Revanth
తెలంగాణలో జరగాల్సిన స్థానిక సంస్థల ఎన్నికల ప్రక్రియకు హైకోర్టు బ్రేక్ వేసింది. రేవంత్ రెడ్డి(Revanth) ప్రభుత్వం బీసీలకు 42 శాతం రిజర్వేషన్లు కల్పిస్తూ జారీ చేసిన జీవో నెంబర్ 9 పై న్యాయస్థానం స్టే విధించడంతో, ఈ ఎన్నికల నోటిఫికేషన్ నిలిచిపోయింది. ప్రభుత్వం ఇచ్చిన ఈ జీవో రాజ్యాంగ నిబంధనలకు విరుద్ధమంటూ హైకోర్టులో దాఖలైన పిటిషన్లపై జరిగిన విచారణలో ఈ కీలక ఆదేశాలు వెలువడ్డాయి.
విచారణ సందర్భంగా, అడ్వకేట్ జనరల్ సుదర్శన్ రెడ్డి, పిటిషనర్ల తరఫు న్యాయవాది రవివర్మ తమ వాదనలు వినిపించారు. జీవో నెంబర్ 9 ను వ్యతిరేకిస్తూ దాఖలైన పిటిషన్లపై విచారణ జరిపిన న్యాయస్థానం, సుప్రీంకోర్టు విధించిన 50 శాతం రిజర్వేషన్ల పరిమితి నిబంధనలను, జీవోలోని అంశాలను పరిశీలించింది. న్యాయవాది రవివర్మ వాదిస్తూ, రిజర్వేషన్లు 50 శాతం మించకూడదని రాజ్యాంగంలో ఎక్కడా లేదని, ప్రత్యేక పరిస్థితుల్లో రిజర్వేషన్లను పెంచుకునే అధికారం రాష్ట్ర ప్రభుత్వానికి ఉంటుందని కోర్టు దృష్టికి తీసుకువెళ్లారు. అయితే, ప్రభుత్వం ఇచ్చిన 42 శాతం రిజర్వేషన్ల పెంపునకు గల సరైన కారణాలను, ట్రిపుల్ టెస్ట్ వంటి అంశాలను బలంగా నిరూపించలేకపోయిందని కోర్టు భావించింది.
ఫలితంగా, జీవో నెంబర్ 9పై స్టే కొనసాగించాలని హైకోర్టు స్పష్టం చేసింది. ఈ జీవో ఆధారంగానే ఎన్నికల నోటిఫికేషన్ విడుదల కావడంతో, ఆ నోటిఫికేషన్‌పై కూడా స్టే కొనసాగినట్లే అవుతుందని న్యాయస్థానం తేల్చిచెప్పింది. హైకోర్టు ఈ విచారణను నాలుగు వారాలకు వాయిదా వేస్తూ, ఈ లోపు రిజర్వేషన్లు పెంచడానికి గల పూర్తి వివరాలతో కూడిన కౌంటర్ అఫిడవిట్‌ను కోర్టుకు సమర్పించాలని తెలంగాణ ప్రభుత్వాన్ని ఆదేశించింది.
కోర్టు ఆదేశాలతో రాష్ట్రంలో స్థానిక సంస్థల ఎన్నికలు వాయిదా పడటం అనివార్యంగా మారింది. ఈ పరిణామంపై రాష్ట్ర ఎన్నికల సంఘం కూడా స్పందించింది. కోర్టు స్టే ఆర్డర్‌ను పూర్తిగా పరిశీలించిన తర్వాతే ఎన్నికల నిర్వహణపై తుది నిర్ణయం ప్రకటిస్తామని తెలిపింది. ప్రభుత్వం ఇప్పుడు కోర్టులో సమగ్రమైన కౌంటర్ దాఖలు చేస్తుందా, లేక డివిజన్ బెంచ్‌కు వెళ్తుందా అనేది రాష్ట్ర రాజకీయాల్లో ఉత్కంఠభరితంగా మారింది. ఈ న్యాయపరమైన సవాళ్లను ప్రభుత్వం ఏ విధంగా అధిగమిస్తుందనేది వేచి చూడాలి.
Tejashwi Yadav: ఇంటికో ప్రభుత్వ ఉద్యోగం తేజస్వీ యాదవ్ సంచలన ప్రకటన
-
-
-
-
