Wealth :దేశంలో 10% మంది వద్ద 65% సంపద..ఆర్థిక అసమానతల ఉచ్చులో భారత్..నలిగిపోతున్న మధ్యతరగతి

Wealth

ప్రపంచ అసమానత నివేదిక (World Inequality Report) వెల్లడించిన తాజా గణాంకాలు భారతదేశంలో సంపద , ఆదాయ అసమానతలు ఏ స్థాయిలో ఉన్నాయో స్పష్టం చేస్తున్నాయి. ఈ అసమానతల పర్యవసానంగా, దేశ ఆర్థిక వృద్ధిలో కీలక పాత్ర పోషిస్తున్న మధ్యతరగతి (Middle Class) ప్రజలు తీవ్ర ఒత్తిడి, నిరాశకు గురవుతున్నారు. ఒకవైపు సంపన్నులు మరింత సంపద పోగుచేసుకుంటూ, మరోవైపు పేదలు ప్రభుత్వ ఉచిత పథకాలపై ఆధారపడుతుండగా, ఎటూ తేలక ‘నలిగిపోతున్న’ వర్గంగా మధ్యతరగతి మిగిలిపోవడం ఆందోళనకరం అంటున్నారు ఆర్థికనిపుణులు.

అసమానతల తీవ్రత-గణాంకాలు ఏం చెబుతున్నాయంటే..భారతదేశంలో ధనవంతులైన 10 శాతం మంది దేశ సంపద(Wealth)లో ఏకంగా 65 శాతం వాటాను సొంతం చేసుకున్నారు. ఈ సంఖ్య ప్రపంచంలోనే అత్యధిక అసమానతగా నివేదిక పేర్కొంది.

టాప్ 1 శాతం ఆధిపత్యం.. అత్యంత సంపన్నులైన మొదటి 1 శాతం మంది వద్ద దేశ సంపదలో దాదాపు 40 శాతం ఉంది.

దిగువన ఉన్న 50 శాతం.. జనాభాలో దిగువన ఉన్న 50 శాతం మంది వద్ద కేవలం 6.4 శాతం సంపద మాత్రమే ఉంది.

ఆదాయ అసమానత.. సంపద(Wealth)తో పాటు ఆదాయంలోనూ ఇదే పరిస్థితి ఉంది. టాప్ 10 శాతం మంది జాతీయ ఆదాయంలో 58 శాతాన్ని సొంతం చేసుకోగా, దిగువన ఉన్న 50 శాతం మంది 15 శాతం మాత్రమే నిర్వహిస్తున్నారు.

1980వ దశకంలో జాతీయ ఆదాయంలో 40 శాతం వాటా ఎక్కువ జనాభా వద్ద ఉండేది. కానీ, నేడు ఆ జనాభాలో చాలా మంది దిగువన ఉన్న 50 శాతం వర్గంలోకి నెట్టివేయబడ్డారు. దేశంలో ఆర్థిక అసమానత అనేది ఆదాయం, సంపద, లింగ విభాగాల్లో లోతుగా పాతుకుపోయి, ఆర్థిక వ్యవస్థలో నిరంతర నిర్మాణాత్మక విభజనలకు కారణమవుతోందని నివేదిక స్పష్టం చేస్తోంది.

మధ్యతరగతిపై పెరుగుతున్న ఒత్తిడి.. పేదరికం నుంచి బయటపడి, తమ కష్టంతో పైకి ఎదగాలని ఆశించే మధ్యతరగతి ప్రజలు, సంపన్నులు ,పేద వర్గాల మధ్య చిక్కుకొని తీవ్రమైన సవాళ్లను ఎదుర్కొంటున్నారు.

