Congress: జనవరి 5 నుంచి కాంగ్రెస్ దేశవ్యాప్త నిరసన..ఈ పోరాటం పేదల కోసమా లేక రాజకీయ ఉనికి కోసమా?

Congress

ఢిల్లీ వేదికగా శనివారం జరిగిన కాంగ్రెస్(Congress)వర్కింగ్ కమిటీ (CWC) సమావేశం దేశ రాజకీయాల్లో చర్చకు తెరలేపింది. మల్లికార్జున ఖర్గే, సోనియా గాంధీ, రాహుల్ గాంధీ వంటి అగ్రనేతలు హాజరైన ఈ భేటీలో కేంద్ర ప్రభుత్వంపై యుద్ధం ప్రకటించాలని నిర్ణయం తీసుకున్నారు.

ముఖ్యంగా యూపీఏ హయాంలో వచ్చిన మహాత్మా గాంధీ జాతీయ గ్రామీణ ఉపాధి హామీ పథకం (MGNREGA) పేరును మారుస్తూ కేంద్ర ప్రభుత్వం తీసుకున్న నిర్ణయంపై కాంగ్రెస్ మండిపడుతోంది. ‘ఎంజీఎన్‌ఆర్‌ఈజీఏ బచావో ఆందోళన్’ పేరుతో జనవరి 5 నుంచి దేశవ్యాప్త నిరసనలకు పిలుపునివ్వడం ద్వారా గ్రామీణ ఓటర్లను తమవైపు తిప్పుకోవాలని కాంగ్రెస్ చూస్తోంది.

కేవలం ఈ పథకం పేరు మార్పు మాత్రమే కాకుండా, ఈ పథకాన్ని కొత్తగా ‘వికసిత్ భారత్ గ్యారంటీ ఫర్ రోజ్గార్ అండ్ ఆజీవికా మిషన్ గ్రామీణ్’ (VB-GRAMJI) చట్టంగా మార్చడాన్ని ఏకపక్ష నిర్ణయంగా ఖర్గే విమర్శించారు.

అసలు ఈ నిరసనలు కాంగ్రెస్‌కు ఎంతవరకు కలిసి వస్తాయనే చర్చ ఇప్పుడు సాగుతోంది. గ్రామీణ ప్రాంతాల్లో ‘ఉపాధి హామీ’ అనేది లక్షలాది కుటుంబాలకు జీవనాధారం. అలాంటి పథకం నుంచి మహాత్మా గాంధీ పేరును తొలగించడం ద్వారా కేంద్రం తన భావజాలాన్ని రుద్దడానికి ప్రయత్నిస్తోందని కాంగ్రెస్ బలంగా వాదిస్తోంది.

ఇది పేద ప్రజల పని హక్కుపై జరిగిన దాడి అని రాహుల్ గాంధీ చెప్పడం వెనుక ఉన్న అసలు ఉద్దేశ్యం.. గ్రామీణ భారతాన్ని సెంటిమెంట్‌తో కనెక్ట్ చేయడమే అంటున్నారు విశ్లేషకులు.

ఒక పథకం పేరు మార్చినప్పుడు దాని లక్ష్యం దెబ్బతింటుందా లేదా అనే దాని కంటే, ఆ పేరు వెనుక ఉన్న చరిత్రను చెరిపేస్తున్నారన్న భావన ప్రజల్లోకి వెళ్తే అది కచ్చితంగా కాంగ్రెస్‌కు రాజకీయంగా మేలు చేస్తుందని చెబుతున్నారు.

అయితే, ఇదే సమయంలో కేంద్రం ఈ చట్టాన్ని మరింత ఆధునికీకరిస్తున్నామని చెబుతుంటే.. కాంగ్రెస్ (Congress)నిరసనలు కేవలం పేరు కోసమే చేస్తున్నారా అన్న విమర్శలు కూడా వచ్చే అవకాశం ఉంది.

ఈ సమావేశంలో కేవలం ఉపాధి హామీ పథకం గురించే కాకుండా, బంగ్లాదేశ్‌లో నెలకొన్న అశాంతి, అక్కడ రాక్ స్టార్ కాన్సెర్ట్‌లపై జరుగుతున్న దాడుల వంటి కొన్ని ముఖ్యమైన అంశాలను కూడా చర్చించడం ద్వారా అంతర్జాతీయ పరిణామాలపై తమకున్న అవగాహనను కాంగ్రెస్ చాటుకుంది.

