Cockroaches: ప్రపంచం నుంచి బొద్దింకలు మాయమైతే..లాభం కంటే నష్టాలే ఎక్కువట..

Cockroaches

మన వంటగదిలో లేదా బాత్రూంలో బొద్దింక (Cockroach) కనిపించినా, చాలామంది దాన్ని చూసి అసహ్య పడటం, భయపడుతూ ఉండటం చూస్తాం. చాలామంది ఇవి ప్రపంచం నుంచే పూర్తిగా అంతరించిపోతే ఎంత బాగుంటుందో కదా అని కూడా అనుకుంటారు.  కానీ, శాస్త్రవేత్తలు , పరిశోధకుల అభిప్రాయం ప్రకారం, ఈ అసహ్యకరమైన కీటకాలు నిజానికి మన పర్యావరణ వ్యవస్థకు (Ecosystem) అత్యంత కీలకమైన హీరోలట. భూమిపై ఉన్న బొద్దింకలన్నీ ఒక్కసారిగా చనిపోతే, అది ఊహించని విధంగా మానవ జీవితంతో సహా మొత్తం ప్రకృతి సమతుల్యతకు తీవ్రమైన ముప్పు కలిగిస్తుందిని చెబుతున్నారు.

బొద్దింకలు (Cockroaches)అనేక ఇతర జంతువులకు కీలకమైన ఆహార వనరు. ఇవి అంతరించిపోతే ఆహార గొలుసు (Food Chain) తీవ్రంగా దెబ్బతింటుంది. బల్లులు, కప్పలు, అనేక పక్షులు, చిన్న క్షీరదాలు (ఎలుకలు వంటివి), ఇతర కీటకాలు (కందిరీగలు వంటివి) తమ ఆహారం కోసం ప్రత్యక్షంగా బొద్దింకలపైనే ఆధారపడతాయి.

బొద్దింకలు (Cockroaches)లేకపోతే, ఈ జంతువులన్నీ ఆహార కొరతను ఎదుర్కొని, అంతరించిపోయే ప్రమాదం ఉంది. ఉదాహరణకు, బల్లులు , కప్పలు వంటి జీవులు అంతరించిపోతే, ఇవి నియంత్రించే ఇతర హానికర కీటకాల జనాభా విపరీతంగా పెరిగి, వ్యవసాయంపై తీవ్ర ప్రభావం చూపుతుంది.

అంతేకాదు బొద్దింకల ప్రాముఖ్యతలో అత్యంత ముఖ్యమైనది, అవి పోషకాలను, ముఖ్యంగా నైట్రోజన్‌ను (Nitrogen) రీసైకిల్ చేయడం.అలాగే బొద్దింకలు తమ శరీరం లోపల బ్లాటాబాక్టీరియం (Blattabacterium) అనే బాక్టీరియంను కలిగి ఉంటాయి. ఈ బాక్టీరియం, బొద్దింకలు తినే వ్యర్థ పదార్థాలలో ఉన్న నైట్రోజన్‌ను తీసుకుని, దానిని మొక్కలకు అవసరమైన అమైనో ఆమ్లాలు , పోషకాలుగా మారుస్తుంది.

బొద్దింకలు విసర్జించిన వ్యర్థాలు నేలలో కలిసిపోవడం ద్వారా, ఈ నైట్రోజన్ పోషకాలు వ్యవసాయ పర్యావరణ వ్యవస్థలకు , అడవుల్లోని మొక్కలకు అందుతాయి. బొద్దింకలు అంతమైతే, నేలలో నైట్రోజన్ స్థాయిలు తగ్గి, నేల నాణ్యత క్షీణిస్తుంది. దీనిని మెరుగుపరచడానికి తప్పనిసరిగా రసాయన ఎరువులు వాడాల్సి వస్తుంది, ఇది పర్యావరణ కాలుష్యాన్ని మరింత పెంచుతుంది.

బొద్దింకలు కేవలం మన ఇళ్లలోనే కాక, అటవీ ప్రాంతాల్లో కూడా ముఖ్యమైన పాత్ర పోషిస్తాయి. బొద్దింకలు పడిపోయిన చెట్లు, కుళ్లిన కలప, ఆకులు , కుళ్లిపోతున్న ఇతర మొక్కలను తింటాయి. ఈ ప్రక్రియ ద్వారా అవి ఆ పదార్థాలను పోషకాలు అధికంగా ఉండే కణాలుగా మారుస్తాయి.

ఈ విధంగా కుళ్లిన పదార్థాలను త్వరగా తొలగించడం వల్ల, నేల సారవంతం (Soil Fertility) అవుతుంది , కొత్త మొక్కలు పెరగడానికి వీలవుతుంది.

ఒకవేళ బొద్దింకలు అదృశ్యమైతే, అటవీ ప్రాంతంలో చెత్త పేరుకుపోతుంది, కుళ్లిపోయే ప్రక్రియ నెమ్మదిస్తుంది. నేల సారవంతం తగ్గి, అడవిలోని చెట్లు బలహీనంగా మారతాయి. ఇది మొత్తం అటవీ వ్యవస్థకు తీవ్ర నష్టం కలిగిస్తుంది.

మొత్తంగా బొద్దింకలు లేకపోతే ఆహార గొలుసు విచ్ఛిన్నం, నేలలో పోషకాల కొరత, వ్యవసాయానికి రసాయన ఎరువులపై ఆధారపడటం పెరుగుతుంది. కాబట్టి, బొద్దింకలు అసహ్యంగా కనిపించినా, అవి మన భూమి యొక్క సమతుల్యతకు అత్యంత కీలకమైన జీవులు అని నిస్సందేహంగా చెప్పొచ్చు.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి