Superwood
ప్రపంచ నిర్మాణ రంగాన్ని మార్చివేయగల ఒక విప్లవాత్మక ఆవిష్కరణ ఇప్పుడు వెలుగులోకి వచ్చింది. అది ఉక్కు, కాంక్రీటు కాదు.. మనకు తెలిసిన చెక్కే. అయితే, ఇది సాధారణ చెక్క కాదు.. ఉక్కు కంటే పది రెట్లు బలంగా, ఆరు రెట్లు తేలికగా ఉండే అద్భుతమైన సూపర్‌వుడ్ (Superwood). ఒక స్టార్టప్ కంపెనీ దీనిని అభివృద్ధి చేసింది. ఇది కేవలం బలం మాత్రమే కాదు, ఇది పర్యావరణానికి కూడా చాలా ఉపయోగపడుతుంది.
ఈ అద్భుతమైన ఆవిష్కరణకు మూలం అమెరికాలోని యూనివర్సిటీ ఆఫ్ మేరీల్యాండ్. ప్రొఫెసర్ లియాంగ్‌బింగ్ హు ప్రయోగశాలలో 2013-2018 మధ్య జరిగిన పరిశోధనలు ఈ సూపర్‌వుడ్‌కు పునాది వేశాయి. సహజమైన చెక్కలోని కొన్ని భాగాలను (లిగ్నిన్, హీమిసెల్లులోజ్) తొలగించి, అధిక పీడనం, వేడితో దాన్ని నొక్కినప్పుడు అది అద్భుతమైన దృఢత్వాన్ని పొందుతుందని కనుగొన్నారు. ఈ పరిశోధన 2018లో నేచర్ అనే ప్రముఖ జర్నల్‌లో ప్రచురితమైంది.
ఆ పరిశోధన ఆధారంగా, ఇన్వెంట్‌వుడ్ (InventWood) అనే స్టార్టప్ కంపెనీ ఏర్పడింది. ఈ సంస్థ ఇప్పటికే 50 మిలియన్ డాలర్లకు పైగా నిధులను సేకరించింది. మేరీల్యాండ్‌లోనే ఒక భారీ ఉత్పాదక కేంద్రాన్ని నిర్మిస్తోంది. 2025 మధ్యలో ఈ సూపర్‌వుడ్‌తో తయారు చేసిన ఉత్పత్తులు (ఫసాడ్ ప్యానెల్స్) మార్కెట్‌లోకి రానున్నాయి.
సూపర్‌వుడ్ ప్రత్యేకతలు.. ఇది ఉక్కు కంటే దాదాపు 10 రెట్లు ఎక్కువ బరువును మోయగలదు. అదే సమయంలో ఉక్కు కంటే 6 రెట్లు తేలికగా ఉంటుంది. దీనివల్ల రవాణా ఖర్చులు, నిర్మాణ సమయం గణనీయంగా తగ్గుతాయి.
ఈ సూపర్‌వుడ్ అగ్నికి నిరోధకంగా పనిచేస్తుంది. ఇది Class A fire rating కూడా పొందింది. అంతేకాకుండా, నీరు, కుళ్లు, పురుగులు దీనిని దెబ్బ తీయలేవు. దీనివల్ల భవనాలు చాలా కాలం మన్నికగా ఉంటాయి.
ఉక్కు తయారీకి భారీగా కాలుష్యం విడుదల అవుతుంది. కానీ, ఈ సూపర్‌వుడ్ తయారీలో 90% తక్కువ కాలుష్యం ఉత్పత్తి అవుతుంది. ఇది ఒక బయోజెనిక్ మెటీరియల్ కాబట్టి, కార్బన్‌ను నిల్వ చేసుకుంటుంది. ఇది భవిష్యత్తులో పర్యావరణహిత నిర్మాణాలకు ఒక గొప్ప ప్రత్యామ్నాయం అవుతుంది.
ఈ సూపర్‌వుడ్(Superwood )వాడకం వల్ల భవిష్యత్తులో మన పర్యావరణానికి హాని కలిగించని విధంగా భారీ వుడ్ స్కైస్క్రేపర్లు నిర్మించడం సాధ్యమవుతుంది. ఇది కేవలం ఒక కొత్త ఉత్పత్తి మాత్రమే కాదు, భవిష్యత్తు నిర్మాణ రంగాన్ని సుస్థిరమైన మార్గం వైపు నడిపించే ఒక గొప్ప అడుగు.
