Revanth Reddy’s comments: దేవుళ్లపై మనకు ఏకాభిప్రాయం లేదు.. రేవంత్ రెడ్డి వ్యాఖ్యలతో నెట్టింట రాజకీయ, సామాజిక చర్చ

Revanth Reddy’s comments

తెలంగాణ ముఖ్యమంత్రి, టీపీసీసీ అధ్యక్షులు రేవంత్ రెడ్డి(Revanth Reddy) ఇటీవల గాంధీ భవన్‌లో జరిగిన తెలంగాణ రాష్ట్ర కాంగ్రెస్ కమిటీ (పీసీసీ) సమావేశంలో చేసిన వ్యాఖ్యలు రాష్ట్ర రాజకీయాల్లో, ముఖ్యంగా సోషల్ మీడియాలో పెద్ద సంచలనం సృష్టించాయి. పార్టీలో ఏకాభిప్రాయం లోపించడంపై చర్చ జరుగుతున్న సందర్భంలో, రేవంత్ రెడ్డి ఈ విషయాన్ని దేవుళ్లపై ఉన్న భిన్నమైన నమ్మకాలతో పోల్చడం చర్చనీయాంశమైంది.

సీఎం రేవంత్ రెడ్డి (Revanth Reddy)ప్రసంగిస్తూ.. “దేవుళ్ల మీదనే మనకు ఏకాభిప్రాయం లేనప్పుడు, పార్టీలో ఉన్న ఇంతమందికి (భిన్న మనస్తత్వాలు కలిగిన నాయకులకు) ఎలా ఉంటుంది?” అంటూ ప్రశ్న వేశారు. దీనికి కొనసాగింపుగా, హిందూ ధర్మంలోని భిన్నత్వాన్ని ఆయన ఉదహరించారు. హిందువులకు 33 కోట్ల మంది దేవతలున్నారని, పెళ్లికాని యువత హనుమంతుడిని కొలిస్తే, పెళ్లి చేసుకున్న వారు మరొక దేవుడిని పూజిస్తారని అన్నారు.

కొంతమంది అయ్యప్ప మాల, ఇంకొంతమంది శివ మాల ధరిస్తారని, అలాగే మద్యపానం చేసేవారు, మాంసాహారులు, శాకాహారులు.. ఇలా ఒక్కొక్కరు ఒక్కో దైవాన్ని ఆరాధిస్తారని పేర్కొన్నారు. దేవుళ్ల విషయంలోనే ఇంత వైవిధ్యం, ఏకాభిప్రాయం లోపించినప్పుడు, తమ పార్టీలో అన్ని రకాల మనస్తత్వాలున్న నాయకుల మధ్య వంద శాతం ఏకాభిప్రాయం ఉండాలంటే సాధ్యమేనా? అని ప్రశ్నించారు. ఈ వ్యాఖ్యలకు సంబంధించిన వీడియో ప్రస్తుతం నెట్టింట వైరల్ అవుతోంది.

సీఎం రేవంత్ రెడ్డి వ్యాఖ్యలు(Revanth Reddy’s comments) బయటకు రాగానే నెటిజన్లు, ప్రతిపక్ష పార్టీల నాయకులు పలు రకాలుగా స్పందించారు. కొందరు ఈ వ్యాఖ్యలు హిందువులను, వారి నమ్మకాలను అవమానించేలా ఉన్నాయని విమర్శలు వినిపిస్తున్నాయి. మరికొందరు మాత్రం, హిందూ ధర్మంలోని వైవిధ్యం, భిన్నమైన ఆరాధనా పద్ధతుల గురించి ఆయన నిజమే మాట్లాడారని, దానిని రాజకీయం చేయాల్సిన అవసరం లేదని మద్దతు పలికారు.

అయితే ఇప్పుడు సీఎం రేవంత్ రెడ్డి లేవనెత్తిన అంశం అత్యంత సున్నితమైంది, చర్చనీయాంశమైంది కూడా. ఇతర మతాల్లో (ఉదాహరణకు, క్రైస్తవులు యేసుక్రీస్తును, ముస్లింలు అల్లాను) దైవాన్ని లేదా ప్రవక్తను అవమానించినా, అగౌరవపరిచినా తీవ్ర ప్రతిఘటన ఉంటుంది. కానీ హిందూ ధర్మంలో తరచుగా కనిపించే ఒక విచిత్ర ధోరణి… ‘ఆత్మావహేళన’ (Self-deprecating humor/criticism).

గణేష్ ఉత్సవాల వంటి పండుగలలోనూ, భక్తిని నింపాల్సిన మండపాలలో కూడా, సాంప్రదాయ రూపానికి భిన్నంగా వ్యంగ్యభరితమైన, విభిన్నమైన గణేశుడి విగ్రహాలను పెట్టి దానికి ‘క్రియేటివిటీ’ అని పేరు పెట్టుకోవడం సర్వసాధారణమైంది. నిజానికి, ఈ పద్ధతి కొందరికి వినోదాన్నిచ్చినా, దైవాన్ని పూజించే స్థానంలో వ్యంగ్యాన్ని చొప్పించడం పట్ల సాంప్రదాయవాదులు అభ్యంతరం వ్యక్తం చేస్తుంటారు.

ఆస్తికులు, నాస్తికులు అన్న అంశాన్ని పక్కన పెడితే.. దేవుడిని నమ్మేవారిలోనే ‘మా దేవుడు గొప్ప, మీ దేవుడు తక్కువ’ అనే తులనాత్మక భావన లేదా, తమ దేవుళ్లపై తామే జోకులు వేసుకుని నవ్వుకునే సంస్కృతి పెరిగిపోయింది. ఈ అతి స్వేచ్ఛ, స్వీయ విమర్శ సంస్కృతి హిందూ ధర్మానికి ఉన్న సహజమైన ‘భౌద్ధికత’ (Intellectualism), అపారమైన ‘సహనం’ (Tolerance) నుంచి వచ్చిందే అయినా కూడా, ఇది కొన్నిసార్లు అవమానకరంగా పరిణమించే అవకాశం ఉంది.

సీఎం రేవంత్ రెడ్డి వ్యాఖ్యలు కూడా హిందూ ధర్మంలోని అంతర్గత వైవిధ్యాన్ని ఎత్తిచూపడం ద్వారా, కాంగ్రెస్ పార్టీలోని భిన్నత్వానికి ఓ రాజకీయ సమర్థన ఇవ్వడానికి చేసిన ప్రయత్నంగానే విశ్లేషకులు భావిస్తున్నారు. ఈ వ్యాఖ్యలు మతాల మధ్య పోలికలు తీసుకురాకపోయినా, హిందూ మతంలోని వైవిధ్యమే ఈ వివాదానికి మూలమైంది.

మరిన్ని తెలంగాణ వార్తల కోసం ఇక్కడ క్లిక్ చేయండి