SRH : సన్ రైజర్స్ బోణీ…కోల్ కతాపై ఘనవిజయం

SRH

ఈడెన్ గార్డెన్స్ లో ఛేజింగ్ జట్టుకే మంచి రికార్డున్న నేపథ్యంలో టాస్ గెలిచిన కోల్ కత్తా నైట్ రైడర్స్ కెప్టెన్ అజింక్య రహానే మరో ఆలోచన లేకుండా బౌలింగ్ ఎంచుకున్నాడు. బ్యాటింగ్ పిచ్ కావడంతో సన్ రైజర్స్ ఓపెనర్లు అభిషేక్ శర్మ , ట్రావిస్ హెడ్ దూకుడుగా ఆడారు. తొలి ఓవర్లో ఆచితూచి ఆడిన వీరిద్దరూ తర్వాత రెచ్చిపోయారు. ఫోర్లు, సిక్సర్లతో స్టేడియాన్ని హోరెత్తించారు.. దీంతో పవర్ ప్లేలోనే సన్ రైజర్స్ 84 పరుగులు చేసింది.

ఈ సీజన్ లో ఇదే అత్యధిక పవర్ ప్లే స్కోరు. ఇప్పటి వరకూ జరిగిన 6 మ్యాచ్ లలో ముంబై మాత్రమే పవర్ ప్లేలో 80 రన్స్ చేసింది. అభిషేక్ , హెడ్ తొలి వికెట్ కు 34 బంతుల్లోనే 82 పరుగులు జోడించారు. హెడ్ 21 బంతుల్లోనే 46 (6 ఫోర్లు, 3సిక్సర్లు) , అభిషేక్ శర్మ 21 బంతుల్లో 48 (4 ఫోర్లు, 4 సిక్సర్లు) పరుగులు చేసారు.

ఈ క్రమంలో అభిషేక్ శర్మ అరుదైన రికార్డు సాధించాడు. సన్ రైజర్స్ తరపున 100 సిక్సర్లు బాదిన రెండో బ్యాటర్ గా నిలిచాడు. ఈ లిస్టులో డేవిడ్ వార్నర్ 143 సిక్సర్లతో అగ్రస్థానంలో కొనసాగుతున్నాడు. ఒక దశలో వీరిద్దరి దూకుడు చూస్తే సన్ రైజర్స్ 8 ఓవర్లలోనే 110 పరుగులతో 250 ప్లస్ స్కోరు సాధించేలా కనిపించింది. అయితే ఇషాన్ కిషన్, అభిషేక్ వరుసగా ఔటవడంతో ఆ జోరుకు కాసేపు బ్రేక్ పడింది.

తర్వాత నితీష్ కుమార్ రెడ్డి, హెన్రిచ్ క్లాసెన్ జోడీ స్కోరుబోర్డును ముందుకు తీసుకెళ్లింది. ఇద్దరూ ధాటిగా ఆడుతూ 53 బంతుల్లో 82 పరుగులు జోడించారు. నితీష్ 24 బంతుల్లో 39 , క్లాసెన్ 35 బంతుల్లో 52 పరుగులు చేయగా… సన్ రైజర్స్ 20 ఓవర్లలో 8 వికెట్లకు 226 పరుగులు చేసింది. మధ్యలో వరుస వికెట్లు కోల్పోవడం ప్రభావం చూపింది. కేకేఆర్ బౌలర్లలో ముజరబానీ 4 వికెట్లు తీయగా.. వైభవ్ అరోరా 2, త్యాగి 1, అంకుల్ రాయ్ 1 వికెట్ పడగొట్టారు.

తర్వాత భారీ లక్ష్యఛేదనను కోల్ కతా నైట్ రైడర్స్ దూకుడుగానే ఆరంభించింది. ఇంపాక్ట్ ప్లేయర్ గా వచ్చిన ఫిన్ అలెన్ తొలి ఓవర్లోనే చుక్కలు చూపించాడు. 3 ఫోర్లు, 2 సిక్సర్లతో సహా 25 పరుగులు బాదాడు. దూకుడు మీదున్న అలెన్ ను హర్షదూబే పెవిలియన్ కు పంపించాడు. భారీ షాట్లు ఆడే క్రమంలో రహానే (8) పరుగులకు ఔటవగా.. కామెరూన్ గ్రీన్ అనూహ్యంగా రనౌటయ్యాడు.

దీంతో పవర్ ప్లేలో 74 పరుగులు చేసిన కేకేఆర్ 3 కీలక వికెట్లు కూడా చేజార్చుకుంది. ఈ దశలో రఘువంశీ, రింకూ సింగ్ ఇన్నింగ్స్ కొనసాగించారు. వీరిద్దరూ ధాటిగానే ఆడుతూ స్కోరు బోర్డును పరిగెత్తించారు. 30 బంతుల్లో 46 పరుగులు జోడించారు. రఘువంశీ కూడా రనౌటవడం, వెంటనే అంకుల్ రాయ్(0), రమణ్ దీప్ సింగ్ (10) ఔటయ్యారు.

తర్వాత రింకూ సింగ్ ధాటిగా ఆడినా ఎక్కువ సేపు క్రీజులో నిలవలేకపోయాడు. రింకూ 25 బంతుల్లో 35 ( 4 ఫోర్లు, 1 సిక్సర్ ) పరుగులకు ఔటవడంతో కేకేఆర్ ఓటమి ఖాయమైపోయింది. మిగిలిన బ్యాటర్లు ఔటయ్యేందుకు ఎంతో సమయం పట్టలేదు. దీంతో కోల్ కతా 161 పరుగులకు ఆలౌటైంది. సన్ రైజర్స్ బౌలర్లలో ఉనాద్కట్ 3, మలింగ 2, నితీష్ 2 వికెట్లు తీసారు. సన్ రైజర్స్ కు ఈ సీజన్ లో ఇది తొలి విజయం. అటు కేకేఆర్ కు వరుసగా రెండో ఓటమి.

Sri Lanka Cricket : ఐపీఎల్ ఆడకుండా అడ్డుకున్నారు…సొంత బోర్డుపై లంక ప్లేయర్ కేసు