Bigg Boss
బిగ్‌బాస్ అభిమానుల ఎదురుచూపులకు తెరపడింది. ఎన్నో అంచనాల మధ్య బిగ్‌బాస్ తెలుగు సీజన్ 9 అట్టహాసంగా ప్రారంభమైంది. ఈసారి, ఎప్పటిలాగే కేవలం సెలబ్రిటీలు మాత్రమే కాకుండా, సత్తా చూపించే సామాన్యులకు కూడా అవకాశం ఇచ్చి బిగ్‌బాస్ హౌస్ గేమ్‌ను మరింత ఆసక్తికరంగా మార్చారు. హోస్ట్ నాగార్జున ముందు నుంచే చెప్పినట్లు, ఈసారి ఊహకందని మార్పులు, ఊహించని మలుపులు ప్రేక్షకులకు కొత్త అనుభూతిని ఇవ్వనున్నాయి. మొత్తం 15 మంది కంటెస్టెంట్స్‌తో ఈ సీజన్ జర్నీ స్టార్టయింది.
ఈసారి కంటెస్టెంట్స్ జాబితా చాలా భిన్నంగా ఉంది. మొదటి కంటెస్టెంట్‌గా ముద్ద మందారం సీరియల్‌తో తెలుగు ప్రేక్షకులకు దగ్గరైన నటి తనూజ పుట్టస్వామి ఎంట్రీ ఇచ్చారు. ఆ తర్వాత, ఒకప్పటి టాలీవుడ్ హీరోయిన్ ఆశా షైనీ హౌస్‌లోకి అడుగుపెట్టి, తన సెకండ్ ఇన్నింగ్స్‌కు బిగ్‌బాస్‌ను వేదికగా చేసుకున్నారు.
ఈ సీజన్‌కు మరో హైలైట్ – కామనర్స్ (సామాన్యులు). ఆర్మీలో పనిచేస్తున్న పవన్ కళ్యాణ్ పడాల, ‘సోల్జర్ కళ్యాణ్’గా పిలువబడే ఈయన మొదటి కామనర్‌గా ఎంపికయ్యారు. అలాగే, మాస్క్ మ్యాన్‌గా ఫేమస్ అయిన హరిత హరీష్, అడియన్స్ ఓటింగ్ ద్వారా ఎంపికైన ప్రియశెట్టి, మరియు ఇతర కామనర్స్ డిమాన్ పవన్, శ్రీజ దమ్ము, మర్యాద మనీష్ హౌస్‌లోకి అడుగుపెట్టారు.
జబర్దస్త్ నుంచి వచ్చిన ఇమ్మాన్యుయేల్, రీతూ చౌదరి తమ కామెడీ టైమింగ్‌తో ప్రేక్షకులను అలరించడానికి సిద్ధమయ్యారు. తెలుగులో నటించి, ఆ తర్వాత ఇతర భాషలలో కూడా గుర్తింపు పొందిన కమెడియన్ సుమన్ శెట్టి ఈసారి బిగ్‌బాస్ హౌస్‌లో తన అదృష్టాన్ని పరీక్షించుకోనున్నారు.
బుజ్జిగాడు సినిమాలో కనిపించిన సంజన గల్రానీ తనపై పడిన నిందను తొలగించుకోవడానికి హౌస్‌లోకి రావడం ప్రేక్షకుల దృష్టిని ఆకర్షించింది. ఫోక్ సింగర్ రాము రాథోడ్ తన పాటలతో హౌస్‌లో ఎంటర్టైన్మెంట్ ఇవ్వనున్నారు. సీరియల్ నటుడు భరణి కూడా కంటెస్టెంట్‌గా వచ్చారు.
ఈసారి, సెలబ్రిటీలు, సామాన్యులు ఒకే హౌస్‌లో కలిసి ఉండటం వల్ల గేమ్ స్ట్రాటజీ, ఎమోషన్స్, మరియు పర్సనల్ డ్రామాలు మునుపటి సీజన్‌ల కంటే ఎక్కువగా ఉండబోతున్నాయి. బిగ్‌బాస్(Bigg Boss) సీజన్ 9 తెలుగు ప్రేక్షకులకు పూర్తిస్థాయిలో వినోదాన్ని అందిస్తుందని ఆశించవచ్చు.
