Vice President: ఉపరాష్ట్రపతి రేసులో ఇద్దరు..ఆయనకే ఎక్కవ ఛాన్స్..!

Vice President

ఉపరాష్ట్రపతి పదవి రేసులో తాజాగా ఇద్దరి పేరు తెరమీదకు వచ్చింది. 2022లో పదవీ బాధ్యతలు చేపట్టిన ధన్‌కర్, జూలై 21, 2025న తన రాజీనామా లేఖను ప్రభుత్వానికి సమర్పించడం ఇటీవల హాట్ టాపిక్ అయింది.

తన రాజీనామాకు అధికారికంగా ఆరోగ్య కారణాలే అని చెప్పినా, రాజ్యసభలో ఆయన తీసుకున్న కొన్ని స్వతంత్ర నిర్ణయాలు, ప్రభుత్వంతో పెరిగిన టెన్షన్ వంటివి కూడా ఈ నిర్ణయానికి కారణమై ఉండవచ్చని రాజకీయ వర్గాల్లో చర్చ జరిగింది. కాగా కొత్త ఉపరాష్ట్రపతి రేసులో జస్టిస్ అబ్దుల్ నజీర్ , సి.పి.రాధాకృష్ణన్ పేర్లు ప్రముఖంగా వినిపిస్తున్నాయి.

ప్రస్తుతం ఆంధ్రప్రదేశ్ గవర్నర్‌గా ఉన్న జస్టిస్ అబ్దుల్ నజీర్, ఉపరాష్ట్రపతి పదవికి రేసులో ముందున్నారు. సుప్రీంకోర్టు మాజీ న్యాయమూర్తిగా ఆయనకు దేశవ్యాప్తంగా మంచి పేరు ఉంది. ట్రిపుల్ తలాక్, అయోధ్య-బాబ్రీ మసీద్, డీమోనిటైజేషన్ వంటి సంచలనాత్మక కేసులలో ఆయన ఇచ్చిన తీర్పులు దేశంలోనే అత్యంత ముఖ్యమైనవిగా గుర్తింపు పొందాయి.

2023లో ఆయన గవర్నర్‌గా నియమితులు కావడం కూడా అప్పట్లో చర్చనీయాంశంగా మారింది. నజీర్ స్వచ్ఛమైన మనిషిగా, మైనారిటీ వర్గానికి చెందిన వ్యక్తి కావడం బీజేపీకి ఒక ప్లస్ పాయింట్. ఎన్డీఏ ప్రభుత్వం మైనారిటీ వర్గాలకు ప్రాధాన్యత ఇస్తుందని అంతర్జాతీయంగా, దేశీయంగా ఒక బలమైన సందేశాన్ని పంపడానికి ఆయన అభ్యర్థిత్వం దోహదపడుతుంది.

మరోవైపు, మహారాష్ట్ర గవర్నర్‌గా ఉన్న సి.పి.రాధాకృష్ణన్ కూడా ఉపరాష్ట్రపతి పదవికి గట్టి పోటీదారుగా ఉన్నారు. తమిళనాడులో నాలుగు దశాబ్దాల రాజకీయ అనుభవం ఉన్న సీనియర్ నేత ఈయన. రెండుసార్లు కోయంబత్తూరు నుంచి లోక్‌సభ సభ్యుడిగా గెలిచిన రాధాకృష్ణన్, జార్ఖండ్, తెలంగాణ, పుదుచ్చేరి వంటి రాష్ట్రాలకు గవర్నర్‌గా కూడా పనిచేశారు. ఆయన నిస్వార్థమైన పాలనా శైలి, బీజేపీకి దక్షిణాది రాష్ట్రాల్లో సానుభూతిని పెంచగల సామర్థ్యం ఆయనకు బలంగా మారాయి. దక్షిణ భారతదేశం నుంచి ఒక సీనియర్ రాజకీయ నేతను ఈ పదవిలో కూర్చోబెట్టడం ద్వారా బీజేపీ అక్కడ పార్టీ బలాన్ని పెంచుకోవాలని భావించవచ్చు.

నిజానికి, ఈ ఇద్దరిలో ఎవరికి ఎక్కువ అవకాశాలు ఉన్నాయనేది బీజేపీ అధిష్టానం వ్యూహంపై ఆధారపడి ఉంటుంది.జస్టిస్ అబ్దుల్ నజీర్ వైపు చూస్తే, ఆయన నిష్పక్షపాత న్యాయ నేపథ్యం, మైనారిటీ ప్రాతినిధ్యం కేంద్ర ప్రభుత్వానికి ఒక సానుకూల అంశంగా మారవచ్చు. మైనారిటీ వర్గాల మద్దతును పొందడానికి, అంతర్జాతీయంగా తమపై వస్తున్న విమర్శలకు సమాధానం చెప్పడానికి ఇది ఒక మంచి అవకాశంగా భావించవచ్చు.

సి.పి. రాధాకృష్ణన్ వైపు చూస్తే, ఆయన రాజకీయ అనుభవం, ముఖ్యంగా దక్షిణాదిలో బీజేపీ బలహీనంగా ఉన్న సమయంలో ఆ ప్రాంతం నుంచి ఒక బలమైన నేతకు అవకాశం ఇవ్వడం ద్వారా పార్టీకి లబ్ధి చేకూర్చవచ్చు.

ప్రస్తుతం ఉన్న రాజకీయ సమీకరణాలను బట్టి, జస్టిస్ అబ్దుల్ నజీర్ వైపే ఎక్కువ మొగ్గు కనిపిస్తోంది. సుప్రీంకోర్టు మాజీ న్యాయమూర్తిని ఈ అత్యున్నత పదవిలో నియమించడం ద్వారా ప్రభుత్వానికి గౌరవం పెరుగుతుంది. ఇది కేవలం ఒక రాజకీయ నిర్ణయం కాకుండా, ఒక నిష్పక్షపాత, న్యాయబద్ధమైన అభ్యర్థిని ఎంపిక చేశారని ప్రజలకు ఒక సందేశం పంపొచ్చు. అయితే, చివరి నిర్ణయం ప్రధాని నరేంద్ర మోదీ, బీజేపీ జాతీయ అధ్యక్షుల చేతుల్లోనే ఉంది. ఈ రేసులో ఎవరికి ఆ పదవి(Vice President) వరిస్తుందో చూడాలి.