Norman Borlaug
చరిత్రలో కొందరు వ్యక్తులు తమ ఆవిష్కరణలతో ప్రపంచ గతిని మార్చేస్తారు. అలాంటి వారిలో నోర్మన్ బోర్లాగ్ ఒకరు. ఈ తరం వారికి ఆయన గురించి పెద్దగా తెలిసి ఉండకపోవచ్చు, కానీ ఆయన చేసిన కృషికి యావత్ ప్రపంచం ఎప్పటికీ రుణపడి ఉంటుంది. ఆయన్ని ‘హరిత విప్లవ పితామహుడు’ అని కూడా పిలుస్తారు.
1940 నుంచి 1960 మధ్య కాలంలో ప్రపంచవ్యాప్తంగా దాదాపు 20 సార్లు తీవ్రమైన కరువులు వచ్చాయి. ముఖ్యంగా భారతదేశంలో ఆహార కొరత ఎంతగా ఉండేదంటే, అప్పటి ప్రధానమంత్రి ప్రజలను వారంలో ఒక పూట భోజనం మానేయాలని పిలుపునిచ్చారు. అలాంటి క్లిష్ట పరిస్థితుల్లో, నోర్మన్ బోర్లాగ్ తన పరిశోధనలతో ప్రపంచానికి కొత్త ఆశను ఇచ్చారు.
ఆయన మెక్సికోలోని ఒక వ్యవసాయ పరిశోధనా కేంద్రంలో సంవత్సరాల తరబడి శ్రమించి, తక్కువ నీటితో, సాంప్రదాయ విత్తనాల కంటే మూడు రెట్లు అధికంగా పంటనిచ్చే గోధుమ విత్తనాలను అభివృద్ధి చేశారు. ఈ హైబ్రిడ్ విత్తనాలు తక్కువ ఎత్తులో ఉండి, గట్టి కాండంతో ఉండేవి, దీనివల్ల బలమైన గాలులకు కూడా పంట నేలకూలదు. ఈ విత్తనాల వాడకం మొదలుపెట్టాక కేవలం రెండు సంవత్సరాల్లోనే గోధుమల ఉత్పత్తి రెట్టింపు అయింది. ఈ ఆవిష్కరణ ఆహార ఉత్పత్తిలో ఒక విప్లవాన్ని తీసుకొచ్చింది. అప్పటి వరకు గోధుమల కోసం అమెరికాపై ఆధారపడిన భారతదేశం, ఈ కొత్త విత్తనాలను ఉపయోగించి స్వయం సమృద్ధిని సాధించింది.
నోర్మన్ బోర్లాగ్ (Norman Borlaug)యొక్క కృషి కేవలం ఒక దేశానికే పరిమితం కాలేదు. ఆయన అభివృద్ధి చేసిన విత్తనాలను ఆసియా, లాటిన్ అమెరికా, ఆఫ్రికాలోని అనేక దేశాలు వాడటం మొదలుపెట్టాయి. లక్షలాది మంది ప్రజలు ఆకలి నుంచి బయటపడ్డారు. ఈ అసాధారణమైన కృషికి గుర్తింపుగా, ఆయనకు 1970లో ప్రపంచంలోనే అత్యున్నత పురస్కారమైన నోబెల్ శాంతి బహుమతి లభించింది. ఆయనకు భారతదేశం కూడా అత్యంత గౌరవంగా 2006లో పద్మవిభూషణ్ అవార్డును అందించింది.
నోర్మన్ బోర్లాగ్(Norman Borlaug) చేసిన ఆవిష్కరణ ఇప్పటికీ ప్రపంచవ్యాప్తంగా వ్యవసాయ రంగంలో ఒక మైలురాయిగా నిలిచిపోయింది. ఆయన చేసిన కృషి వల్ల నేటికీ కోట్లాది మంది ప్రజలకు కడుపు నిండా తిండి దొరుకుతోంది. ఈయన కేవలం ఒక శాస్త్రవేత్త మాత్రమే కాదు, మానవాళికి ఆశను, ఆహారాన్ని అందించిన ఒక దైవదూత.
