Investments:రైజింగ్ తెలంగాణ సమ్మిట్‌లో పెట్టుబడుల వెల్లువ..ఒక్క రోజులోనే రికార్డు

Investments

తెలంగాణ రాష్ట్ర ఆర్థిక వ్యవస్థను 2047 నాటికి త్రి ట్రిలియన్ డాలర్ల స్థాయికి తీసుకెళ్లాలనే ముఖ్యమంత్రి రేవంత్ రెడ్డి మహా సంకల్పంతో ప్రారంభమైన తెలంగాణ రైజింగ్ గ్లోబల్ సమ్మిట్ 2025 తొలి రోజే చరిత్ర సృష్టించింది. దేశవిదేశీ ప్రతినిధులు, దిగ్గజ పారిశ్రామికవేత్తల సమక్షంలో జరిగిన ఈ సమ్మిట్‌లో ఊహించని విధంగా భారీగా పెట్టుబడులు(Investments) వెల్లువెత్తాయి.

సమ్మిట్‌లో మొదటి రోజు అత్యధికంగా పెట్టుబడులు(Investments) విద్యుత్ రంగంలో నమోదయ్యాయి. కేవలం ఒక్క రోజు వ్యవధిలోనే రాష్ట్ర ప్రభుత్వం వివిధ కంపెనీలతో ఏకంగా రూ.2 లక్షల కోట్ల పెట్టుబడులకు సంబంధించిన ఒప్పందాలను (MoUs) కుదుర్చుకుంది. ఈ భారీ పెట్టుబడులన్నీ ప్రధానంగా అత్యాధునిక పంప్డ్ స్టోరేజీ ప్రాజెక్టుల్లో పెట్టడానికి కంపెనీలు అంగీకరించాయి.

ఇది పగటిపూట సౌరశక్తి లేదా గాలి శక్తి ద్వారా ఉత్పత్తి అయిన అదనపు విద్యుత్తును నీటిని పైకి పంప్ చేయడం ద్వారా నిల్వ చేసే విధానం. రాత్రిపూట లేదా డిమాండ్ ఉన్నప్పుడు ఆ నీటిని తిరిగి కిందకి వదలడం ద్వారా టర్బైన్లను తిప్పి విద్యుత్తును ఉత్పత్తి చేస్తారు. భవిష్యత్తులో స్థిరమైన, నిరంతరాయమైన విద్యుత్ సరఫరాకు ఈ టెక్నాలజీ చాలా కీలకం.

తెలంగాణను గ్రీన్ ఎనర్జీ రంగంలో అగ్రగామిగా నిలపాలనే లక్ష్యంతో రేవంత్ సర్కార్ ఈ ప్రాజెక్టులపై దృష్టి సారించింది. ఈ పెట్టుబడులతో రాష్ట్రంలో విద్యుత్ నిల్వ సామర్థ్యం గణనీయంగా పెరుగుతుంది.

ఈ సమ్మిట్‌లో మైహోమ్ గ్రూప్ అనుబంధ సంస్థ అయిన మైహోమ్ పవర్ ప్రైవేట్ లిమిటెడ్ రాష్ట్రంలో భారీ పెట్టుబడులు పెట్టేందుకు సిద్ధమైంది.
మైహోమ్ పవర్ రూ.7 వేల కోట్ల పెట్టుబడిని ప్రకటించింది.

ఈ పెట్టుబడిని పంప్డ్ స్టోరేజ్ మరియు సోలార్ పవర్ ప్లాంట్స్ (సౌర విద్యుత్ కేంద్రాలు) ఏర్పాటు కోసం వినియోగించనున్నారు.

ఈ మైహోమ్ పవర్ పెట్టుబడుల ద్వారా రాష్ట్రంలో ఏకంగా 12,500 మందికి ప్రత్యక్షంగా, పరోక్షంగా ఉద్యోగ అవకాశాలు లభించనున్నాయి. ముఖ్యంగా యువతకు, ఇంజనీరింగ్ గ్రాడ్యుయేట్లకు ఈ రంగంలో మెరుగైన ఉపాధి దొరకనుంది.

ప్రభుత్వం విజన్ డాక్యుమెంట్‌కు తొలి అడుగు.. తెలంగాణ రైజింగ్ గ్లోబల్ సమ్మిట్ లక్ష్యం కేవలం పెట్టుబడులను ఆకర్షించడమే కాదు, రాష్ట్ర ‘విజన్ 2047’ (త్రి ట్రిలియన్ డాలర్ల ఆర్థిక వ్యవస్థ లక్ష్యం)ను ప్రపంచానికి ఆవిష్కరించడం. తొలి రోజే రెండు లక్షల కోట్ల పెట్టుబడులు రావడం అనేది ప్రభుత్వం యొక్క ఈ విజన్ డాక్యుమెంట్‌పై ప్రపంచవ్యాప్తంగా ఉన్న కంపెనీలకు ఉన్న నమ్మకాన్ని సూచిస్తుంది.

తెలంగాణ అభివృద్ధిని రాష్ట్రాల స్థాయిలో కాకుండా, ప్రపంచంలోని అభివృద్ధి చెందిన దేశాల స్థాయికి తీసుకెళ్లాలనే ముఖ్యమంత్రి సంకల్పానికి ఈ పెట్టుబడులు తొలి రోజే బలం చేకూర్చాయి. ఈ సమ్మిట్ యొక్క రెండవ రోజున కూడా ఇతర రంగాలైన ఐటీ, ఫార్మా, మౌలిక సదుపాయాలు , ఏరోస్పేస్ వంటి రంగాలలో మరిన్ని భారీ పెట్టుబడుల ఒప్పందాలు నమోదయ్యే అవకాశం ఉంది. ఈ పెట్టుబడుల వెల్లువతో రాష్ట్రంలో పారిశ్రామిక విప్లవం ఊపందుకోవడం ఖాయమని నిపుణులు అభిప్రాయపడుతున్నారు.

మరిన్ని తాజా వార్తల కోసం ఇక్కడ క్లిక్ చేయండి