Barnyard millet
ఆధునిక జీవనశైలి, కలుషితమైన వాతావరణం, రసాయనాలతో కూడిన ఆహారం మనిషి ఆరోగ్యాన్ని దెబ్బతీస్తున్నాయి. ఉరుకుల పరుగుల జీవితంలో తమ ఆరోగ్యం గురించి ఆలోచించుకునే తీరిక లేకుండా గడిపేస్తున్నారు. దీనివల్ల, శరీరంలో వ్యాధులు పేరుకుపోతున్నాయని ఆలస్యంగా గ్రహిస్తున్నారు. ఈ పరిస్థితికి ఒక పరిష్కారం కోసం, మన తాత ముత్తాతల తరంలో పాటించిన ఆహారపు అలవాట్ల వైపు నేటితరం దృష్టి సారించాలంటున్నారు ఆరోగ్య నిపుణులు.
ఒకప్పుడు మన పూర్వీకులు రాగులు, కొర్రలు, సజ్జలు, జొన్నలు వంటి చిరుధాన్యాలను ప్రధాన ఆహారంగా తీసుకునేవారు. అప్పట్లో వారు ఎటువంటి అనారోగ్య సమస్యలు లేకుండా వంద ఏళ్లకు పైగా ఆరోగ్యంగా జీవించగలిగారు. అలాంటి చిరుధాన్యాల్లో ఒకటైన అరికెలు, అత్యంత పోషక విలువలు కలిగి ఉన్న ఆహారం.
అరికెల(Barnyard millet)లో ఎక్కువ మొత్తంలో ఫైబర్, కాల్షియం, ఐరన్, విటమిన్స్, మినరల్స్, యాంటీ ఆక్సిడెంట్లు పుష్కలంగా లభిస్తాయి. ఇవి శరీరానికి అవసరమైన పోషకాలను అందించడంలో కీలక పాత్ర పోషిస్తాయి. అధిక బరువుతో బాధపడేవారు అరికెలను ఆహారంగా తీసుకోవడం వలన త్వరగా బరువు తగ్గుతారు. అంతేకాకుండా, నిద్రలేమి సమస్యలు కూడా దూరమవుతాయి.
అరికెలతో అన్నం, ఉప్మా వంటివి చేసుకుని తినవచ్చు. ఇందులో ఫైబర్ ఎక్కువగా ఉండటం వల్ల జీర్ణ సమస్యలు, గ్యాస్, అసిడిటీ, మలబద్దకం వంటి సమస్యలు తొలగిపోతాయి. గుండె జబ్బులు రాకుండా కూడా అరికెలు దోహదపడతాయి. ముఖ్యంగా, నెలసరి సమస్యలతో బాధపడే మహిళలకు అరికెలను ఆహారంగా తీసుకోవడం మంచిదని నిపుణులు సూచిస్తున్నారు.
అరికెలు(Barnyard millet) తీపి, వగరు, చేదు రుచులను కలిగి ఉంటాయి. ఇవి రక్తంలో చక్కెర, కొలెస్ట్రాల్‌ స్థాయిలను అదుపులో ఉంచుతాయి. క్యాన్సర్ వంటి ప్రాణాంతక వ్యాధులు రాకుండా అడ్డుకునే గుణం అరికెలకు ఉంది. డెంగ్యూ, టైఫాయిడ్ వంటి జ్వరాలతో బాధపడేవారికి అరికెలు రక్తశుద్ధి చేసి త్వరగా కోలుకోవడానికి సహాయపడతాయి. దీర్ఘకాలిక వ్యాధులు ఉన్నవారికి కూడా అరికెల ఆహారం మంచి ఫలితాలను ఇస్తుంది.
అరికెలు(Barnyard millet) కేవలం ఒక ఆహార ధాన్యం మాత్రమే కాదు, అది మన ఆరోగ్యానికి ఒక సంపూర్ణ ఔషధం లాంటిది. పూర్వకాలపు ఆహార అలవాట్లకు తిరిగి వెళ్లడం ద్వారా మనం ఆరోగ్యవంతమైన జీవితాన్ని పొందొచ్చు.
