Yoga
భారతదేశ సంప్రదాయంలో యోగా (Yoga) ఒక ముఖ్యమైన భాగం. ఇది శరీరాన్ని, మనస్సును ప్రశాంతంగా ఉంచడంలో సహాయపడుతుంది. ఆధునిక జీవనశైలి వల్ల వచ్చే శారీరక నొప్పులకు, కండరాల బలహీనతకు యోగా ఒక మంచి పరిష్కారం. ముఖ్యంగా, కొన్ని ఆసనాలు నొప్పులను తగ్గించి, కండరాలకు బలాన్నిస్తాయి.
నొప్పులు తగ్గించి, కండరాలను బలపరిచే ఆసనాలు:
వీరభద్రాసనం (యోధ భంగిమ)..వీరభద్రాసనం అనేది యోధ భంగిమను పోలి ఉంటుంది. దీనిని చేయడం ద్వారా ఛాతీ, ఊపిరితిత్తులు, భుజాలు, మెడ కండరాలు సాగుతాయి. ఇది కాళ్ళు, చీలమండలను బలోపేతం చేస్తుంది. ముఖ్యంగా, సయాటిక నొప్పితో దీర్ఘకాలంగా బాధపడే వారికి ఈ ఆసనం గొప్ప ఉపశమనాన్ని ఇస్తుంది. ఈ ఆసనం శరీరానికి స్థిరత్వం, బలం చేకూర్చుతుంది.
నటరాజాసనం (నృత్యరాజు భంగిమ)..శివుడి నృత్య భంగిమను పోలి ఉండే ఈ ఆసనం, శరీరానికి మంచి ఆకృతిని ఇస్తుంది. ఇది కాళ్ల లోపలి, బయటి కండరాలను బలంగా చేస్తుంది. భుజాలు, ఛాతీ, తొడలు, ఉదరం, కాళ్లకు మంచి వశ్యతను (flexibility) అందిస్తుంది. ఇది ఏకాగ్రతను పెంచి, శరీర సమతుల్యతను మెరుగుపరుస్తుంది.
నౌకాసనం (నావ భంగిమ)..నౌకాసనం చాలా సరళమైనది. ఇది పొట్ట , తొడల కండరాలపై దృష్టి పెట్టి వాటిని బలంగా చేస్తుంది. ఈ ఆసనం ముఖ్యంగా పొట్ట చుట్టూ పేరుకుపోయిన కొవ్వును కరిగించడానికి సహాయపడుతుంది. ఇది జీర్ణశక్తిని మెరుగుపరుస్తుంది, వెన్నెముకకు బలం ఇస్తుంది.
ఉత్కాటాసనం (కుర్చీ భంగిమ)..కుర్చీలో కూర్చున్నట్లు ఉండే ఈ ఆసనం, తొడల కండరాల నొప్పిని, సయాటిక నొప్పితో బాధపడే వారికి ఉపశమనం అందిస్తుంది. ఇది కాళ్లు, తొడలు, వెన్నుముక కండరాలకు బలం చేకూర్చుతుంది. ఇది గుండె ఊపిరితిత్తుల పనితీరును మెరుగుపరుస్తుంది.
శలభాసనం (మిడత భంగిమ)..శలభాసనం మిడత ఆకారంలో ఉంటుంది. ఈ ఆసనం వెనుక భాగం (lower back) తుంటి సమస్యలను దూరం చేస్తుంది. వెన్నెముకకు బలం ఇస్తుంది, భుజాలు, చేతులు, కాళ్ళ కండరాలను దృఢం చేస్తుంది. ఇది జీర్ణక్రియను మెరుగుపరచి, శరీరాన్ని చురుకుగా ఉంచుతుంది.
పూర్వోత్తానాసనం (పైకి మొగ్గిన బల్ల భంగిమ)..ఈ ఆసనం చేతులు, కాళ్లు, వెన్నెముకను బలోపేతం చేస్తుంది. భుజాలు, ఛాతీ కండరాలను సాగదీస్తుంది. ఇది మొత్తం శరీరానికి బలాన్నిచ్చి, ఒత్తిడిని తగ్గిస్తుంది. ఈ ఆసనం హృదయ ఆరోగ్యానికి కూడా మేలు చేస్తుంది.
ఈ ఆసనాలు క్రమం తప్పకుండా సాధన చేయడం వల్ల నొప్పులు తగ్గడమే కాకుండా, శరీర కండరాలు దృఢపడి ఆరోగ్యవంతమైన జీవితాన్ని పొందొచ్చు. యోగా సాధన చేసేటప్పుడు మీ శరీరానికి అనుగుణంగా చేసుకోవడం ముఖ్యం.
