Puttaparthi Sai Baba: మొన్న షిర్డీ సాయిబాబా..ఇప్పుడు పుట్టపర్తి సాయిబాబా..ఎందుకీ కొత్త రాగం?

Puttaparthi Sai Baba

మొన్నటి వరకూ షిర్డీ సాయిబాబాను నమ్మేవారంతా కొద్ది రోజులుగా షిర్డీ సాయిని నమ్మడం మానేశారు. అదేమంటే ఆయన కేవలం ఫకీరు. పైగా ముస్లిం. మన హిందూ దేవుళ్లను మనం పూజించాలి కానీ.. పరమతంలోని గురువును ఎందుకు పూజించాలి అంటూ కొత్త రాగం అందుకున్నారు.

ఇదే సమయంలో మరోవైపు పుట్టపర్తి సాయిబాబా(Puttaparthi Sai Baba) శత జయంతి ఉత్సవాలను అతిరథమహారధులు విచ్చేసి అత్యంత వైభవంగా జరిపించారు. ఏ ఆధ్యాత్మిక కేంద్రం అయినా తమ ప్రాంతంలో ఉన్నప్పుడు, ఆయా ప్రభుత్వాలు దానిని ప్రోత్సహించడం అనేది సహజంగా జరిగేదే. అలాగే శత జయంతి ఉత్సవాలు నిర్వహించారు. ఇది కూడా మంచి విషయమే.

అయితే ఇదంతా షిర్డీ సాయిని పక్కన పెట్టడానికే..ఇప్పుడు పుట్టపర్తి సాయిని హైలెట్ చేస్తున్నారన్న వాదన సోషల్ మీడియాలో వినిపించడమే ఇప్పుడు హాట్ టాపిక్ అవుతోంది.

ఇందులో నిజానిజాలు సంగతి పక్కన పెట్టి కాసేపు ఇద్దరు సాయిల గురించి ఒకసారి చూస్తే షిర్డీ సాయిబాబా, సత్యసాయిబాబా (పుట్టపర్తి సాయిబాబా) – ఈ ఇద్దరూ భారతదేశంలోనే కాక ప్రపంచవ్యాప్తంగా కోట్లాది మంది భక్తులను కలిగి ఉన్న గొప్ప ఆధ్యాత్మిక వ్యక్తులు. వీరిద్దరి ఆరాధనలో ఉన్న సారూప్యతలు, తేడాలు వీరిని హైలైట్ చేయడం వెనుక ఉన్న సామాజిక-రాజకీయ కోణాలు ఆందోళన కలిగిస్తున్నాయి.

షిర్డీ సాయిబాబా సుమారు 19వ శతాబ్దం మధ్యకాలం నుంచి 20వ శతాబ్దం ఆరంభం (1838 – 1918) వరకు జీవించారు. ఆయన బోధనల్లో ముఖ్యమైనది ‘సబ్ కా మాలిక్ ఏక్’ (అందరి దేవుడు ఒక్కడే) అనే మత సామరస్యం. ఆయన జీవిత కాలంలో హిందూ-ముస్లిం ఐక్యతకు ప్రతీకగా నిలిచారు. ముస్లిం ఫకీర్ రూపంలో ఉంటూ, మసీదులో నివాసం ఉన్నా కూడా, హిందూ ఆచారాలను గౌరవించేవారు. ఆయన భక్తి అనేది ప్రధానంగా ఆలయం , ట్రస్ట్ ద్వారా భక్తిపైనే ఆధారపడింది.

మరోవైపు, పుట్టపర్తి సత్యసాయిబాబా(Puttaparthi Sai Baba) 20వ శతాబ్దంలో (1926 – 2011) జీవించారు. ఆయన ముఖ్యంగా శివలింగాన్ని నోటిలోంచి తీయడం వంటి అద్భుతాలు (Miracles)తో, ఉచిత విద్య, వైద్యం వంటి సేవల ద్వారా ప్రసిద్ధి చెందారు. ఆయన షిర్డీ సాయిబాబా యొక్క పునర్జన్మ అని ప్రకటించుకున్నారు. ఆయన సంస్థాగత రూపంలో బహుళజాతి సంస్థ వలె సేవలు, విద్యా సంస్థలు, ఆసుపత్రులు స్థాపించడం ద్వారా భక్తి ప్రపంచవ్యాప్తంగా విస్తరించింది.

