Tariffs
అమెరికా విధించిన 50% సుంకాలతో భారత ఎగుమతి రంగానికి ఒక కొత్త సవాలు ఎదురైంది. జూన్ 19 నుంచి అమల్లోకి వచ్చిన ఈ నిర్ణయం రొయ్యలు, వజ్రాలు, జౌళి, తోళ్లు, రత్నాభరణాలు వంటి కార్మిక ఆధారిత రంగాలపై తీవ్ర ప్రభావం చూపిస్తుందని నిపుణులు ఆందోళన వ్యక్తం చేస్తున్నారు. ఇప్పటికే మనపై 25% సుంకాలు ఉండగా, అదనంగా 25% జరిమానాను అమెరికా విధించడం మన ఎగుమతులకు ఒక పెద్ద అడ్డంకిగా మారింది. 2024-25లో భారత ఎగుమతుల్లో 20% వాటా అమెరికాదే కావడం దీని తీవ్రతను మరింత పెంచుతోంది.
జౌళి రంగంపై ఈ సుంకాల (tariffs)ప్రభావం ఎక్కువగా ఉంది. భారతదేశం, బంగ్లాదేశ్, వియత్నాం వంటి పోటీ దేశాలతో పోలిస్తే, మనకు 30-31% టారిఫ్ వ్యత్యాసం ఏర్పడిందని, ఇది మన పరిశ్రమను దెబ్బతీసే అవకాశం ఉంది. అదేవిధంగా, వజ్రాల ఎగుమతి రంగంపై కూడా ఈ ప్రభావం ఉంది. మన కట్, పాలిష్డ్ వజ్రాల్లో సగానికి పైగా అమెరికా మార్కెట్‌కే వెళ్తాయి. ఇప్పుడు ఈ టారిఫ్‌ల వల్ల తుర్కియే, వియత్నాం వంటి పోటీ దేశాలు లబ్ధి పొందుతాయి
రొయ్యల ఎగుమతిదార్లకు కూడా ఇది ఒక ప్రతికూల పరిస్థితి. ఇప్పటికే ఉన్న 2.49% దిగుమతి నిరోధక సుంకం, 5.77% కౌంటర్‌వెయిలింగ్ సుంకంతో పాటు, కొత్తగా 50% సుంకాలు పడటంతో అమెరికా మార్కెట్‌లో భారత రొయ్యల ధరలు భారీగా పెరగనున్నాయి. తోళ్ల ఎగుమతిదారులు కూడా ఇబ్బందులు పడుతున్నారు. ఆర్డర్లను కొనసాగించాలంటే అమెరికా కంపెనీలు 20% రాయితీ డిమాండ్ చేస్తున్నాయి..
ఈ ప్రతికూల పరిస్థితులను ఎదుర్కోవడానికి భారత ప్రభుత్వం సన్నాహాలు చేస్తోంది. 2025-31 మధ్య ఆరు ఆర్థిక సంవత్సరాల్లో ఎగుమతిదారుల కోసం రెండు ఉప పథకాల ద్వారా సుమారు రూ. 25,000 కోట్ల సహాయం అందించాలని ప్రణాళికలు సిద్ధం చేసింది. అయితే, ఈ సుంకాల ప్రభావం స్టాక్ మార్కెట్‌పై వెంటనే కనిపించింది. జౌళి, రొయ్యలు, తోళ్లు, రత్నాభరణాల కంపెనీల షేర్లు భారీగా నష్టపోయాయి.
అమెరికా విధించిన టారిఫ్‌లు(Tariffs) భారతదేశానికి ఒక మేలుకొలుపు లాంటివని, ఏ ఒక్క దేశంపై అధికంగా ఆధారపడకూడదని విశ్లేషకులు సూచించారు. అమెరికాతో వాణిజ్యం కొనసాగిస్తూనే, ఐరోపా, ఆఫ్రికా వంటి దేశాలపైనా దృష్టి సారించాలని చెబుతున్నారు. ఈ రోజుల్లో వాణిజ్యం, పెట్టుబడులు సైనిక శక్తిని ఉపయోగించలేని సందర్భాల్లో ఆయుధాలుగా మారాయని విశ్లేషించారు. ట్రంప్ ఈ సుంకాలను ఇతర దేశాలపై విధించే పన్నులుగా చూస్తున్నారని, అయితే దీనివల్ల అమెరికా ప్రజలకే నష్టం జరుగుతుందని అభిప్రాయపడ్డారు.
