Tirumala
డిసెంబర్ నెలలో శ్రీవారి దర్శనం, ఆర్జిత సేవలు, గదుల బుకింగ్‌లకు సంబంధించి తిరుమల తిరుపతి దేవస్థానం( TTD) కీలక ప్రకటన చేసింది. భక్తుల రద్దీని దృష్టిలో ఉంచుకుని, టీటీడీ వివిధ కోటాలను ఆన్‌లైన్‌లో విడుదల చేస్తోంది. దీనివల్ల భక్తులు ముందుగానే తమ ప్రయాణాన్ని ప్లాన్ చేసుకోవడానికి వీలు కలుగుతుంది. ఈ సేవలను బుక్ చేసుకోవాలనుకునే భక్తులు టీటీడీ అధికారిక వెబ్‌సైట్ https://ttdevasthanams.ap.gov.in ను సందర్శించి బుక్ చేసుకోవచ్చు.
డిసెంబర్ నెలలో శ్రీవారి ఆర్జిత సేవల్లో పాల్గొనాలనుకునే భక్తుల కోసం ఆర్జిత సేవా టికెట్ల కోటాను సెప్టెంబర్ 18వ తేదీ ఉదయం 10 గంటలకు టీటీడీ ఆన్‌లైన్‌లో విడుదల చేసింది. లక్కీడిప్ ద్వారా ఈ టికెట్లు పొందాలనుకునే భక్తులు సెప్టెంబర్ 20వ తేదీ ఉదయం 10 గంటల వరకు తమ పేర్లను నమోదు చేసుకోవచ్చు. ఈ లక్కీడిప్‌లో టికెట్లు పొందిన వారు సెప్టెంబర్ 22వ తేదీ మధ్యాహ్నం 12 గంటలలోపు చెల్లింపులు పూర్తి చేయాల్సి ఉంటుంది.
ఈ నెల నుంచి అంగ ప్రదక్షిణ టోకెన్లను కూడా టీటీడీ ఆన్‌లైన్‌లో ఎలక్ట్రానిక్ డిప్ ద్వారా జారీ చేస్తోంది. ఈ టోకెన్ల కోసం భక్తులు సెప్టెంబర్ 20 నుంచి 22వ తేదీ మధ్యాహ్నం 12 గంటల లోపు నమోదు చేసుకుని, సొమ్ము చెల్లిస్తే లక్కీడిప్‌లో టోకెన్లు మంజూరవుతాయి.కల్యాణోత్సవం, ఊంజల్ సేవ, ఆర్జిత బ్రహ్మోత్సవం మరియు సహస్రదీపాలంకార సేవ టికెట్లను సెప్టెంబర్ 22న ఉదయం 10 గంటలకు టీటీడీ ఆన్‌లైన్‌లో విడుదల చేయనుంది.
వర్చువల్ సేవలు , వాటి దర్శన స్లాట్లకు సంబంధించిన కోటాను కూడా సెప్టెంబర్ 22న మధ్యాహ్నం 3 గంటలకు విడుదల చేయనున్నారు.
ముఖ్యమైన దర్శన కోటాల విడుదల షెడ్యూల్ కూడా టీటీడీ విడుదల చేసింది. డిసెంబర్ నెల కోసం శ్రీవాణి ట్రస్టు దర్శన టికెట్ల కోటాను సెప్టెంబర్ 23వ తేదీ ఉదయం 11 గంటలకు విడుదల చేస్తారు. ఈ టికెట్లు పొందిన భక్తులు ప్రత్యేక మార్గం ద్వారా దర్శనం చేసుకునే అవకాశం ఉంటుంది.
వయస్సు మీరిన, దివ్యాంగులు , దీర్ఘకాలిక వ్యాధులతో బాధపడుతున్న భక్తుల కోసం ఉచిత ప్రత్యేక దర్శన టోకెన్ల కోటాను సెప్టెంబర్ 23వ తేదీ మధ్యాహ్నం 3 గంటలకు టీటీడీ ఆన్‌లైన్‌లో విడుదల చేయనుంది.అలాగే సాధారణ భక్తుల కోసం ప్రత్యేక ప్రవేశ దర్శన టికెట్ల కోటాను సెప్టెంబర్ 24వ తేదీ ఉదయం 10 గంటలకు విడుదల చేయనున్నారు. ఈ టికెట్లు భక్తులకు శ్రీవారి దర్శనాన్ని సులభతరం చేస్తాయి.
దర్శన టికెట్లతో పాటుగా భక్తుల సౌకర్యార్థం వసతి గదుల కోటాను కూడా టీటీడీ ఆన్‌లైన్‌లో విడుదల చేస్తుంది. తిరుమల(Tirumala)లో మాత్రమే కాకుండా, తిరుపతిలోని గదుల కోసం కూడా ఈ కోటాను సెప్టెంబర్ 24వ తేదీ మధ్యాహ్నం 3 గంటలకు ఆన్‌లైన్‌లో విడుదల చేయనున్నారు. భక్తులు తమ అవసరాలకు తగినట్లుగా గదులను ముందుగానే బుక్ చేసుకోవచ్చు. భక్తులందరూ ఈ షెడ్యూల్‌ను దృష్టిలో ఉంచుకుని, ముందుగానే తమ దర్శన , వసతి ఏర్పాట్లు చేసుకోవాలని టీటీడీ సూచించింది.
