TB
హైదరాబాద్ నగరం అనగానే ఒకప్పుడు కేవలం ఐటీ కంపెనీలు మాత్రమే గుర్తొచ్చేవి. కానీ కరోనా మహమ్మారి తర్వాత, ఈ నగరం ప్రపంచానికే ‘వ్యాక్సిన్ క్యాపిటల్’గా మారిపోయింది. భారత్ బయోటెక్ సంస్థ తయారు చేసిన కోవాక్సిన్ ఎంతటి విజయాన్ని సాధించిందో మనందరికీ తెలిసిందే.
ఇప్పుడు అదే స్ఫూర్తితో, మానవాళిని దశాబ్దాలుగా పీడిస్తున్న మరో భయంకరమైన వ్యాధి ‘క్షయ’ (Tuberculosis – TB) కు శాశ్వత పరిష్కారం చూపే దిశగా భారత్ బయోటెక్ అడుగులు వేస్తోంది. ప్రతీ ఏటా ప్రపంచవ్యాప్తంగా లక్షలాది మంది ప్రాణాలను బలిగొంటున్న టీబీని అంతం చేసేందుకు ఒక విప్లవాత్మక వ్యాక్సిన్ను ఈ సంస్థ సిద్ధం చేస్తోంది.
ఈ మహత్తర కార్యం కోసం భారత్ బయోటెక్ సంస్థ, అంతర్జాతీయ స్థాయిలో పేరున్న బయోఫ్యాబ్రి అనే స్పానిష్ బయోఫార్మాస్యూటికల్ కంపెనీతో చేతులు కలిపింది. వీరిద్దరి భాగస్వామ్యంలో రూపొందుతున్న ఈ వ్యాక్సిన్ పేరు ఎంటీబీవ్యాక్ (MTBVAC). ప్రస్తుతం మన దేశంలో పుట్టిన పిల్లలకు టీబీ రాకుండా బీసీజీ (BCG) వ్యాక్సిన్ వేస్తున్నారు.
అయితే, ఈ బీసీజీ వ్యాక్సిన్ వంద సంవత్సరాల క్రితం నాటిది. ఇది చిన్నపిల్లల్లో టీబీ(TB) రాకుండా కొంతవరకు అడ్డుకోగలుగుతుంది కానీ, పెద్దవారిలో ఊపిరితిత్తుల టీబీని నివారించడంలో అంతగా ప్రభావం చూపడం లేదు. ఈ లోపాన్ని భర్తీ చేస్తూ, చిన్నపిల్లల నుంచి పెద్దల వరకు అందరికీ రక్షణ ఇచ్చేలా ఎంటీబీవ్యాక్ వ్యాక్సిన్ను రూపొందించారు.
ఈ వ్యాక్సిన్ అభివృద్ధి ప్రక్రియ గత మూడేళ్లుగా చాలా నిశితంగా జరుగుతోంది. ఇప్పటికే మొదటి మరియు రెండవ దశ క్లినికల్ ట్రయల్స్ (పరీక్షలు) విజయవంతంగా పూర్తయ్యాయి. ఈ పరీక్షల్లో ఎంటీబీవ్యాక్ వ్యాక్సిన్ చాలా సురక్షితమైనదని , శరీరంలో వ్యాధి నిరోధక శక్తిని పెంచడంలో అద్భుతంగా పనిచేస్తోందని నిరూపితమైంది.
త్వరలోనే భారతదేశవ్యాప్తంగా మూడవ దశ క్లినికల్ ట్రయల్స్ భారీ ఎత్తున ప్రారంభం కానున్నాయి. వేలాది మంది వాలంటీర్లపై ఈ పరీక్షలు నిర్వహించి, తుది ఫలితాలను విశ్లేషించిన తర్వాత దీనిని మార్కెట్లోకి విడుదల చేస్తారు. ఇది అందుబాటులోకి వస్తే, కేవలం భారత్ మాత్రమే కాదు, ఆఫ్రికా మరియు ఆసియా ఖండాల్లోని పేద దేశాలకు ఇది ఒక వరప్రసాదం కానుంది.
క్షయ వ్యాధి అనేది కేవలం ఒక అనారోగ్యం మాత్రమే కాదు, ఇది ఒక పేద దేశాల ఆర్థిక వ్యవస్థను కూడా దెబ్బతీస్తుంది. సరైన సమయంలో వైద్యం అందక, వ్యాక్సిన్ లేక లక్షలాది మంది పని చేయలేని స్థితికి చేరుకుంటున్నారు. భారత్ బయోటెక్ తయారు చేస్తున్న ఈ వ్యాక్సిన్ వల్ల మరణాల సంఖ్య తగ్గడమే కాకుండా, ఆరోగ్యకరమైన సమాజం నిర్మాణమవుతుంది.
టెక్నికల్ నాలెడ్జ్ లో బయోఫ్యాబ్రి సహకరిస్తుండగా, ఈ వ్యాక్సిన్ను భారీ స్థాయిలో ఉత్పత్తి చేసి ప్రపంచవ్యాప్తంగా సరఫరా చేసే బాధ్యతను హైదరాబాద్లోని భారత్ బయోటెక్ తీసుకుంది. ఇది పూర్తిస్థాయిలో అందుబాటులోకి వస్తే, మెడికల్ రంగంలో హైదరాబాద్ పేరు మరోసారి ప్రపంచవ్యాప్తంగా మారుమోగిపోవడం ఖాయం.
మరిన్ని తాజా వార్తల కోసం ఇక్కడ క్లిక్ చేయండి
-
-
-
-
