Cricket:టెస్ట్ స్పెషలిస్టులు ఎక్కడ ? ఐపీఎల్ మాయలో అసలు ఆట మాయం

Cricket

క్రికెట్(cricket) ఇండియాలో మతంలా ఆరాధించే స్పోర్ట్…ఆటగాళ్లను దేవుళ్లలా కొలిచే అభిమానం.. ప్రపంచకప్ గెలిస్తే అంతులేని సంబరాలు.. ఐపీఎల్ వచ్చిందంటే అభిమానులకు పండగే పండగే.. రెండు నెలల పాటు ఫుల్ ఎంటర్ టైన్ మెంట్.. నాన్ స్టాప్ క్రికెట్ ఫెస్టివల్.. అయితే ఇప్పుడు ఐపీఎల్ కారణంగానే టెస్టుల్లో భారత క్రికెట్ పతనావస్థకు అడుగులు పడుతున్నాయా.. అంటే అవుననే అనాల్సి వస్తోంది. ఐపీఎల్ కారణంగానే ఎంతో మంది ఆటగాళ్లు వెలుగులోకి వస్తున్నారు..ఆర్థికంగానూ వారికి మేలు చేకూరుతోంది..

ఈ మాటలు నిజమే…కానీ ఐపీఎల్ ఆటతోనే మిగిలిన ఫార్మాట్లకు నష్టం జరుగుతోంది. మరీ ముఖ్యంగా టెస్ట్ ఫార్మాట్ కు గుడ్ బై చెప్పేసి.. అప్పుడప్పుడు వన్డేలు ఆడుతూ లీగ్స్ కే ప్రాధాన్యత ఇచ్చే ప్లేయర్స్ సంఖ్య కూడా పెరుగుతోంది. అదే సమయంలో భారత్ లో ఐపీఎల్ కారణంగా టెస్ట్ క్రికెట్ లో ఆడే ప్లేయర్స్ ను భూతద్దం పెట్టి వెతకాల్సి వస్తోంది. అలా వెతికినా కూడా ఎవ్వరూ దొరకడం లేదు. కొద్ది కాలంగా టెస్టుల్లో మన ప్రదర్శన చూసినవారు ఎవరైనా మొదట చెప్పే మాట ఇదే.

అసలు టెస్ట్ ఫార్మాట్ అంటే క్రికెటర్ సత్తాకు కొలమానం…ఆటగాడి ఓర్పుకు పరీక్ష… గంటల కొద్దీ క్రీజులో నిలబడే సహనాన్ని టెస్ట్ చేసే ఫార్మాట్.. ప్రపంచవ్యాప్తంగా క్రికెట్ ఆడే దేశాల్లో ఎవరిని అడిగినా చెప్పే మాట ఒక్కటే.. ఒక క్రికెటర్ టాలెంట్ కు అసలైన కొలమానం టెస్ట్ క్రికెట్టే.. దీనిలో ఎలాంటి డౌట్ ఉండదు.. ఉండక్కర్లేదు కూడా.. టీ20 తరహాలో క్రీజులోకి ఇలా వచ్చి అలా నాలుగు షాట్లు బాదేసి పెవిలియన్ కు వెళ్లిపోవడం కాదు.. టెస్ట్ ఫార్మాట్ అంటే అదొక మహా యజ్ఞం.. ఐదు రోజుల పాటు ఆటగాళ్ళ ఓర్పుకు, ఫిట్ నెస్ కూ, వ్యూహాలకు రియల్ టెస్ట్. ఇండియాలో గత 15 ఏళ్ల కాలంలో టెస్ట్ క్రికెట్ పేరు చెప్పగానే గుర్తొచ్చే పేర్లు రాహుల్ ద్రావిడ్, వివిఎస్ లక్ష్మణ్ , పుజారా, రహానే.. వీరందరికీ క్రికెట్(cricket) వర్గాలు ఇచ్చిన బిరుదు టెస్ట్ స్పెషలిస్టులు..

నిజమే వీరు క్రీజులో ఉన్నారంటే ప్రత్యర్థి బౌలర్లకు చుక్కలు కాదు తలనొప్పి వస్తుంది. క్లిష్ట పరిస్థితుల్లో ప్రత్యర్థి విజయానికి , ఇండియా ఓటమికి అడ్డుగోడలా.. అది కూడా కాంక్రీట్ తో కట్టిన గోడల నిలబడిన చరిత్ర వీరిది.. మ్యాచ్ లు గెలిపిస్తేనే హీరోలు కాదు… ఓటమిని తప్పించి డ్రాగా ముగించిన వారు కూడా హీరోలే.. అలాంటి హీరోలనే టెస్ట్ స్పెషలిస్టులుగా పిలుస్తారు… ఒక్క మాటలో చెప్పాలంటే టెస్ట్ స్పెషలిస్టులు టీ20ల్లో ధనాధన్ ఇన్నింగ్స్ లు ఆడేందుకు వీలుందేమో కానీ టీ20ల్లో మెరుపులు మెరిపించే ఆటగాళ్లు మాత్రం టెస్టు స్పెషలిస్టులుగా మారాలంటే కొన్నేళ్లు పాట శ్రమించాల్సిందే..

గత ఏడాదిన్నర కాలంగా టెస్ట్ క్రికెట్ లో ఇండియా ఆటతీరు దిగజారుతూ వస్తోంది. దీనికి కారణం రెడ్ బాల్ క్రికెట్ లో సుదీర్ఘ ఇన్నింగ్స్ లు ఆడే బ్యాటర్లు ప్రస్తుతం టీమిండియాలో కనిపించడం లేదు. కేవలం ఐపీఎల్ ప్రదర్శనతో జాతీయ జట్టులోకి వచ్చిన ఆటగాళ్లనే కోచ్ గంభీర్ అన్ని ఫార్మాట్లలోకి ఎంపిక చేస్తున్నాడన్నది వాస్తవం.

దీంతో ఐపీఎల్ లో సత్తా చాటిన వారికి కొద్దికాలంలోనే టెస్ట్ జట్టులో కీలక బాద్యతలు అప్పగిస్తే ఫలితాలు ఇలాగే ఉంటాయన్నది మాజీల మాట. తాజాగా భారత క్రికెట్(cricket) దిగ్గజం కపిల్ దేవ్ ఇవే కామెంట్స్ చేశారు. ద్రవిడ్, లక్ష్మణ్ , పుజారా లాంటి బ్యాటర్లు జట్టులో లేనప్పుడు టెస్ట్ క్రికెట్ లో విజయాలు ఆశించడం అత్యాశే అవుతుందని అభిప్రాయపడ్డారు. నిజమే మరి క్రీజులో పట్టుమని పది ఓవర్ల పాటు కూడా నిలవలేని బ్యాటర్లతో టెస్ట్ మ్యాచ్ లను డ్రాగా ముగించాలని కోరుకోవడం పోరపాటే.. మరి ఇప్పటికైనా బీసీసీఐ సెలక్టర్లు, కోచ్ గంభీర్ దేశవాళీ క్రికెట్ లో ప్రదర్శనను పరిగణలోకి తీసుకుని ఆటగాళ్ళకు అవకాశాలిస్తే టెస్ట్ క్రికెట్ లో భారత పరాజయాలకు బ్రేక్ పడుతుందని చెప్పొచ్చు.

మరిన్ని స్పోర్ట్స్ న్యూస్ కోసం ఇక్కడ క్లిక్ చేయండి