ద్రవ్యోల్బణం దెబ్బ.. మధ్యతరగతి ప్రజల సంపాద(Wealth)న స్థిరంగా ఉన్నా, ఇంధనం, విద్య, వైద్యం, గృహ రుణాల వంటి ముఖ్యమైన రంగాలలో పెరుగుతున్న ధరలు (ద్రవ్యోల్బణం) వారి నెలవారీ బడ్జెట్‌ను తలకిందులు చేస్తున్నాయి. పెరుగుతున్న ఖర్చుల వల్ల పొదుపు చేయడం, పెట్టుబడి పెట్టడం కష్టమవుతోంది.

ఎదుగుదల లేని వాతావరణం.. పేదలకు ప్రభుత్వ ఉచిత పథకాలు, రాయితీలు కొంతవరకు ఊరటనిస్తున్నాయి. ధనవంతులకు వారి పెట్టుబడులే మరిన్ని లాభాలను, వడ్డీలను, డివిడెండ్‌లను తెచ్చిపెట్టి వారి సంపదను పెంచుతున్నాయి. కానీ, మధ్యతరగతి వారికి అటు ఉచిత పథకాల ప్రయోజనం పూర్తిగా దక్కదు, ఇటు వారి సంపాదన పెట్టుబడి స్థాయికి చేరదు.

పన్నుల భారం.. ఉద్యోగులుగా ఉన్న మధ్యతరగతి ప్రజలు తమ ఆదాయంలో అత్యధిక పన్నులు కడుతున్నారు. ఈ పన్నుల నుంచి పేదలకు సబ్సిడీలు, సంపన్నులకు పన్ను రాయితీలు దక్కుతున్నాయి. నిజాయితీగా పన్ను చెల్లించే ఈ వర్గంపైనే వ్యవస్థీకృత భారం ఎక్కువగా పడుతోంది.

విద్య, వైద్యం ఖర్చులు.. నాణ్యమైన విద్య, ఆరోగ్య సంరక్షణ కోసం మధ్యతరగతి భారీగా ఖర్చు చేయాల్సి వస్తోంది. ఇది వారిని అప్పుల ఊబిలోకి నెట్టి, మరింత ఎదగాలనే ఆశలను అణిచివేస్తోంది.

ప్రభుత్వ విధానాలలో లోపం.. ప్రస్తుతం అమలులో ఉన్న ఆర్థిక విధానాలు కేవలం సంపద పోగు చేసుకునేవారికి అనుకూలంగా, లేదా కేవలం దిగువ వర్గాలను లక్ష్యంగా చేసుకుని పథకాలు అమలు చేయడంపై దృష్టి సారిస్తున్నాయి. కానీ, మధ్యతరగతి వర్గాన్ని ఆర్థిక వృద్ధికి చోదక శక్తిగా మార్చేందుకు, వారికి పెట్టుబడి మార్గాలను, పన్నుల్లో రాయితీలను, వ్యాపార అవకాశాలను పెంచేందుకు సరైన వాతావరణాన్ని కల్పించడంలో ప్రభుత్వం వెనుకబడిందనే అభిప్రాయం వ్యక్తమవుతోంది.

మధ్యతరగతి ప్రజలు ఆర్థికంగా బలోపేతమైతేనే, వినియోగం పెరుగుతుంది, పెట్టుబడులు పెరుగుతాయి. దీని ద్వారా స్థూల జాతీయోత్పత్తి (GDP) పటిష్టంగా ముందుకు సాగుతుంది.

ఈ అసమానతల సమస్యను పరిష్కరించడానికి, ప్రభుత్వాలు కేవలం సంపన్నులు, పేదలపై మాత్రమే కాకుండా, దేశ అభివృద్ధికి వెన్నెముకగా నిలుస్తున్న మధ్యతరగతి వర్గంపై ప్రత్యేక దృష్టి సారించి, సమతుల్య విధానాలను రూపొందించాల్సిన అవసరం ఉంది.

మరిన్ని నేషనల్ న్యూస్అప్ డేట్ కోసం ఇక్కడ క్లిక్ చేయండి