Shirdi Sai: షిర్డీసాయి ఆలయ ప్రత్యేకతలు..బాబాకు అంత ఆదాయం ఎలా వస్తుంది?

Shirdi Sai

షిర్డీ సాయిబాబా (Shirdi Sai)కేవలం ఒక దైవంగానే కాక, ‘సబ్ కా మాలిక్ ఏక్’ (అందరి దేవుడూ ఒక్కడే) అనే సందేశాన్నిచ్చిన ఒక గొప్ప ఆధ్యాత్మిక గురువుగా ప్రపంచవ్యాప్తంగా పూజలందుకుంటున్నారు. మహారాష్ట్రలోని అహ్మద్‌నగర్ జిల్లాలో ఉన్న షిర్డీ క్షేత్రం, భారత దేశంలో అత్యధిక భక్తులను ఆకర్షించే పుణ్యక్షేత్రాలలో ఒకటిగా నిలిచింది.

సాయిబాబాకు(Shirdi Sai) దేశవ్యాప్తంగా అపారమైన కీర్తి, భక్తుల విశ్వాసం పెరగడానికి అనేక కారణాలు ఉన్నాయి. సాయిబాబా హిందూ-ముస్లిం అనే భేదం లేకుండా అందరినీ సమానంగా చూశారు. ఆయన మసీదులో నివసించినా, ఉపనిషత్తుల సారాంశాన్ని బోధించినా, ఆయన సందేశం సర్వమతాల ఏకత్వంపైనే ఆధారపడింది. ఇది అన్ని మతాల ప్రజలను ఆయనకు దగ్గర చేసింది.

సాయిబాబా ఎటువంటి ఆడంబరం, ధనం లేకుండా అత్యంత సాధారణ జీవితాన్ని గడిపారు. ఆయన నిరాడంబరత , నిస్వార్థ సేవ ఆయనను ‘ఫకీర్’గా , గొప్ప గురువుగా భక్తుల హృదయాల్లో నిలిపాయి.

‘శ్రద్ధ, సబూరి’ సందేశంతో బాబా అందరికీ దగ్గరయ్యారు. ‘శ్రద్ధ’ (విశ్వాసం/నమ్మకం), ‘సబూరి’ (ఓర్పు/సహనం) అనే రెండు పదాలు సాయి సిద్ధాంతానికి మూలస్తంభాలు. కష్టాల్లో ఉన్నప్పుడు దేవుడిపై విశ్వాసం ఉంచి, ఓపికగా ఉండాలని ఆయన బోధించారు. ఈ సులభ సందేశం కోట్లాది మంది సామాన్య ప్రజలకు ఆత్మస్థైర్యాన్ని ఇచ్చింది.

సాయిబాబా జీవించి ఉన్నప్పుడు అనేక అద్భుతాలు చేశారని భక్తులు నమ్ముతారు. నీటితో దీపం వెలిగించడం, రోగాలను నయం చేయడం, భక్తుల మనసులోని మాటలను తెలుసుకోవడం వంటివి ఆయన మహిమలలో ముఖ్యమైనవి. ఈ అద్భుతాల ద్వారా కలిగిన నమ్మకం తరతరాలుగా కొనసాగుతోంది.

అంతేకాదు సాయిబాబా ధుని (నిరంతరంగా మండే అగ్ని) నుంచి వచ్చే బూడిద (ఉదీ) ఆయన అనుగ్రహంగా భావించబడుతుంది. ఈ ఉదీ అనేక రోగాలను నయం చేస్తుందని, కష్టాలను తొలగిస్తుందని భక్తుల నమ్మకం.

షిర్డీలోని సాయిబాబా (Shirdi Sai)ఆలయం (సమాధి మందిర్) కేవలం పూజా స్థలం కాదు, శక్తివంతమైన ఆధ్యాత్మిక కేంద్రం. సాయిబాబా అంతిమ విశ్రాంతి తీసుకున్న ఈ ఆలయంలోనే ఆయన పవిత్ర సమాధి ఉంది. భక్తులు ఇక్కడ ఆయన దర్శనం చేసుకుని ప్రార్థనలు చేస్తారు. ఆలయ ఆవరణలో సాయిబాబా ఉపయోగించిన వస్తువులు భద్రపరిచారు.

