YS Jagan: కోర్టుకు హాజరైన వైఎస్ జగన్ ..జగన్‌కు మాత్రమే మినహాయింపులు ఎందుకు?

YS Jagan

మాజీ ముఖ్యమంత్రి వై.ఎస్. జగన్ మోహన్ రెడ్డి(YS Jagan ఎట్టకేలకు అక్రమాస్తుల కేసు విచారణలో సీబీఐ ప్రత్యేక కోర్టుకు హాజరయ్యారు. కేవలం 5 నిమిషాలు ఉండి తిరిగి వెళ్లిపోయారు. దీంతో జగన్ మోహన్ రెడ్డి (YS Jagan)ప్రతి శుక్రవారం హైదరాబాద్‌లోని సీబీఐ ప్రత్యేక కోర్టుకు హాజరు కావాల్సిన కేసులకు సంబంధించి, ఆయనకు లభించిన మినహాయింపులు (Exemptions), దాని వెనుక ఉన్న న్యాయపరమైన కారణాలపై చర్చ మరోసారి తెరమీదకు వచ్చింది.

ముఖ్యమంత్రిగా ఉన్నప్పుడు పొందిన వ్యక్తిగత హాజరు మినహాయింపును ఇప్పుడు కూడా కొనసాగించాలని ఆయన కోరినా, న్యాయమూర్తి రఘురామ్ ఆ అభ్యర్థనను తిరస్కరించడంతో ప్రస్తుతం సాధారణ పౌరుడిగా ఉన్న జగన్, కోర్టు ఆదేశాల మేరకు ఈరోజు విచారణకు హాజరయ్యారు. ఈ కేసులో సీబీఐ దాఖలు చేసిన 11 ఛార్జ్‌షీట్లతో పాటు, నిందితులు దాఖలు చేసిన 130 డిశ్చార్జ్ పిటిషన్లు ఇంకా కోర్టులో పెండింగ్‌లో ఉన్నాయి.

అసలు కేసు ఏమిటి? (క్విడ్ ప్రో కో ఆరోపణలు)..వై.ఎస్. జగన్ మోహన్ రెడ్డి ఎదుర్కొంటున్న ప్రధాన కేసులను అక్రమాస్తుల కేసుగా పరిగణిస్తారు. వీటిని సెంట్రల్ బ్యూరో ఆఫ్ ఇన్వెస్టిగేషన్ (సీబీఐ), ఎన్‌ఫోర్స్‌మెంట్ డైరెక్టరేట్ (ఈడీ) విచారిస్తున్నాయి.

జగన్ తండ్రి వై.ఎస్. రాజశేఖర రెడ్డి ఉమ్మడి ఆంధ్రప్రదేశ్ ముఖ్యమంత్రిగా ఉన్నప్పుడు, అనేక కంపెనీలు ‘క్విడ్ ప్రో కో’ (Quid Pro Quo – ఒకదానికి బదులు మరొకటి) పద్ధతిలో పెట్టుబడులు పెట్టాయనేది ప్రధాన ఆరోపణ.

వై.ఎస్.ఆర్. ప్రభుత్వం ఆయా కంపెనీలకు అనుకూల నిర్ణయాలు (భూములు, ప్రాజెక్టులు, అనుమతులు) ఇవ్వగా, ఆ కంపెనీలు ప్రతిఫలంగా జగన్ కంపెనీల్లో (ముఖ్యంగా జగన్ స్థాపించిన జగతి పబ్లికేషన్స్, భారతి సిమెంట్స్ మొదలైన వాటిలో) అధిక ప్రీమియం చెల్లించి భారీ మొత్తంలో పెట్టుబడులు (లంచాలు) పెట్టాయనేది సీబీఐ అభియోగం.

ఈ కేసుల్లో సీబీఐ దాదాపు 11కి పైగా చార్జిషీట్లను దాఖలు చేసింది. కేవలం జగన్‌తో పాటు పలువురు సీనియర్ ఐఏఎస్‌ అధికారులు, మంత్రులు, కంపెనీల యజమానులు కూడా నిందితులుగా ఉన్నారు.

అయితే జగన్ మోహన్ రెడ్డికి కోర్టు హాజరు విషయంలో ప్రత్యేక మినహాయింపులు లభించడానికి ముఖ్యంగా రెండు అంశాలు దోహదపడ్డాయి. ఆయన హోదా , న్యాయ ప్రక్రియ ఎలా అంటే..ఎవరైనా ముఖ్యమంత్రిగా (CM) ఉన్నప్పుడు, ఆయన రాష్ట్ర పరిపాలనలో నిమగ్నమై ఉండటం, ప్రభుత్వ కార్యకలాపాలకు ఆటంకం కలగకుండా ఉండేందుకు న్యాయస్థానాలు హాజరు నుంచి మినహాయింపులు మంజూరు చేస్తాయి.

