Karnataka politics
కర్ణాటకలో కొంతకాలంగా నెలకొన్న ముఖ్యమంత్రి మార్పుపై రాజకీయ రసవత్తర(Karnataka politics) వాతావరణానికి తెరపడింది. ఈ విషయంలో నెలకొన్న సస్పెన్స్ ఎట్టకేలకు వీడుతూ, కాంగ్రెస్ అధిష్టానం ఆదేశాలతో ముఖ్యమంత్రి సిద్దరామయ్య (Siddaramaiah), ఉపముఖ్యమంత్రి డి.కె. శివకుమార్ (DK Shivakumar) మధ్య ఇవాళ ఉదయం జరిగిన ‘బ్రేక్‌ఫాస్ట్’ భేటీ ఫలితాలు వెల్లడయ్యాయి.
భేటీ తర్వాత నిర్వహించిన పత్రికా సమావేశంలో ముఖ్యమంత్రి సిద్దరామయ్య మాట్లాడుతూ.. తమ ఇద్దరినీ ఏఐసీసీ (AICC) జనరల్ సెక్రటరీ కె.సి. వేణుగోపాల్ (KC Venugopal) బ్రేక్‌ఫాస్ట్‌కు ఆహ్వానించారని తెలిపారు. నెల రోజులుగా ముఖ్యమంత్రి మార్పుపై ప్రజల్లో నెలకొన్న గందరగోళం, వదంతులపై ఆయన స్పందించారు.
ముఖ్యమంత్రి మార్పు విషయం పూర్తిగా అధిష్టానం చేతిలో ఉందని స్పష్టం చేస్తూ, తాము అసెంబ్లీ ఎన్నికల్లో ఎలా కలిసికట్టుగా పోరాడామో, ఇప్పుడు కూడా ఇద్దరం అలానే ఐక్యంగా ఉన్నామని నొక్కి చెప్పారు. ఈ వదంతులను భారతీయ జనతా పార్టీ (BJP), జనతాదళ్ (సెక్యులర్) (JDS), మీడియా కావాలనే వ్యాప్తి చేస్తున్నాయని ఆయన ఆరోపించారు.
సిద్దరామయ్య మాట్లాడుతూ, తమ ప్రధాన లక్ష్యం 2028లో కూడా కాంగ్రెస్ పార్టీని(Karnataka politics) తిరిగి అధికారంలోకి తీసుకురావడమేనని తెలిపారు. తమ ప్రభుత్వంపై అవిశ్వాసం (No Confidence Motion) పెట్టడం అసాధ్యమని ఆయన ధీమా వ్యక్తం చేశారు. డిప్యూటీ సీఎం డీకే శివకుమార్‌తో తనకు ఎలాంటి భేదాభిప్రాయాలు లేవని, ఇక ముందు కూడా ఉండబోవని స్పష్టం చేశారు. రాబోయే 2028 అసెంబ్లీ ఎన్నికలు , లోకల్ బాడీ ఎన్నికలు తమకు ముఖ్యమని, ఇద్దరం కలిసికట్టుగా బీజేపీపై పోరాడతామని ఆయన ప్రకటించారు.
ఇక ఉపముఖ్యమంత్రి డీకే శివకుమార్ మాట్లాడుతూ, తాము పార్టీకి నమ్మకమైన సైనికులమని అన్నారు. నాయకత్వ విషయంలో పార్టీ అధిష్ఠానం చెప్పిందే ఫైనల్ అని, వారు ఏమి చెప్పినా అదే తమ నిర్ణయమని కుండబద్దలు కొట్టారు. దేశంలో పార్టీ కష్ట కాలం ఎదుర్కొంటోందనే విషయం తమకు తెలుసని పేర్కొన్నారు.
అయితే, కర్ణాటకలో తమ ప్రభుత్వం 2028లో మళ్లీ అధికారంలోకి వచ్చి, 2029లో మల్లికార్జున ఖర్గే (Mallikarjuna Kharge), రాహుల్ గాంధీ (Rahul Gandhi) నాయకత్వంలో ముందుకు సాగుతుందనే ఆత్మవిశ్వాసాన్ని వ్యక్తం చేశారు. గత ఎన్నికల్లో కర్ణాటక ప్రజలు తమకు భారీ మెజారిటీ ఇచ్చారని, ప్రజలకు ఇచ్చిన హామీలన్నీ నెరవేర్చడం తమ బాధ్యత అని డీకే శివకుమార్ ఉద్ఘాటించారు.
