Stroke
స్ట్రోక్ (Stroke)అనేది ప్రపంచవ్యాప్తంగా లక్షలాది మందిని ఎఫెక్ట్ చేస్తున్న ఒక ఎమర్జెన్సీ సిచ్యువేషన్.. దీనిని నిర్లక్ష్యం చేస్తే ప్రాణాలు కోల్పోవడం లేదా శాశ్వత వైకల్యం ఏర్పడే ప్రమాదం ఉంది. స్ట్రోక్ చాలా అకస్మాత్తుగా సంభవించినా, ఇతర వ్యాధులలాగానే, మన శరీరం తరచుగా కొన్ని హెచ్చరిక సంకేతాలను ముందుగానే ఇస్తుందని వైద్య నిపుణులు చెబుతున్నారు. ఈ ప్రారంభ లక్షణాలను ముందుగానే గుర్తించగలిగితే, పెద్ద నష్టాన్ని నివారించవచ్చని నిపుణులు సూచిస్తున్నారు.
స్ట్రోక్ (Stroke)అంటే మెదడులోని ఒక భాగానికి రక్త ప్రవాహం అకస్మాత్తుగా ఆగిపోవడం లేదా తీవ్రంగా తగ్గిపోవడం. ఇలా రక్త ప్రసరణలో జాప్యం జరిగితే, మెదడు కణాలకు ఆక్సిజన్ , పోషకాలు అందక అవి దెబ్బతింటాయి. అందుకే ప్రారంభ లక్షణాలను గుర్తించడం , తక్షణ వైద్య సహాయం కోరడం ప్రాణాలను కాపాడటానికి, వైకల్యాన్ని నివారించడానికి చాలా ముఖ్యమని ప్రపంచ ఆరోగ్య సంస్థ (WHO) , అమెరికన్ స్ట్రోక్ అసోసియేషన్ నొక్కి చెబుతున్నాయి.
- స్ట్రోక్ వచ్చే ముందు ఈ లక్షణాలు అకస్మాత్తుగా కనిపించవచ్చు. వీటిని ఎప్పుడూ విస్మరించకూడదు:
- తీవ్రమైన తలనొప్పి.. ఇది మీరు ఇంతకు ముందు ఎప్పుడూ అనుభవించని విధంగా, అకస్మాత్తుగా మరియు తీవ్రంగా ఉంటుంది.
- దృష్టి సమస్యలు.. అస్పష్టమైన దృష్టి (Blurred Vision) లేదా వస్తువులు రెండుగా కనిపించడం (Double Vision).
- జలదరింపు/తిమ్మిరి.. ముఖం, చేతులు లేదా కాళ్లలో జలదరింపు లేదా తిమ్మిరి అనుభూతి కలుగుతుంది.
- మాట్లాడటంలో ఇబ్బంది.. మాటలు అస్పష్టంగా ఉండటం (Slurred Speech) లేదా సరైన పదాలను గుర్తుంచుకోవడంలో ఇబ్బంది పడటం.
- సమతుల్యత కోల్పోవడం.. అకస్మాత్తుగా సమతుల్యత కోల్పోవడం లేదా నడవడంలో తీవ్రమైన ఇబ్బంది కలగడం.
- ముఖం వాలిపోవడం.. ముఖం ఒక వైపునకు వాలిపోవడం లేదా మొహంపై పట్టు కోల్పోవడం.
- గందరగోళం.. ఆకస్మికంగా గందరగోళం (Confusion) లేదా జ్ఞాపకశక్తి కోల్పోవడం.
మెదడు అనూరిజం ప్రమాదం..తీవ్రమైన తలనొప్పి వంటి హెచ్చరిక సంకేతం మెదడు అనూరిజం (Brain Aneurysm) పగిలిపోవడం వల్ల కలిగే సబ్‌అరాక్నాయిడ్ రక్తస్రావం (Subarachnoid Hemorrhage) కూడా కావచ్చు. మెదడు అనూరిజం అంటే మెదడులోని రక్తనాళం గోడలు బలహీనమై, ఒక బెలూన్ లాగా ఉబ్బడం. ఇది పగిలిపోయినప్పుడు మెదడులోకి రక్తస్రావం అవుతుంది. పగిలిన అనూరిజం వల్ల మెడ దృఢత్వం (Neck Stiffness), ఆకస్మిక తీవ్రమైన తలనొప్పి , కంటి కదలికలో ఇబ్బంది వంటి లక్షణాలు కనిపిస్తాయి. ముఖ్యంగా మూడవ కపాల నాడి (Third Cranial Nerve)పై ఒత్తిడి కారణంగా ఈ లక్షణాలు ఏర్పడతాయి.
మీరు లేదా మీ చుట్టూ ఉన్నవారు ఎవరైనా ఇలాంటి లక్షణాలను అనుభవిస్తే, అవి టెంపరరీగా కనిపించినా సరే, వాటిని ఎప్పుడూ నెగ్లెక్ట్ చేయకూడదు. వెంటనే వైద్యులను సంప్రదించి చికిత్స పొందడం ప్రాణాంతక ప్రమాదాన్ని నివారిస్తుంది.
