Delhi: దేశ రాజధానిలో బయటపడ్డ భద్రతా లోపం..ఇంతకీ ఆ హ్యూండాయ్ i20 కారు ఎవరిది?
Delhi: కారులో ఉన్న ప్రయాణికులు సహా మొత్తం 13 మంది దుర్మరణం చెందారు. 20 మందికి పైగా తీవ్ర గాయాల పాలయ్యారు.
Delhi
దేశ రాజధాని ఢిల్లీ(Delhi)లో నవంబర్ 10, సోమవారం సాయంత్రం చోటు చేసుకున్న భారీ పేలుడు దేశవ్యాప్తంగా తీవ్ర సంచలనం సృష్టించింది. ఒకవిధంగా చెప్పాలంటే రాజధాని నగరంలో భద్రతా లోపంపై ఆందోళనలను పెంచింది. రాత్రి 7 గంటల ప్రాంతంలో ప్రముఖ లాల్‌కిల్లా (Red Fort) మెట్రో స్టేషన్ సమీపంలో నడుస్తున్న ఒక హ్యూండాయ్ i20 కారులో ఈ పేలుడు సంభవించింది.
పేలుడు తీవ్రత ఎంత ఎక్కువగా ఉందంటే, కారులో ఉన్న ప్రయాణికులు సహా మొత్తం 13 మంది దుర్మరణం చెందారు. 20 మందికి పైగా తీవ్ర గాయాల పాలయ్యారు. పేలుడు జరిగిన కారు పూర్తిగా ధ్వంసం కాగా, పక్కనున్న ఇతర వాహనాలు కూడా తీవ్రంగా దెబ్బతిన్నాయి.
ఘటన జరిగిన వెంటనే ఢిల్లీ (Delhi)పోలీస్, ఫైర్ సిబ్బంది హుటాహుటిన ఘటనా స్థలానికి చేరుకున్నారు. గాయపడిన వారందరినీ లెనిన్ జయప్రకాశ్ (LNJP) హాస్పిటల్‌కు తరలించారు, అక్కడ వారికి అత్యవసర వైద్య చికిత్స అందిస్తున్నారు. సామాజిక మాధ్యమాల ద్వారా బాధితుల కోసం రక్తదానం చేయవలసిందిగా విజ్ఞప్తులు విస్తృతంగా ప్రచారమయ్యాయి. పేలుడు జరిగిన ప్రాంతంలో మరియు చుట్టుపక్కల ప్రాంతాల్లో హై అలర్ట్ ప్రకటించారు.
ఈ దుర్ఘటనపై కేంద్ర హోంమంత్రి అమిత్ షా విపరీతమైన విచారం వ్యక్తం చేస్తూ, వెంటనే ఘటనా స్థలాన్ని సందర్శించి పరిస్థితిని సమీక్షించారు. ఆయన ఢిల్లీ పోలీస్ కమిషనర్, ఎన్‌ఐఏ (NIA), ఎన్‌ఎస్‌జీ (NSG), ఫోరెన్సిక్ ల్యాబ్, మరియు స్పెషల్ బ్రాంచ్ టీమ్‌లకు అత్యవసర ఆదేశాలు జారీ చేశారు. ఏ ఒక్క అవకాశాన్ని నిరాకరించకుండా, ఈ ఘటనకు సంబంధించిన అన్ని కోణాల్లో లోతైన విచారణ జరిపి, వాస్తవాలను త్వరగా తేల్చాలని స్పష్టం చేశారు.
దర్యాప్తు అధికారులు ప్రధానంగా ఈ క్రింది అంశాలపై దృష్టి సారించారు..
పేలుడుకు గురైన హ్యూండాయ్ i20 కారు, నవీకరించబడిన నంబర్ ప్లేట్‌ అని అంతేకాదు గతంలో చాలాసార్లు ఈ కారు యజమానులు మారినట్లు గుర్తించారు. ప్రస్తుతం దీనిని ఎవరు వాడుతున్నారు. ఈ కారు గతంలో ఎవరెవరి చేతులు మారింది. దీని వెనుక ఉద్దేశం ఏమిటనే దానిపై ప్రత్యేక దర్యాప్తు జరుగుతోంది.
పేలుడు తీవ్రత దృష్ట్యా, ఈ ఘటనలో నిషేధిత పేలుడు వస్తువులను ఉపయోగించి ఉండవచ్చనే అనుమానాలు బలపడుతున్నాయి. దీనిపై యాంటీ టెర్రర్ స్క్వాడ్‌ ,నిఘా సంస్థలు దృష్టి సారించాయి.
పేలుడుకు ముందుగా ఏవైనా బెదిరింపు లేఖలు లేదా సందేశాలు అందాయా అనే కోణంలోనూ అధికారులు ఎంక్వైరీ చేస్తున్నారు.
ఈ ఘటన వల్ల దేశ రాజధాని ఢిల్లీ(Delhi)తో పాటు ముంబయి, బెంగళూరు, కోల్‌కతా వంటి ఇతర ముఖ్య నగరాలలో హై అలర్ట్ ప్రకటించారు. భద్రతా బలగాల సంఖ్యను పెంచారు, రద్దీ ప్రాంతాల్లో భద్రతా తనిఖీలను మరింత కఠినతరం చేశారు. రోడ్డు ట్రాఫిక్ అడ్వైజరీల ద్వారా ప్రజలకు సూచనలు అందించారు, రద్దీ ప్రాంతాలకు వెళ్లేటప్పుడు అప్రమత్తంగా ఉండాలని, అనుమానాస్పద వస్తువులు కనిపిస్తే వెంటనే పోలీసులకు సమాచారం ఇవ్వాలని కోరారు.
ప్రధానమంత్రి నరేంద్ర మోదీ, డిఫెన్స్ మినిస్టర్ రాజ్‌నాథ్ సింగ్‌తో సహా అనేక రాష్ట్రాల నాయకులు ఈ సంఘటనపై దిగ్భ్రాంతి వ్యక్తం చేశారు. గాయపడిన బాధితులకు వెంటనే మెరుగైన వైద్య సహాయం అందించాలని ప్రధాని సూచించారు. దేశ రాజధానిలో కీలకమైన ప్రాంతం వద్ద ఈ ఘటన జరగడంతో, ఇది కేవలం ప్రమాదమా లేక ఉగ్రవాద కోణం ఉందా అనే విషయం తేలే వరకు భద్రతా వ్యవస్థలు అత్యంత అప్రమత్తంగా పనిచేయాల్సిన పరిస్థితి ఏర్పడింది.
మరిన్ని తాజా వార్తల కోసం ఇక్కడ క్లిక్ చేయండి