అయితే, కాంగ్రెస్(Congress) టార్గెట్ మాత్రం చాలా క్లారిటీగా ఉంది. రాష్ట్రాలపై అదనపు వ్యయ భారం పడుతుందన్న నెపంతో కేంద్రంపై ఒత్తిడి పెంచి, విపక్షాలన్నింటిని కూడా ఏకం చేయాలని రాహుల్ గాంధీ పిలుపునిచ్చారు. ‘జై సంవిధాన్’ నినాదంతో రాజ్యాంగ రక్షణను ముందు పెట్టి వారు చేయబోయే ఈ పోరాటం ప్రజల్లోకి ఎంతవరకు వెళ్తుందనేది జనవరి 5 తర్వాతే తేలుతుంది.

ఒకవేళ ఈ ఆందోళనలు గ్రామీణ స్థాయిలో సక్సెస్ అయితే, రాబోయే ఎన్నికల్లో కాంగ్రెస్‌కు ఇది పెద్ద ప్లస్ పాయింట్ అయ్యే అవకాశం ఉంది.

దీంతో పాటు చాలా కాలంగా అధికారానికి దూరంగా ఉండటం వల్ల కాంగ్రెస్ క్షేత్రస్థాయి కార్యకర్తలు (Grassroots Cadre) కొంత నిరుత్సాహంలోనే ఉన్నారు. ఇప్పుడు ‘ఉపాధి హామీ’ వంటి అంశాలను తీసుకుని ఊరిబాట పట్టడం వల్ల, గ్రామాల్లో మళ్లీ పార్టీ జెండా రెపరెపలాడుతుంది.

ప్రతి ఇంటికి వెళ్లి ‘మీ పథకం పేరు మార్చారు, మీ హక్కులను లాగేసుకుంటున్నారు’ అని చెప్పడం ద్వారా పార్టీకి, ప్రజలకు మధ్య ఉన్న గ్యాప్‌ బాగా తగ్గుతుందని కేడర్ భావిస్తోంది. ఎందుకంటే ఇది రాబోయే ఎన్నికల్లో ఓటు బ్యాంకును పటిష్టం చేయడానికి ఒక వారధిలాగా పనిచేస్తుంది.

సాధారణంగా బీజేపీ భావోద్వేగ అంశాలతో ముందుకు వెళ్తుంది. దానికి విరుగుడుగా కాంగ్రెస్ ఇప్పుడు ‘మహాత్మా గాంధీ’ అనే సెంటిమెంట్‌ను, ‘ఉపాధి’ అనే అవసరాన్ని కలిపి వాడాలని డిసైడ్ అయింది. ‘గాంధీ పేరు తీసేయడం’ అనేది గ్రామీణ ప్రజల్లో ఒక రకమైన అసహనాన్ని కలిగించొచ్చు.

పల్లెల్లో ప్రజలు తమ సమస్యల గురించి మాట్లాడే నాయకుడి కోసం ఎదురుచూస్తుంటారు. కాంగ్రెస్(Congress) ఛలో గావ్ – ‘ఊరిబాట’ ద్వారా ప్రజల కష్టాలను వినే ప్రయత్నం చేస్తే మాత్రం.. అది కచ్చితంగా బీజేపీకి బలమైన ప్రత్యామ్నాయంగా మారుతుందనడంలో సందేహం లేదు.

మొత్తానికి సీడబ్ల్యూసీ భేటీ ద్వారా కాంగ్రెస్ తన దూకుడును పెంచిందనే చెప్పొచ్చు. కేంద్ర ప్రభుత్వం తీసుకుంటున్న ఏకపక్ష నిర్ణయాలను సామాన్యుడి ముందుకు తీసుకెళ్లడం ద్వారా బీజేపీని ఇరకాటంలో పెట్టడమే తమ వ్యూహమని వారు స్పష్టం చేశారు.

పేదరికం, నిరుద్యోగం వంటి సున్నితమైన అంశాలతో ముడిపడి ఉన్న ఉపాధి హామీ పథకం విషయంలో కాంగ్రెస్ దాడిపై కేంద్రం ఎలాంటి ప్రతిదాడి చేస్తుందో చూడాలి. ఏది ఏమైనా, దేశంలోని ప్రతి గ్రామంలో కాంగ్రెస్ గళం వినిపిస్తామన్న ఖర్గే హెచ్చరికలు భారత రాజకీయాల్లో సరికొత్త వేడిని పుట్టిస్తున్నాయి.

మరిన్ని తాజా వార్తల కోసం ఇక్కడ క్లిక్ చేయండి