ప్రజా సేవలో ఉన్నత స్థానంలో ఉన్న వ్యక్తి ప్రతివారం కోర్టుకు హాజరు కావడానికి ప్రయాణించడం వల్ల ప్రజా ధనం, సమయం వృథా అవుతాయి, అలాగే భద్రతా సమస్యలు కూడా తలెత్తుతాయి. ఈ కారణాలను పరిగణనలోకి తీసుకుని, CRPC సెక్షన్ 205 మరియు 317 కింద కోర్టులు మినహాయింపులు ఇస్తాయి.

ఆయన ఇప్పుడు మాజీ ముఖ్యమంత్రి అయినా కూడా, కోర్టులు కేసు విచారణలో భాగంగా, అత్యవసరం కాని తేదీల్లో హాజరు నుంచి మినహాయింపులు కొనసాగించవచ్చు లేదా ఆయన తరపు న్యాయవాదులు ప్రత్యేక దరఖాస్తులు సమర్పించవచ్చు.

జగన్‌(YS Jagan)ని 2012లో సీబీఐ అరెస్ట్ చేసింది. ఆయన 16 నెలల పాటు జైలులో ఉన్నారు. బెయిల్ (Bail) మంజూరు చేసే సమయంలో, కోర్టులు నిందితుడు విచారణకు సహకరించాలి, సాక్షులను ప్రభావితం చేయకూడదు అనే షరతులు పెడతాయి.

తాజాగా కోర్టుకు హాజరైన జగన్(YS Jagan)..కేవలం ఐదు నిమిషాలు కోర్టులో ఉండటానికి కారణం – ఈ రోజు విచారణలో భాగంగా, చార్జిషీట్ కాపీని అందుకుని, తన హాజరును నమోదు చేయడానికి మాత్రమే నిందితుడు అవసరం. సాక్షుల విచారణ, వాదోపవాదాలు జరిగేటప్పుడు నిందితుడు హాజరు అవ్వాల్సిన అవసరం లేదు.

సాధారణ పౌరులు కూడా హాజరు నుంచి మినహాయింపు కోసం దరఖాస్తు చేసుకోవచ్చు. కానీ, జగన్‌కి ఉన్నంత ఉన్నత స్థాయి హోదా భద్రతా కారణాలు ఇతరులకు ఉండవు కాబట్టి, ఇతరుల మినహాయింపులు అంత సులభంగా మంజూరు కాకపోవచ్చు.

ఈ కేసుల్లో జగన్‌(YS Jagan)కి ఇప్పటివరకు శిక్ష పడకపోవడానికి ప్రధాన కారణాలు – కేసుల క్లిష్టత, న్యాయ ప్రక్రియలో జాప్యం,చట్టపరమైన చిక్కులు. సీబీఐ దాఖలు చేసిన చార్జిషీట్లు, ఈడీ దాఖలు చేసిన మనీలాండరింగ్ కేసులు పదుల సంఖ్యలో ఉన్నాయి. వీటిలో వేర్వేరు కంపెనీలు, వేర్వేరు నిందితులు, వేర్వేరు చట్టపరమైన అంశాలు ఇమిడి ఉన్నాయి.

‘క్విడ్ ప్రో కో’ వంటి ఆరోపణలను చట్టపరంగా నిరూపించడం అత్యంత కష్టం. నిధులు కంపెనీల మధ్య బదిలీ అయ్యాయని నిరూపించినా, అది లంచం కోసమే జరిగింది అని నిరూపించడానికి సీబీఐకి బలమైన, నిస్సందేహమైన సాక్ష్యాలు (Irrefutable Evidence) అవసరం.

న్యాయనిపుణుల అభిప్రాయం ప్రకారం, దేశంలో ఆర్థిక అక్రమాల కేసుల విచారణ చాలా నెమ్మదిగా జరుగుతుంది. నిందితులు ఉన్నత స్థానాల్లో ఉండటం, విచారణను వేగవంతం చేయాలని కోరుతూ అప్పీళ్లు వేయడం, న్యాయ వ్యవస్థలో కేసుల భారం వల్ల విచారణ సంవత్సరాల తరబడి కొనసాగుతుంది.

న్యాయ నిపుణులు ఈ కేసులపై మాట్లాడుతూ, ఈ కేసులు కేవలం మనీలాండరింగ్ లేదా ఆర్థిక అక్రమాల కేసులుగా కాకుండా, పాలకుల నిర్ణయాలు ,రాజకీయ కోణాలు ఇమిడి ఉన్నందున, న్యాయ ప్రక్రియ సంక్లిష్టంగా మారుతుందని పేర్కొన్నారు.

మరిన్ని ఏపీ వార్తల కోసం ఇక్కడ క్లిక్ చేయండి