Asteroid
అంతరిక్ష పరిశోధనలపై నాసా (NASA) తాజాగా వెల్లడించిన ప్రకారం, OSIRIS-REx మిషన్ సేకరించిన అసలు బెన్యూ గ్రహశకలం (Asteroid Bennu) నమూనాలు ప్రస్తుతం హ్యూస్టన్‌లోని జాన్సన్ స్పేస్ సెంటర్ ల్యాబ్‌లో అత్యంత సురక్షితంగా ఉన్నాయి. ఈ మిషన్ ఇప్పుడు శాస్త్రవేత్తలు నమూనాలను లోతుగా పరీక్షిస్తున్న అత్యంత సున్నితమైన దశలోకి ప్రవేశించింది.
2023 సెప్టెంబర్ 24న యుటా ఎడారిలో OSIRIS-REx రిటర్న్ క్యాప్సూల్ విజయవంతంగా దిగిన తర్వాత, నమూనాలను జాగ్రత్తగా నాసా జాన్సన్ సెంటర్‌లోని కొత్త Astromaterials Research and Exploration Science (ARES) ల్యాబ్‌కు తరలించారు. ఈ ల్యాబ్ ప్రత్యేకంగా రూపొందించిన గ్లౌవ్‌బాక్స్‌లతో, ఎలాంటి గాలి లేదా భూమి ధూళి కలవకుండా నమూనాలను సంరక్షిస్తోంది.
ల్యాబ్‌లో మొదటి రెండు వారాల్లో చేసిన పరీక్షల్లోనే కీలకమైన ఫలితాలు వెలువడ్డాయి. నమూనాలలో కార్బన్ ,నీటి మాలిక్యూల్స్ ఉన్నట్లు స్పష్టంగా నిర్ధారించబడింది. తాజాగా నాసా శాస్త్రవేత్తల ప్రకారం, ఈ సమ్మేళనాలు జీవం పుట్టుకకు మూలమైన పదార్థాలు ఎలా ఏర్పడ్డాయో, భూమిపై జీవం ఎలా ప్రారంభమైందో తెలుసుకోవటానికి కీలకమైన సూచనలు అందిస్తాయి. ఈ శిలల వయస్సు సుమారు 4.5 బిలియన్ సంవత్సరాలు అని, ఇవి సౌర వ్యవస్థ ఆరంభ దశలో రూపుదిద్దుకున్న అత్యంత ప్రాచీన పదార్థాలుగా విశ్లేషించబడ్డాయి.
OSIRIS-REx సేకరించిన ఈ నమూనాలు భూమికి తీసుకొచ్చిన వాటిలో అతి పెద్ద కార్బన్ సమృద్ధిగా ఉన్న ఆస్టరాయిడ్(Asteroid) సాంపిల్స్ అని నాసా పేర్కొంది. దీని బరువు 121.6 గ్రాములు (4.29 ఔన్సులు) ఉండగా, మొదట నిర్దేశించిన లక్ష్యం (60 గ్రాములు) కంటే ఇది దాదాపు రెండింతలు ఎక్కువ. కనీసం 70% నమూనా భాగం శాశ్వతంగా సంరక్షించబడి, తదుపరి శతాబ్దాలపాటు అంతర్జాతీయ శాస్త్రవేత్తలకు విశ్లేషణ కోసం అందుబాటులో ఉంచబడుతుంది. స్కానింగ్ ఎలక్ట్రాన్ మైక్రోస్కోప్, ఇన్‌ఫ్రారెడ్ స్పెక్ట్రమీటర్, ఎక్స్-రే డిఫ్రాక్షన్, 3D టోమోగ్రఫీ వంటి అత్యాధునిక సాంకేతిక పరిజ్ఞానం ద్వారా ఈ రాళ్ల పూర్వకల్పన పరిశీలించబడుతోంది.
OSIRIS-REx మిషన్ యొక్క శాస్త్రీయ లక్ష్యం మూడు ప్రధాన దిశల్లో ఉంది. దీని ప్రధాన లక్ష్యం భూమిపై జీవం ఎలా ఏర్పడింది అనే ప్రశ్నకు జవాబు వెతకడమే.
జీవం పుట్టుకకు మూలాలు.. బెన్యూ నమూనాల్లో కార్బన్, నీటి సమ్మేళనాలు ఉండటంతో, ఇవి ప్రీబయోటిక్ కెమిస్ట్రీ (జీవం పుట్టకముందే ఉన్న కార్బన్ ఆధారిత రాసాయన సంబంధాలు)ని తెలుసుకోవడానికి సహాయపడతాయి. గ్రహశకలాలు భూమికి నీరు మరియు జీవ పదార్థాలను తీసుకువచ్చాయా? అనే సూత్రాన్ని పరీక్షించడానికి ఇవి కీలకం.
సౌర వ్యవస్థ ఆరంభ చరిత్ర.. సుమారు 4.5 బిలియన్ సంవత్సరాల వయస్సు గల ఈ నమూనాలు, సౌర నెబ్యులా ప్రారంభ పరిస్థితులను తెలియజేస్తాయి. ఇది మానవాళికి “సౌర వ్యవస్థ సమయ కాప్సూల్ లా ఉపయోగపడుతుంది.
గ్రహశకలాల భౌతిక లక్షణాలు, నివారణ చర్యలు.. బెన్యూ వంటి గ్రహశకలాల ఖనిజ సాంద్రత, రసాయన మిశ్రమాలు తెలుసుకుంటే భవిష్యత్తులో వాటి ఖనిజాల మైనింగ్ అవకాశాలను అంచనా వేయొచ్చు. అంతేకాకుండా, దీనిపై యార్కోవ్‌స్కీ ఎఫెక్ట్ (సూర్య కిరణాల వలన మార్గంలో జరిగే సూక్ష్మ మార్పు) మ్యాపింగ్ జరిగింది. దీని ద్వారా భవిష్యత్తులో భూమిని తాకే అవకాశం ఉన్న ఆస్టరాయిడ్స్‌ను impact mitigation missions ద్వారా ముందుగా రక్షించడానికి అవకాశం ఏర్పడుతుంది.
రాబోయే ఒక సంవత్సరం వరకు నాసా, జాక్సా (JAXA-జపాన్), కెనడియన్ స్పేస్ ఏజెన్సీ జాయింట్ టీమ్స్‌తో అంతర్జాతీయ స్థాయిలో ఈ నమూనాల విశ్లేషణ కొనసాగుతుంది. 2026లో ఈ పరిశోధన ఫలితాలను ఆస్ట్రోబయాలజీ , గ్రహ విజ్ఞాన రంగాల్లో ఉపయోగించబోతున్నారు.
