Ekadashi: సెప్టెంబర్ 3న పరివర్తిని ఏకాదశి..లక్ష్మీదేవి అనుగ్రహం పొందాలంటే..

Ekadashi

హిందూ సంప్రదాయంలో ఏకాదశి(Ekadashi)కి ఎంతో విశిష్టత ఉంది. ఈ రోజు శ్రీ మహావిష్ణువుకు అత్యంత ప్రీతిపాత్రమైనది. ముఖ్యంగా సెప్టెంబర్ 3న వచ్చే పరివర్తిని ఏకాదశిని అత్యంత పవిత్రమైన రోజుగా భావిస్తారు. అలాగే ఏకాదశి రోజు తులసి మొక్కను పూజించడం చాలా ముఖ్యమైనదిగా పండితులు చెబుతారు. . ఎందుకంటే తులసిని లక్ష్మీదేవి స్వరూపంగా భావిస్తారు, అందుకే ఆమెను విష్ణుప్రియ (విష్ణువుకు ప్రియమైనది) అని పిలుస్తారు.

ఏకాదశి (Ekadashi)రోజు తులసి మొక్కకు పూజ చేయడం ద్వారా శ్రీ మహావిష్ణువు సంతోషించి, భక్తులపై తన ఆశీస్సులు కురిపిస్తారని నమ్మకం. తులసి పూజ చేయడం వల్ల ఇంట్లో ఉండే ప్రతికూల శక్తి తొలగిపోయి, సానుకూల శక్తి పెరుగుతుందని, దీని ద్వారా సుఖసంతోషాలు, శ్రేయస్సు కలుగుతాయని ప్రశస్తి. ఈ పవిత్రమైన రోజున తులసి మొక్క ముందు ఆవు నెయ్యితో దీపం వెలిగించి, భక్తి శ్రద్ధలతో పూజిస్తే మరింత మంచి జరుగుతుందని విశ్వసిస్తారు.

ఏకాదశి(Ekadashi) రోజున తులసి మొక్కకు శ్రీ మహావిష్ణువు స్వరూపమైన శాలిగ్రామానికి వివాహం చేసే సంప్రదాయం కూడా ఉంది. ఇలా చేయడం వల్ల కుటుంబంలోని కష్టాలు తొలగిపోయి, ఆనందం, సిరిసంపదలు, శ్రేయస్సు లభిస్తాయని నమ్ముతారు. అంతేకాకుండా, ఈ రోజు తులసిని పూజించడం వల్ల భార్యాభర్తల మధ్య ఉన్న సమస్యలు తొలగిపోయి, వారి బంధం మరింత బలపడుతుందని, దాంపత్య జీవితంలో మాధుర్యం, ఆనందం నెలకొంటాయని విశ్వాసం.

ఏకాదశి రోజున ఉపవాసం ఉండి, నియమ నిష్టలతో తులసి మొక్కను పూజించడం వల్ల తెలిసి తెలియక చేసిన పాపాల నుంచి విముక్తి లభిస్తుందని నమ్మకం. ఈ పవిత్రమైన రోజున నిష్టతో పూజించిన వారికి మోక్షం కూడా లభిస్తుందని చెబుతారు. అలాగే, ఏకాదశి రోజున శ్రీ మహావిష్ణువు పూజలో తులసి ఆకులను తప్పనిసరిగా ఉపయోగించాలి. దీనితో పాటు, విష్ణు సహస్ర నామం పఠిస్తూ తులసి దళాలతో పూజిస్తే శుభ ఫలితాలు లభిస్తాయి.

ఏకాదశి రోజున “ఓం నమో భగవతే వాసుదేవాయ” అనే మంత్రాన్ని జపించడం, విష్ణు స్తోత్రాన్ని పఠించడం అత్యంత మంచిది. ఈ రోజు చేసే దానధర్మాలు కూడా విశేషమైన ఫలితాలను ఇస్తాయి. పేదలకు అన్నదానం, వస్త్రదానం చేయడం శుభప్రదం. అలాగే, పరివర్తిని ఏకాదశి కథను చదవడం కూడా మంచిదని పురాణాలు చెబుతున్నాయి. ఈ ఆచారాలు, నియమాలను పాటించడం ద్వారా లక్ష్మీదేవి , శ్రీ మహావిష్ణువుల అనుగ్రహం పొంది, మీ జీవితాన్ని సంతోషంగా, సంపన్నంగా మార్చుకోవచ్చు.

Overthinking: ఓవర్‌థింకింగ్ జీవితాలను నాశనం చేస్తుంది.. బయటపడే టెక్నిక్స్ ఏంటి?