సాయిబాబా తన జీవితంలో ఎక్కువ భాగం గడిపిన ప్రదేశం ద్వారకామాయి. ఇది అప్పటి పాత మసీదు. ఇక్కడే సాయిబాబా తన భక్తులను కలిసేవారు, ధుని మంటను వెలిగించారు. ఈ ధుని ఇప్పటికీ నిరంతరం మండుతూ ఉంటుంది. ఈ ధుని నుండి వచ్చేదే ‘ఉదీ’.

సాయిబాబా కొన్ని రోజులు విశ్రాంతి కోసం ఉపయోగించిన ప్రదేశం..చావడి (Chavadi). ద్వారకామాయి నుండి బాబాను చావడికి ఊరేగింపుగా తీసుకువచ్చే ఆచారం (పల్లకీ సేవ) ఇప్పటికీ గురువారాల్లో మరియు పండుగల్లో కొనసాగుతుంది.

సూర్యోదయం ముందు చేసే కాకడ్ హారతితో రోజు మొదలవుతుంది. ఆ తరువాత మధ్యాహ్నం, సాయంత్రం మరియు రాత్రి (శేజారతి) ఆరతులు ఉంటాయి. ఈ హారతులు సాయిబాబా జీవితకాలంలో జరిగిన దినచర్యను ప్రతిబింబిస్తాయి.

మరోవైపు షిర్డీ సాయిబాబా (Shirdi Sai)ఆలయం ప్రపంచంలోనే అత్యంత సంపన్న దేవాలయాలలో ఒకటి. ఈ ఆలయాన్ని శ్రీ సాయిబాబా సంస్థాన్ ట్రస్ట్ (SSST) నిర్వహిస్తుంది. ఈ ట్రస్ట్ ఆలయ నిర్వహణ, భక్తుల వసతి, అన్నదానం, అనేక సామాజిక సేవా కార్యక్రమాలను పర్యవేక్షిస్తుంది. ఆలయానికి ప్రధానంగా భక్తులు సమర్పించే హుండీ కానుకలు (Donations), ఆన్‌లైన్ విరాళాలు, పూజల టిక్కెట్లు, బంగారం, వెండి వంటి విలువైన సమర్పణల ద్వారా భారీ ఆదాయం లభిస్తుంది.

ఈ ఆదాయాన్ని ట్రస్ట్ విద్యాలయాలు, ఆసుపత్రులు, అనాథ శరణాలయాలు నడపడానికి, నిరుపేదలకు ఉచిత అన్నదానం (ప్రతిరోజూ వేలాది మందికి) అందించడానికి వినియోగిస్తుంది. సాయిబాబా బోధించిన మానవ సేవకు అనుగుణంగా ట్రస్ట్ నిధులు సద్వినియోగం అవుతాయి.

షిర్డీకి ఇప్పుడు సాయి నగర్ అంతర్జాతీయ విమానాశ్రయం (Shirdi International Airport) ఉంది. ఇది దేశంలోని ప్రధాన నగరాల నుంచి నేరుగా అనుసంధానించబడింది. సమీపంలోని పెద్ద విమానాశ్రయాలు నాసిక్ అండ్ ఔరంగాబాద్.
అలాగే సాయి నగర్ షిర్డీ రైల్వే స్టేషన్ (SNSI) ఆలయానికి అతి దగ్గరలో ఉంది. ఇది దేశంలోని అనేక ప్రధాన నగరాల నుంచి డైరెక్ట్ రైలు సేవలను కలిగి ఉంది.
షిర్డీ పూణే (సుమారు 185 కి.మీ), ముంబై (సుమారు 240 కి.మీ), మరియు నాసిక్ (సుమారు 90 కి.మీ) నుంచి మంచి రోడ్డు మార్గాలను కూడా కలిగి ఉంది. మహారాష్ట్ర రోడ్డు రవాణా సంస్థ (MSRTC) బస్సులు , ప్రైవేట్ ట్యాక్సీలు నిరంతరం అందుబాటులో ఉంటాయి.

మరిన్ని ఆధ్యాత్మిక వార్తల కోసం ఇక్కడ క్లిక్ చేయండి.