Glowworm Caves: న్యూజిలాండ్‌లో నేచర్ మ్యాజిక్: గ్లోవార్మ్ గుహల రహస్యం

Glowworm Caves

మీరు ఒక చీకటి గుహలోకి అడుగుపెట్టి, తల ఎత్తి చూస్తే ఆకాశంలో ఉండే నక్షత్రాలన్నీ మీ కళ్ల ముందు మెరుస్తున్నట్లు అనిపిస్తే ఎలా ఉంటుంది? ఏదో కథల్లో చదివిన అద్భుతంలా అనిపించే ఈ దృశ్యం న్యూజిలాండ్‌లోని వేయిటోమో గ్లోవార్మ్ గుహలు (Glowworm Caves)లో నిజంగా జరుగుతుంది. కోట్లాది సంవత్సరాల నాటి సున్నపురాయి గుహల్లో, చీకట్లో వెలిగే వేలకొలది పురుగులు ఒక అద్భుతమైన కాంతి ప్రదర్శనను సృష్టిస్తాయి. ఇది కేవలం ఒక ప్రకృతి అద్భుతం కాదు, చీకటిలో వెలిగే చిన్న జీవి సృష్టించిన ఒక తారల సముద్రం. ఇది నిజంగా మ్యాజిక్.

న్యూజిలాండ్‌లోని నార్త్ ఐలాండ్, వేయిటోమో గ్రామం సమీపంలో ఉన్న గ్లోవార్మ్ గుహలు (Glowworm Caves)ఒక అద్భుతమైన ప్రకృతి అద్భుతం. దాదాపు 30 మిలియన్ సంవత్సరాల క్రితం ఏర్పడిన సున్నపురాయి గుహలు ఇవి. 1887లో మావోరి నాయకుడు టానె టినోరౌ మరియు ఆంగ్ల సర్వేయర్ ఫ్రెడ్ మేస్ వీటిని కనుగొన్నారు. స్థానిక మావోరి ప్రజల పురాణాలలో కూడా వీటి గురించి ప్రస్తావన ఉంది. ఈ గుహలలో స్టలాక్టైట్స్, స్టలాగ్మైట్స్ వంటి శిలా ఫలకాలు అద్భుతంగా ఉంటాయి.

ఈ గుహలకు అసలైన అందం తీసుకొచ్చేది ‘అరాక్నోక్యాంపా ల్యుమినోసా’ అనే ఒక ప్రత్యేకమైన జాతి పురుగులు. ఇవి న్యూజిలాండ్‌లో మాత్రమే కనిపిస్తాయి. తమ జీవితం కోసం ఇవి బయోల్యుమినెసెన్స్ అనే ప్రక్రియ ద్వారా ఒక నీలిరంగు వెలుతురును వెదజల్లుతాయి. గుహల్లో పూర్తి చీకటిగా మారినప్పుడు, వేలాది గ్లోవార్మ్ పురుగులు వెలిగించిన కాంతి, భూమి మీదకు రాలిన నక్షత్రాల్లా మెరిసిపోతుంది. ఈ కాంతితో అవి కీటకాలను ఆకర్షించి తమ ఆహారంగా మలచుకుంటాయి.

పర్యాటకులు గుహలో ఒక భాగంలో నడిచి, ఆ తర్వాత నిశ్శబ్దంగా ఒక బోటులో ప్రయాణిస్తూ ఈ అద్భుతమైన కాంతి ప్రదర్శనను చూస్తారు. ఈ అనుభవం చాలా ప్రశాంతంగా, ఆధ్యాత్మికంగా ఉంటుంది. ప్రతి సంవత్సరం 5 లక్షలకు పైగా పర్యాటకులు ఈ గుహలను సందర్శిస్తారు. ఇక్కడ కేథడ్రల్ అనే ఒక గదిలో ఉండే సంగీత ప్రదర్శనలు కూడా పర్యాటక అనుభవానికి ఒక ప్రత్యేకమైన మెరుపును ఇస్తాయి.

మరిన్ని ఇంటర్నేషనల్ వార్తల కోసం ఇక్కడ క్లిక్ చేయండి