Virat Kohli
చరిత్రను సృష్టించాలన్నా అతడే(Virat Kohli).. చరిత్రను తిరగరాయాలన్నా అతడే.. టీమిండియా స్టార్ క్రికెటర్ విరాట్ కోహ్లీ(Virat Kohli)కి ఈ డైలాగ్ సరిగ్గా సరిపోతుంది. ప్రపంచ క్రికెట్ లో రికార్డులకు చిరునామా అనగానే గుర్తొచ్చే పేరు సచిన్ టెండూల్కర్… క్రికెట్ గాడ్ తర్వాత ఆ స్థాయిలో రికార్డుల మోత మోగించింది కోహ్లీనే… సచిన్ సాధించిన ఎన్నో రికార్డులను బ్రేక్ చేస్తూనే ఉన్నాడు.
టీ20, టెస్ట్ ఫార్మాట్ కు గుడ్ బై చెప్పడంతో ప్రస్తుతం వన్డే ఫార్మాట్ లో మాత్రమే కొనసాగుతున్నాడు. రిటైర్మెంట్ కు చేరువల్లో ఉన్నా కోహ్లీ పరుగుల దాహం తీరలేదు.. రికార్డుల వేట ఆగలేదు.. కాదు కాదు ఈ వేట ఆగబోదంటూ మరోసారి చాటిచెప్పాడు. రాంఛీ వేదికగా జరిగిన తొలి వన్డేలో సౌతాఫ్రికాపై వింటేజ్ విరాట్ అంటే ఏంటో చూపించాడు. కింగ్ ఈజ్ బ్యాక్ తరహాలో సెంచరీతో రెచ్చిపోయాడు. ఆరంభం నుంచీ దూకుడుగా ఆడుతూ భారీ షాట్లతో విరుచుకుపడ్డాడు.
తనలో ఆట ఇంకా చాలా ఉందనేలా విరాట్ ఇన్నింగ్స్ సాగింది. ఇప్పటి వరకూ ఒక లెక్క.. ఇప్పటి నుంచీ మరొక లెక్క అన్న తరహాలో ఇటీవల ఆసీస్ టూర్ లో చివరి వన్డేలో ఫామ్ లోకి వచ్చిన కోహ్లీ ఇప్పుడు సఫారీలతో సిరీస్ ను శతకంతో మొదలుపెట్టాడు.
ఈ క్రమంలో పలు రికార్డులను ఖాతాలో వేసుకున్నాడు. ఈ మ్యాచ్ లో సెంచరీతో రెచ్చిపోయిన విరాట్ వన్డేల్లో అత్యధిక సెంచరీలు చేసిన క్రికెటర్ గా చరిత్ర సృష్టించాడు. ఇప్పటి వరకూ సచిన్ 51 సెంచరీలతో ఉండగా.. కోహ్లీ ఆ రికార్డును బ్రేక్ చేశాడు. అలాగే ఏ ఫార్మాట్ లోనూ 52 శతకాలు ఎవ్వరూ చేయలేదు. అటు సౌతాఫ్రికాపై అత్యధిక సెంచరీలు చేసిన భారత క్రికెటర్ గానూ ఘనత సాధించాడు.
సఫారీలపై కోహ్లీ(Virat Kohli) చేసిన సెంచరీలు ఇప్పుడు 6కు చేరింది. అలాగే భారత్, సౌతాఫ్రికా మధ్య జరిగిన సిరీస్ లో అత్యధిక రన్స్ చేసిన ఘనత కూడా ఇప్పుడు కోహ్లీకే దక్కింది. ఇప్పటి వరకూ కల్లిస్ పేరిట ఉన్న ఈ రికార్డును ఇప్పుడు విరాట్ బ్రేక్ చేశాడు. కాగా ఈ మ్యాచ్ లో కోహ్లీ 103 బంతుల్లో సెంచరీ పూర్తి చేసుకున్నాడు. అంతర్జాతీయ క్రికెట్ లో రన్ మెషీన్ కు ఇది 83వ సెంచరీ.
2027 ప్రపంచకప్ ఆడడమే టార్గెట్ పెట్టుకున్న కోహ్లీ ఇప్పుడు ఫుల్ టచ్ లోకి వచ్చేశాడు. సఫారీ బౌలర్లపై కోహ్లీ ఎదురుదాడికి దిగిన తీరు గత విరాట్ ను గుర్తు చేసింది. వయసు మీదపడుతున్నా జోరు తగ్గని విరాట పర్వం స్పష్టంగా కనిపించింది. ముఖ్యంగా సెంచరీ పూర్తయిన వెంటనే వరుసగా 4,6,6,4 షాట్లు కొట్టిన తీరు చూస్తే ఎవ్వరైనా సరే ఫిదా అవ్వాల్సిందే. గతంలో ఎన్నోసార్లు ఇలాంటి సెంచరీలు చేసినప్పటకీ ఇప్పుడు కోహ్లీ శతక్కొట్టిన తీరు చూస్తే వచ్చే ప్రపంచకప్ ఆడడం ఖాయంగా కనిపిస్తోంది.
