Ind Vs Sa: ఆరంభం అదరాల్సిందే..  సఫారీలతో వన్డే సిరీస్ కు భారత్ రెడీ

Ind Vs Sa

సొంతగడ్డపై వైట్ వాష్ పరాభవం నుంచి కోలుకుంటున్న టీమిండియా సౌతాఫ్రికా(Ind Vs Sa)తో ఇప్పుడు వన్డే సిరీస్ కు రెడీ అయింది. మూడు వన్డేల సిరీస్ లో తొలి మ్యాచ్ ఆదివారం రాంచీ వేదికగా జరగబోతోంది. సొంతగడ్డపై టెస్ట్ సిరీస్ ను 0-2తో కోల్పోయి తీవ్ర విమర్శలు ఎదుర్కొన్న భారత జట్టు వన్డే సిరీస్ ను ఘనంగా ఆరంభించాలని పట్టుదలగా ఉంది. గిల్ అందుబాటులో లేకపోవడంతో తాత్కాలిక కెప్టెన్ గా బాధ్యతలు అందుకున్న కేఎల్ రాహుల్ కు ఈ(Ind Vs Sa) సిరీస్ సవాల్ గానే చెప్పాలి.

ఎందుకంటే కీలక ఆటగాళ్లు కొందరు అందుబాటులో లేకపోవడం ఇబ్బందికరంగా మారింది. హార్దిక్ పాండ్యా, శ్రేయాస్ అయ్యర్ గాయాలతో దూరమవగా.. బుమ్రాకు రెస్ట్ ఇచ్చారు. దీంతో యువ ఆటగాళ్ల ప్రదర్శనే ఈ సిరీస్ లో కీలకం కాబోతోంది. ఆస్ట్రేలియా టూర్ లో రాణించిన రోహిత్ శర్మ, కోహ్లి జట్టుతో చేరగా.. గిల్ లేకపోవడంతో జైశ్వాల్ కు ఓపెనర్ ఛాన్స్ దక్కింది.

మూడో స్థానంలో కోహ్లి ఆడనుండగా.. నాలుగో స్థానంలో ఎవరు దిగుతారనే దానిపై ఉత్కంఠ నెలకొంది. ఈ ప్లేస్ కోసం రుతురాజ్ గైక్వాడ్, రిషబ్ పంత్ ఇద్దరు పోటీలో ఉన్నారు. తుది జట్టులో పంత్ ఉంటాడని రాహుల్ ఇప్పటికే హింట్ ఇచ్చినా మ్యాచ్ రోజే నిర్ణయం తీసుకుంటామని కూడా చెప్పాడు. దీంతో వీరిద్దరిలో ఎవరు తుది జట్టులోకి వచ్చినా నాలుగో ప్లేస్ ఆడడం ఖాయం. ఇదిలా ఉంటే ఐదో స్థానంలో రాహుల్ ఆడతాడని అనుకున్నప్పటికీ.. వాషింగ్టన్ సుందర్ ను దింపుతారని తెలుస్తోంది.

తాను ఆరో స్థానంలో బ్యాటింగ్ చేస్తానంటూ రాహుల్ చెప్పడమే దీనికి కారణం. ఒకవేళ పేస్ ఆల్ రౌండర్ నితీశిరెడ్డిని కూడా బ్యాటింగ్ ఆర్డర్ లో ప్రమోట్ చేసే ఛాన్సుంది. ఇక స్పిన్ ఆల్ రౌండర్లుగా వాషింగ్టన్ సుందర్, రవీంద్ర జడేజా, స్పెషలిస్ట్ స్పిన్నర్ గా కుల్దీప్ యాదవ్ ఉంటారు. పేస్ విభాగంలో బుమ్రాకు రెస్ట్ ఇవ్వడంతో అర్షదీప్సింగ్, హర్షిత్ రాణాలపైనే భారం పడనుంది.

వన్డే ప్రపంచకప్ కోసం కోర్ టీంను రెడీ చేస్తున్న వేళ ఈ సిరీస్ యువ ఆటగాళ్లందరికీ మంచి అవకాశంగా చెప్పొచ్చు. అటు వన్డేల్లో పెద్దగా ఆకట్టుకోని పంత్ కు సైతం ఈ సిరీస్ గోల్డెన్ ఛాన్స్ గా చెప్పొచ్చు. మరోవైపు టెస్ట్ సిరీస్ లో అదరగొట్టిన సౌతాఫ్రికా ఫుల్ జోష్ తో దిగుతోంది. కీపర్ క్వింటన్ డికాక్ జట్టులోకి రావడం, బ్రెవిస్ లాంటి హిట్టర్ కూడా ఎంట్రీ ఇవ్వడంతో సఫారీ జట్టు కూడా బలంగానే ఉంది. బౌలింగ్ లో బర్గర్, ఎంగ్డితో పాటు మార్కో యెన్సన్లపై అంచనాలున్నాయి.

గత రికార్డులను చూస్తే వన్డేల్లో భారత్ పై సౌతాఫ్రికా(Ind Vs Sa)దే పైచేయిగా ఉంది. ఇప్పటి వరకూ ఇరు జట్లు 94 మ్యాచ్ లలో తలపడితే సౌతాఫ్రికా 51 విజయాలు సాధించింది. భారత్ 40 వన్డేల్లో గెలిస్తే, 3 మ్యాచ్ లలో ఫలితం తేలలేదు. ఇక రాంచీ పిచ్ పై పేసర్ల కంటే స్పిన్నర్లకే అడ్వాంటేజ్ ఉంటుంది. బ్లాక్ సాయిల్ పిచ్ కావడంతో స్లో బౌలర్లు కీలకం కాబోతున్నారు. ఇక్కడ జరిగిన 9 వన్డేల్లో ఐదుసార్లు ఛేజింగ్ జట్లే గెలవగా.. మూడుసార్లు మొదట బ్యాటింగ్ చేసిన జట్లు గెలిచాయి.

మరిన్ని స్పోర్ట్స్ న్యూస్ కోసం ఇక్కడ క్లిక్ చేయండి