Shreyas Iyer
ఇండియా, వెస్టిండీస్ మధ్య హోరాహోరీగా సాగిన ఐదు మ్యాచ్‌ల టీ20 సిరీస్ ఎవరూ ఊహించని విధంగా ముగిసింది. బెంగళూరులో చిన్నస్వామి స్టేడియం వేదికగా జరిగిన డిసైడర్ మ్యాచ్.. వర్షం వల్ల రద్దు కావడంతో ట్రోఫీని పంచుకోవాల్సి వచ్చింది.
వర్షం కారణంగా 9 ఓవర్లకు కుదించిన ఈ మ్యాచ్‌లో భారత్ 7.4 ఓవర్లలో 5 వికెట్లకు 118 రన్స్ చేయగానే వరుణుడు అడ్డుపడ్డాడు. అయితే ఈ మ్యాచ్ రద్దు కావడం ఒక ఎత్తయితే.. మ్యాచ్ ముగిసిన తర్వాత టీమిండియా కెప్టెన్ శ్రేయాస్ అయ్యర్(Shreyas Iyer) చేసిన కామెంట్స్ ఇప్పుడు సోషల్ మీడియాలో వైరల్ అవుతున్నాయి.
ఈ సిరీస్ ఫలితంపై ఓపెన్‌గా స్పందించిన శ్రేయాస్ అయ్యర్(Shreyas Iyer).. భారత్ బౌలర్ల వైఫల్యాన్ని కుండబద్దలు కొట్టినట్లు చెప్పాడు. రెండో, నాలుగో మ్యాచ్‌లలో మన బౌలర్లు మరికొంత మెరుగ్గా బౌలింగ్ చేసి ఉంటే, ఈపాటి సిరీస్ రిజల్ట్ పూర్తిగా వేరేలా ఉండేదంటూ కామెంట్ చేశాడు.
అదే సమయంలో ప్రత్యర్థి జట్టును ప్రశంసిస్తూ.. వెస్టిండీస్ బ్యాటర్లకు మాత్రం క్రెడిట్ ఇవ్వాల్సిందేనని.. ముఖ్యంగా షాయ్ హోప్ ఈ సిరీస్ అంతా కూడా అద్భుతంగా ఆడాడని చెప్పుకొచ్చాడు. అయితే ఓటమి అంచు నుంచి కూడా మన జట్టు పుంజుకున్న తీరు మన వారి దూకుడు మనస్తత్వానికి నిదర్శనమని అయ్యర్ కితాబిచ్చాడు.
ఇదే ప్రెస్‌మీట్‌లో యువ ఆటగాడు వైభవ్ సూర్యవంశీ గురించి మాట్లాడిన శ్రేయాస్..అవకాశాల కోసం తను ఓపికగా ఎదురు చూడాలని అన్నాడు. తన ప్రాసెస్‌ను బలంగా నమ్ముకుని నిలకడగా రాణించడంపైనే ఫోకస్ పెట్టాలని సలహా ఇస్తూనే, భారత జట్టులో ఇప్పటికే ఇద్దరు అద్భుతమైన ఓపెనర్లు ఉన్నారన్న విషయాన్ని మరోసారి గుర్తుచేశాడు.
మరోవైపు ఈ సిరీస్‌లో 2 సెంచరీలతో దుమ్మురేపిన విండీస్ స్టార్ షాయ్ హోప్ ..ప్లేయర్ ఆఫ్ ద సీరీస్‌ను దక్కించుకోగా.. సుమారు 20 ఏళ్ల తర్వాత భారత్‌లో సిరీస్ గెలిచే సువర్ణావకాశాన్ని తాము త్రుటిలో చేజార్చుకున్నామని ఆవేదన వ్యక్తం చేశాడు. అయితే ఈ సిరీస్ హంగామా ఇలా ముగిసిందో లేదో, రోహిత్ సేన గురువారం నుంచి ప్రారంభం కాబోతున్న న్యూజిలాండ్ టీ20 సమరానికి రెడీ అవుతోంది.
With AI Chatting : ఏఐ చాటింగ్‌తో మైండ్ రిలాక్స్ అవుతుందా?..మీ మెంటల్ హెల్త్ రిస్క్‌లో పడినట్లే..
-
-
-
-
