Imprisonment:భార్యను హత్య చేసిన భర్తకు యావజ్జీవ కారాగార శిక్ష..ఏడేళ్ల తర్వాత తీర్పు

Imprisonment

శ్రీకాకుళం జిల్లాలో అనుమానంతో తన భార్యను చంపిన ఓ కిరాతకుడికి ఏడేళ్ల తర్వాత శిక్ష(Imprisonment) పడిన ఘటన చర్చనీయాంశం అయింది. సుదీర్ఘ విచారణ తర్వాత, భార్యను హత్య చేసిన కేసులో నిందితుడికి శ్రీకాకుళం గౌరవ మొదటి అదనపు న్యాయస్థానం యావజ్జీవ కారాగార శిక్ష(Imprisonment)ను ఖరారు చేసింది.

జీరు వెంకట రమణ(27)కు, అతని భార్య రమణమ్మ(24)కు మధ్య వివాహం జరిగిన కొంతకాలానికే మనస్పర్థలు మొదలయ్యాయి. రమణమ్మ మరొకరితో అక్రమ సంబంధం పెట్టుకుందని భర్తకు అనుమానం రావడంతో, వేధింపులు ఎక్కువయ్యాయి. భర్త వేధింపులు భరించలేక రమణమ్మ దాదాపు ఒక ఏడాదిగా తన పుట్టింట్లోనే నివసిస్తోంది.

హత్య జరిగిన రోజు (2018 మార్చి 14).. పొందూరు మండలం, బాణం గ్రామంలో వెంకట రమణ తండ్రి మరణించడంతో, అంత్యక్రియల నిమిత్తం రమణమ్మ భర్త ఇంటికి వచ్చింది. అదే రోజు సాయంత్రం 5:30 గంటల సమయంలో, భార్యాభర్తల మధ్య మళ్లీ వాగ్వాదం జరిగింది. ఈ సందర్భంగా రమణమ్మ తాను ఇకపై భర్తతో కలిసి ఉండనని కుటుంబ సభ్యుల సమక్షంలో స్పష్టం చేసింది.

భార్య మాటలతో తీవ్ర ఆగ్రహానికి లోనైన వెంకట రమణ, క్షణికావేశంలో పదునైన కత్తితో రమణమ్మ మెడపై విచక్షణారహితంగా దాడి చేశాడు. దీంతో ఆమె అక్కడికక్కడే మృతి చెందింది.

ఏడేళ్ల తర్వాత తీర్పు.. రమణమ్మ కుటుంబ సభ్యుల ఫిర్యాదుతో పోలీసులు వెంకట రమణను అరెస్టు చేశారు.పోలీసులు దర్యాప్తు పూర్తి చేసి కోర్టులో ఛార్జ్‌షీట్ దాఖలు చేశారు.ముద్దాయి బెయిల్‌పై విడుదలయ్యాక, కొన్ని వాయిదాల తర్వాత ఐదేళ్లుగా కోర్టుకు హాజరు కాలేదు. దీంతో జిల్లా మొదటి అదనపు జడ్జి కోర్టు నాన్-బెయిలబుల్ వారెంట్ జారీ చేసింది.

శ్రీకాకుళం ఎస్పీ కె.వి. మహేశ్వర రెడ్డి ఆదేశాల మేరకు రంగంలోకి దిగిన ప్రత్యేక బృందం, ముద్దాయిని గుంటూరు పట్టణంలో గుర్తించి అదుపులోకి తీసుకున్నారు. పబ్లిక్ ప్రాసిక్యూటర్ కింజరాపు శ్రీనివాసరావు వాదనల అనంతరం, నిందితుడిపై నేరాలు పూర్తిగా రుజువు అయ్యాయి.

గౌరవ మొదటి అదనపు న్యాయస్థానం జడ్జి పి. భాస్కరరావు ముద్దాయి జీరు వెంకట రమణకు సెక్షన్ 302 (హత్య) IPC , సెక్షన్ 498-A (క్రూరత్వం) IPC ల కింద యావజ్జీవ కారాగార శిక్ష (జీవిత ఖైదు) తో పాటు రూ. 2,000/- జరిమానా విధిస్తూ తీర్పు చెప్పారు.

జిల్లాలో ఇలాంటి తీవ్ర నేరాలకు పాల్పడే వారిపై కఠిన చర్యలు తీసుకోవడమే కాకుండా, కేసుల విచారణను వేగవంతం చేయడానికి కృషి చేస్తున్నట్లు జిల్లా ఎస్పీ మహేశ్ ఈ సందర్భంగా తెలియజేశారు. ఏడేళ్ల తర్వాత అయినా నిందితుడికి తగిన శిక్ష(Imprisonment) పడిందంటూ బాధితురాలి కుటుంబసభ్యులు ఆనందం వ్యక్తంచేస్తున్నారు.

Palakova : పాలకోవా.. స్వచ్ఛమైన పాల కమ్మదనం