Khairatabad: ఖైరతాబాద్ పై బీఆర్ఎస్ ఫోకస్..  పీజేఆర్ వారసులను బరిలో దింపే ఛాన్స్

Khairatabad

తెలంగాణ రాజకీయాల్లో మళ్లీ ఉపఎన్నికలు రాబోతున్నాయి. ఇటీవలే జూబ్లీహిల్స్ బై పోల్ జరగ్గా బీఆర్ఎస్ ఖాతాలో ఉన్న ఆ సీటును కాంగ్రెస్ హస్తగతం చేసుకుంది. దివంగత నేత మాగంటి గోపీనాథ్ భార్య సునీతపై కాంగ్రెస్ అభ్యర్థి నవీన్ యాదవ్ భారీ మెజార్టీతో గెలిచారు. ఆ ఓటమి గులాబీ పార్టీకి పెద్ద షాక్ అనే చెప్పాలి. కాంగ్రెస్ పాలనకు రెఫరెండంగా భావించి ప్రచారం చేస్తే సునీత ఓడిపోవడం బీఆర్ఎస్ కు మింగుడుపడడం లేదు.

ప్రస్తుతం ఆ పరాజయం నుంచి కోలుకుంటున్న బీఆర్ఎస్ ఇప్పుడు ఖైరతాబాద్(Khairatabad) పై ఫోకస్ పెట్టింది. ఇక్కడ బీఆర్ఎస్ నుంచి గెలిచి కాంగ్రెస్ పార్టీలో చేరిన దానం నాగేందర్ ఇవాళో రేపో రాజీనామా చేసేందుకు సిద్ధపడుతున్నారు. స్పీకర్ అనర్హత వేటు వేయకముందే ఎమ్మెల్యే పదవికి రిజైన్ చేయాలని డిసైడయినట్టు టాక్. మరోవైపు జూబ్లీహిల్స్ చేజారినా ఖైరతాబాద్(Khairatabad) లో గెలవాలని గులాబీ పార్టీ పట్టుదలగా ఉంది. దీని కోసం ఇప్పటి నుంచే అభ్యర్థుల వేట మొదలుపెట్టింది. పీజేఆర్ కు కంచకోటగా పేరున్న ఖైరతాబాద్ లో ఆయన వారసులను బరిలోకి దింపేందుకు స్కెచ్ వేస్తోంది.

పీజేఆర్ కుమార్తె విజయారెడ్డి, కుమారుడు విష్ణవర్థన్ రెడ్డిలలో ఒకరిని పోటీ చేయించాలని భావిస్తోంది. విజయారెడ్డి ప్రస్తుతం కాంగ్రెస్ పార్టీలో ఉన్నారు. ఆమెను బీఆర్ఎస్ లోకి ఆహ్వానించి టికెట్ ఇస్తే గెలిచే అవకాశాలుంటాయని గులాబీ శ్రేణులు భావిస్తున్నాయి. తండ్రి చనిపోయిన తర్వాత విజయారెడ్డి కూడా రాజకీయాల్లో అడుగుపెట్టారు. 2009లో స్వతంత్ర అభ్యర్థిగా శేర్లింగంపల్లి నుంచి పోటీ చేసి పరాజయం పాలయ్యారు. 2014లో వైసీపీ నుంచి ఖైరతాబాద్(Khairatabad) నియోజకవర్గంలోనూ పోటీ చేసి ఓడిపోయారు.

2014లో బీఆర్ఎస్ లో చేరిన విజయారెడ్డి అదే పార్టీ నుంచి రెండు సార్లు కార్పొరేటర్ అయ్యారు. అయితే 2018లో ఆమె ఖైరతాబాద్ టికెట్ ఆశించి భంగపడింది. దీంతో 2022లో కాంగ్రెస్ పార్టీ కండువా కప్పుకున్నారు. గత ఎన్నికల్లో కాంగ్రెస్ తరపున ఖైరతాబాద్(Khairatabad) లో దానం నాగేందర్ పైనే పోటీ చేసి ఓడిపోయారు. మరోవైపు పీజేఆర్ చనిపోయాక ఆయన వారసుడిగా రెండుసార్లు కాంగ్రెస్ ఎమ్మెల్యేగా గెలిచిన విష్ణుకు 2014, 2018లో మాత్రం చుక్కెదురైంది. 2023 ఎన్నికల్లో కాంగ్రెస్ టికెట్ ఇవ్వకపోవడంతో పార్టీ మారి బీఆర్ఎస్ లో చేరారు. ఇటీవల జూబ్లిహీల్స్ బై పోల్ లోనూ టికెట్ ఆశించినా దక్కలేదు. దీంతో ఖైరతాబాద్ ఉపఎన్నిక వస్తే విష్ణును దింపాలని గులాబీ పార్టీ భావిస్తోంది.

మరిన్ని పొలిటికల్ వార్తల కోసం ఇక్కడ క్లిక్ చేయండి