Detox
పసుపు పాలు, లేదా ‘గోల్డెన్ మిల్క్’… ఇది కేవలం రంగు, రుచి కోసం కాదు, ఇది తరతరాలుగా మన పూర్వీకులు ఆచరిస్తున్న ఒక అద్భుతమైన ఆరోగ్య రహస్యం. రాత్రి పడుకునే ముందు ప్రతిరోజూ పసుపు పాలు తీసుకోవడం వల్ల మన శరీరంలోని ముఖ్యమైన శుద్ధి కేంద్రాలైన కాలేయం (లివర్) , కిడ్నీలు ఆరోగ్యాన్ని మెరుగుపరచడంలో అద్భుతంగా పనిచేస్తుంది.
పసుపులోని హీరో కర్కుమిన్ (Curcumin)..పసుపునకు బంగారు రంగును ఇచ్చే, దాని ఆరోగ్య ప్రయోజనాలకు ప్రధాన కారణం ‘కర్కుమిన్’ అనే క్రియాశీలక సమ్మేళనం. ఈ కర్కుమిన్ ఒక శక్తివంతమైన యాంటీ ఆక్సిడెంట్, యాంటీ ఇన్ఫ్లమేటరీ ఏజెంట్‌గా పనిచేస్తుంది. ఈ గుణాల వల్లే లివర్, కిడ్నీల ఆరోగ్యం మెరుగుపడుతుంది.
మన శరీరం నుంచి విషాలను (Toxins) తొలగించే కీలక బాధ్యత లివర్‌ది.
విషాల తొలగింపు (Detoxification).. కాలేయం విష పదార్థాలను రెండు దశలలో శుద్ధి చేస్తుంది. ఈ ప్రక్రియకు యాంటీ ఆక్సిడెంట్లు చాలా అవసరం. కర్కుమిన్ కాలేయం యొక్క యాంటీ ఆక్సిడెంట్ స్థాయిని పెంచి, ఈ శుద్ధి ప్రక్రియను సమర్థవంతంగా నిర్వహించడానికి సహాయపడుతుంది.
ఫ్యాటీ లివర్ నివారణ.. జీవనశైలి కారణంగా ఏర్పడే ఫ్యాటీ లివర్ సమస్యను తగ్గించడంలో కర్కుమిన్ ముఖ్యపాత్ర పోషిస్తుంది. ఇది కాలేయ కణాలలో కొవ్వు పేరుకుపోకుండా నిరోధిస్తుంది. అలాగే ఇప్పటికే పేరుకున్న కొవ్వును విచ్ఛిన్నం చేయడంలో సహాయపడుతుంది.
కిడ్నీలు మన శరీరంలోని రక్తంలోని వ్యర్థాలను వడపోసి, ద్రవ సమతుల్యతను కాపాడతాయి.
నొప్పి, వాపు తగ్గింపు.. కిడ్నీల ఆరోగ్యం క్షీణించడానికి ప్రధాన కారణం దీర్ఘకాలిక వాపు (Chronic Inflammation). పసుపు పాలు నిరంతరం తీసుకోవడం వల్ల కర్కుమిన్ ఈ వాపును తగ్గించి, కిడ్నీ కణాలను దెబ్బతినకుండా రక్షిస్తుంది.
రక్తపోటు నియంత్రణ.. కిడ్నీ పనితీరుపై రక్తపోటు ప్రభావం చాలా ఉంటుంది. పసుపు పాలలోని యాంటీ ఇన్ఫ్లమేటరీ గుణాలు రక్తనాళాలను ఆరోగ్యంగా ఉంచి, రక్తపోటును నియంత్రించడంలో పరోక్షంగా సహాయపడతాయి, దీని ద్వారా కిడ్నీలపై భారం తగ్గుతుంది.
పసుపు పాలను మరింత ప్రభావవంతం చేయడానికి, దానిలో చిటికెడు నల్ల మిరియాల పొడిని కలిపి తాగాలి. నల్ల మిరియాలలో ఉండే పైపెరిన్ (Piperine) అనే సమ్మేళనం, కర్కుమిన్‌ను శరీరం గ్రహించే సామర్థ్యాన్ని (Bioavailability) 20 రెట్లు పెంచుతుంది. ప్రతిరోజూ రాత్రి ఈ ‘గోల్డెన్ మిల్క్’ తాగడం వల్ల నిద్ర కూడా బాగా పడుతుంది.
