Library: లక్షలాది గ్రంథాలు ఎలా కనుమరుగయ్యాయి? మిస్టరీగా ఆ లైబ్రరీ

Library

పురాతన ప్రపంచంలో జ్ఞానానికి,విజ్ఞానానికి చిరునామా అలెగ్జాండ్రియా లైబ్రరీ (Library of Alexandria). ఈజిప్ట్‌లోని అలెగ్జాండ్రియా నగరంలో క్రీ.పూ 3వ శతాబ్దంలో టాలెమీ రాజవంశం ద్వారా స్థాపించబడిన ఈ గ్రంథాలయం, ప్రపంచంలోని ప్రతీ విషయంపై రాసిన లక్షలాది తాళపత్ర గ్రంథాలను నిక్షిప్తం చేసింది.
ఇది కేవలం పుస్తకాల కేంద్రం మాత్రమే కాదు, యూక్లిడ్ (రేఖాగణిత పితామహుడు), ఆర్కిమెడిస్ (గణిత మేధావి), ఎరటోస్తనీస్ (భూమి చుట్టుకొలతను కనుగొన్న వ్యక్తి) వంటి గొప్ప మేధావులందరూ ఇక్కడే పరిశోధనలు, చర్చలు చేశారు. ఈ లైబ్రరీ అప్పటి ప్రపంచానికి ఒక విజ్ఞాన కేంద్రంగా (The Museion) వెలుగొందింది.

అయితే, ఈ అపారమైన జ్ఞాన నిధి ఏమైంది? లైబ్రరీ ఎలా పతనమైంది? అనేది నేటికీ పూర్తిగా తేలని ఒక చరిత్ర మిస్టరీ! దీని పతనం వెనుక అనేక సిద్ధాంతాలు ప్రచారంలో ఉన్నాయి. అత్యంత ప్రజాదరణ పొందిన సిద్ధాంతం ఏమిటంటే, రోమన్ చక్రవర్తి జూలియస్ సీజర్ క్రీ.పూ 48లో అలెగ్జాండ్రియాపై దాడి చేసినప్పుడు, జరిగిన యుద్ధంలో ఈ గ్రంథాలయం తగలబడిపోయిందని. అయితే, కేవలం ఒకే ఒక్క అగ్నిప్రమాదంలో అంత పెద్ద గ్రంథాలయం పూర్తిగా నాశనం కాలేదని కొంతమంది చరిత్రకారులు భావిస్తున్నారు.

ఈ లైబ్రరీ పతనం అనేది వందల సంవత్సరాల పాటు క్రమంగా, చిన్న చిన్న ఘటనల ద్వారా జరిగిన ఒక చారిత్రక విషాదం అంటున్నారు. కాలక్రమేణా టాలెమీ రాజవంశం క్షీణించడం, నిధులు లేకపోవడం, పరిశోధకులకు రాజుల ప్రోత్సాహం తగ్గడం వంటి కారణాల వల్ల గ్రంథాలయం విలువైన గ్రంథాలను కోల్పోయింది.

ఆ తర్వాత వచ్చిన సైనిక దాడులు, వివిధ మతాలకు చెందిన ప్రజల మధ్య ఏర్పడిన మతపరమైన ఉద్రిక్తతల కారణంగా అనేక విలువైన తాళపత్రాలు ఉద్దేశపూర్వకంగా ధ్వంసం చేయబడ్డాయి. ఈ గ్రంథాలయం నాశనం కావడం వల్ల, వేల సంవత్సరాల పురాతన గ్రీకు, ఈజిప్టు విజ్ఞానం ఎప్పటికీ కనుమరుగైపోయిందని, ఇది మానవ నాగరికతకు జరిగిన అతిపెద్ద నష్టంగా చరిత్రకారులు భావిస్తారు.

మరిన్ని ఇంటర్నేషనల్ వార్తల కోసం ఇక్కడ క్లిక్ చేయండి