షిర్డీ సాయిబాబా తన జీవిత కాలమంతా మత సామరస్యాన్ని బోధించారు. ఆయన ‘అల్లా మాలిక్’ (ముస్లిం నినాదం) ,’శ్రీరామ జైరాం’ (హిందూ నినాదం) అనే రెండు పదాలను నిత్యం పలికేవారు. ఆయన ఆరాధన అన్ని మతాల ప్రజలను ఏకం చేస్తుంది.

పుట్టపర్తి సత్యసాయిబాబా(Puttaparthi Sai Baba) 1970వ దశకం తరువాత అంతర్జాతీయంగా ప్రాచుర్యం పొందారు. ఆయన స్థాపించిన సేవా కార్యక్రమాలు (ఉచిత ఆసుపత్రులు, విశ్వవిద్యాలయాలు) విపరీతమైన ఆకర్షణను తెచ్చిపెట్టాయి. ఈ సేవా కార్యక్రమాల ద్వారా విదేశాల్లోని లక్షలాది మంది ప్రజలు ఆయనను దైవంగా భావించి ఆరాధించడం మొదలుపెట్టారు.

ఒకవిధంగా చెప్పాలంటే ఇద్దరూ సమాజానికి మంచి చేసిన వారే. మనుషులను ఆదుకున్నవారే. కానీ కొత్తగా విడగొట్టి పూజించాలన్న కాన్సెప్ట్ ఎందుకు తెరమీదకు వచ్చిందో ఆ కొందరికే తెలియాలి. ఇంకా చెప్పాలంటే ఇద్దరూ మనుషులే అయినా సమాజానికి ఒక దిక్సూచిలా నిలబడ్డారు. కాబట్టి వారిని కొంతమంది పూజించడం మొదలుపెట్టారు. అదే సమయంలో కొంతమంది మనుషులను ఎందుకు పూజించాలి అని దూరంగా ఉన్నవాళ్లూ ఉన్నారు.

అయితే ఈమధ్య మత సామరస్యాన్ని దెబ్బతీయడానికి ఉద్దేశపూర్వకంగా ఈ ఇద్దరి మధ్య పోలికలు తీసుకురావడం అనేది అవాంఛనీయం. షిర్డీ సాయిబాబా యొక్క మూల బోధన అయిన ‘సబ్ కా మాలిక్ ఏక్’ అనేది మత భేదాలను విస్మరించమని చెబుతుంది. దురదృష్టవశాత్తూ, కొందరు వ్యక్తులు తమ స్వార్థ ప్రయోజనాల కోసం, లేదా మతపరమైన ఉద్రిక్తతలను పెంచడానికి ఉద్దేశపూర్వకంగా ఈ ఇద్దరు గురువుల మతాలను లేదా భిన్నత్వాన్ని హైలైట్ చేస్తున్నారు. ఇది కేవలం సమాజంలో అనవసరమైన విభజనలకు దారితీస్తుందన్న విషయాన్ని మరిచిపోవడమే ఇప్పుడు బాధాకరం.

అటు షిర్డీ సాయిబాబా ,ఇటు పుట్టపర్తి సాయిబాబా (Puttaparthi Sai Baba)ఇద్దరూ లక్షలాది మందికి శాంతి, సేవ ,భక్తి మార్గాన్ని బోధించారు. ఏ గురువును హైలైట్ చేసినా, దాని వెనుక ఉన్న అంతిమ లక్ష్యం లోక కళ్యాణం కావాలి తప్ప, మతాల మధ్య చిచ్చు పెట్టడం కాదన్న విషయాన్ని వీరంతా గుర్తు పెట్టుకోవాలి.

మరిన్ని ఆధ్యాత్మిక వార్తల కోసం ఇక్కడ క్లిక్ చేయండి.