్వం, బానిసత్వానికి ముద్రగా చూపిస్తుండడం రాజకీయ భిన్నతను నొక్కి చెబుతోంది. . దీన్ని ఒక మౌలిక సిద్ధాంత భేదంగా చూస్తే, కమల్ హాసన్ లాంటి నాయకుడు తన స్థిరమైన అభిప్రాయాలను విడిచిపెట్టకుండా నిలబడి మాట్లాడుతున్నట్టు చెప్పవచ్చు.
మొత్తానికి, కమల్ హాసన్ వ్యాఖ్యలు మరోసారి “విద్య అంటే శక్తి” అనే నమ్మకాన్ని నొక్కిపెట్టి, సనాతనంపై సమకాలీన చర్చను తిరిగి తెరిచాయి. ఇది సామాజిక న్యాయం, విద్యా సమానత్వం గురించి మాట్లాడాల్సిన సమయం అని కొందరు చెబుతుండగా… దేశ సంప్రదాయాలను దూషించడమే అసలు లక్ష్యమంటూ మరోవైపు విమర్శల వర్షం కురుస్తోంది.
ఇలాంటి వ్యాఖ్యలు కమల్ హాసన్‌కు కొత్తవి కావు. గతంలోనూ రాముడు పశుపాలుడు అన్న వ్యాఖ్యలు, హిందూ అగ్నికుల వ్యతిరేకంగా మాట్లాడిన సందర్భాలు, హిందుత్వాన్ని ఓ రాజకీయ ఆయుధంగా వాడుతున్నారని చేసిన విమర్శలు… ఇవన్నీ ఆయన్ని తరచూ వార్తల్లో నిలిపాయి.
