Bahubali Rocket
భారత అంతరిక్ష పరిశోధన సంస్థ (ISRO) తన 100వ ప్రయోగానికి (LVM-3 M6) సర్వం సిద్ధం చేస్తోంది. డిసెంబర్ 24వ తేదీన శ్రీహరికోటలోని సతీష్ ధావన్ అంతరిక్ష కేంద్రం నుంచి జరగబోయే ఈ (Bahubali Rocket)ప్రయోగం కేవలం ఒక ఉపగ్రహ లాంచ్ మాత్రమే కాదు.. ఇది భారత దేశ సత్తాను ప్రపంచానికి చాటిచెప్పే వేడుక.
ఈ చారిత్రక ఘట్టానికి ఇంకా 3 రోజులు మాత్రమే సమయం ఉండటంతో, శ్రీహరికోటలో శాస్త్రవేత్తల హడావిడి మామూలుగా లేదు. అసలు ప్రయోగ కేంద్రం లోపల ఎలాంటి ఏర్పాట్లు జరుగుతున్నాయి? బాహుబలి రాకెట్(Bahubali Rocket)ను ఎలా సిద్ధం చేస్తున్నారు? అనే విషయాలు ప్రతి భారతీయుడు తెలుసుకోవాల్సిన అవసరం ఉంది.
ప్రస్తుతం శ్రీహరికోటలోని రెండో ప్రయోగ వేదిక (Launch Pad) వద్ద ఉన్న ఎల్వీఎమ్-3 రాకెట్ సుమారు 43.5 మీటర్ల ఎత్తుతో, 640 టన్నుల బరువుతో ఉంటుంది. అందుకే దీన్ని బాహుబలి రాకెట్ అని పిలుస్తారు. ప్రస్తుతం రాకెట్ లోపల వివిధ భాగాలను అనుసంధానం చేసే ప్రక్రియ (Integration) పూర్తయింది.
ఇప్పుడు శాస్త్రవేత్తలు అత్యంత కీలకమైన ‘స్టాటిక్ టెస్టులు’ నిర్వహిస్తున్నారు. అంటే రాకెట్ లోపల ఉండే ఎలక్ట్రానిక్ వ్యవస్థలు, కంప్యూటర్లు , సెన్సార్లు సరిగ్గా పనిచేస్తున్నాయా లేదా అని తనిఖీ చేస్తున్నారు. రాకెట్ నింగిలోకి దూసుకెళ్లే సమయంలో ప్రతి మిల్లీ సెకను కూడా చాలా ముఖ్యం, అందుకే ఎలాంటి పొరపాట్లు జరగకుండా తుది తనిఖీలు చేస్తున్నారు.
ఈ ప్రయోగంలో అసలైన విశేషం ఏమిటంటే.. అమెరికాకు చెందిన ‘బ్లూబర్డ్-6’ ఉపగ్రహాన్ని ఈ రాకెట్ మోసుకెళ్లనుంది. సుమారు 6.5 టన్నుల బరువున్న ఈ భారీ ఉపగ్రహాన్ని రాకెట్ పైభాగంలో (Heat Shield) అమర్చడం ఇప్పటికే పూర్తయింది. ఈ ఉపగ్రహం చాలా పెద్దది కాబట్టి, దానిని రాకెట్ లోపల ఫిక్స్ చేసే సమయంలో శాస్త్రవేత్తలు అత్యంత జాగ్రత్తలు తీసుకున్నారు.
ఇప్పుడు రాకెట్(Bahubali Rocket) మొత్తం ఒక భారీ వాహనం మీద అసెంబ్లీ బిల్డింగ్ నుంచి ప్రయోగ వేదిక వైపు ప్రయాణిస్తోంది. ఈ ప్రయాణం చాలా నిదానంగా జరుగుతుంది. రాకెట్ వేదిక మీదకు చేరుకున్న తర్వాత, దానికి ఇంధనం నింపే ప్రక్రియ మొదలవుతుంది.
ఇంధనం నింపడం అనేది ఈ ప్రయోగంలో అత్యంత ప్రమాదకరమైన, కీలకమైన దశ. ఎల్వీఎమ్-3 రాకెట్లో ఘన (Solid), ద్రవ (Liquid) , క్రయోజెనిక్ (Cryogenic) అనే మూడు రకాల ఇంధన దశలు ఉంటాయి. డిసెంబర్ 23వ తేదీ సాయంత్రం నుంచి ఈ ఇంధనాన్ని నింపే ప్రక్రియ ప్రారంభమవుతుంది.
ముఖ్యంగా క్రయోజెనిక్ దశలో మైనస్ డిగ్రీల ఉష్ణోగ్రత వద్ద ఉండే ద్రవ ఆక్సిజన్ , ద్రవ హైడ్రోజన్ను నింపాల్సి ఉంటుంది. ఈ సమయంలో చిన్న పొరపాటు జరిగినా మొత్తం ప్రయోగానికి విఘాతం కలుగుతుంది. అందుకే ఇస్రో శాస్త్రవేత్తలు షిఫ్టుల వారీగా నిద్రలేకుండా పనిచేస్తున్నారు.
మరోవైపు శ్రీహరికోట చుట్టుపక్కల భద్రతను కూడా కట్టుదిట్టం చేశారు. సముద్ర తీరంలో తీర రక్షక దళం పహారా కాస్తుండగా, అంతరిక్ష కేంద్రం లోపల సీఐఎస్ఎఫ్ బలగాలు నిరంతరం నిఘా ఉంచుతున్నాయి. ప్రయోగ సమయం సమీపిస్తున్న కొద్దీ శాస్త్రవేత్తల్లో ఉత్కంఠ పెరుగుతోంది.
ఈ 100వ ప్రయోగం గనక విజయవంతం అయితే, ఇస్రో వాణిజ్య పరంగా ప్రపంచంలోనే అగ్రస్థానానికి చేరుకుంటుంది. అందుకే ఈ కౌంట్డౌన్ కేవలం సమయాన్ని లెక్కించడం మాత్రమే కాదు, ఇది భారత్ సాధించబోయే మరో మహా విజయానికి నాంది. డిసెంబర్ 24 ఉదయం 8.50 గంటలకు ఈ బాహుబలి నింగిలోకి దూసుకెళ్లడం కోసం కోట్లాది మంది భారతీయులు ప్రార్థనలు చేస్తున్నారు.
మరిన్ని తాజా వార్తల కోసం ఇక్కడ క్లిక్ చేయండి
-
-
-
-
