Deepfake: డీప్ ఫేక్ టెక్నాలజీతో నిజం, అబద్ధం మధ్య తేడా మాయం..

Deepfake

నేటి డిజిటల్ ప్రపంచంలో మనం చూసే, వినే దేనినీ పూర్తిగా నమ్మలేని పరిస్థితిని తీసుకువచ్చిన అత్యంత ప్రమాదకరమైన, అదే సమయంలో విప్లవాత్మకమైన సాంకేతికతే ‘డీప్ ఫేక్’ (Deep Fake). ఈ టెక్నాలజీ ఆర్టిఫిషియల్ ఇంటెలిజెన్స్ (AI) లోని అధునాతన అల్గారిథమ్‌ల ఆధారంగా పనిచేస్తుంది. దీని ద్వారా వ్యక్తుల ముఖ కవళికలు, వాయిస్, హావభావాలను అత్యంత సహజంగా అనుకరించి, వారు ఎప్పుడూ చేయని లేదా చెప్పని పనులను వీడియో లేదా ఆడియో రూపంలో సృష్టిస్తున్నారు.

ఉదాహరణకు, ఒక రాజకీయ నాయకుడు కానీ సెలబ్రెటీలు కానీ వారు మాట్లాడని మాటలు మాట్లాడినట్లుగా, లేదా ఒక ప్రముఖ నటుడు చేయని పనులు చేసినట్లుగా ఈ డీప్ ఫేక్ వీడియోలను క్రియేట్ చేసి అలజడి సృష్టిస్తున్నారు. ఇవి నిజమైన దృశ్యాలకూ, సృష్టించిన వాటికీ మధ్య తేడాను గుర్తించడం మనుషులకు దాదాపు అసాధ్యం.

ఈ టెక్నాలజీ మొదట్లో వినోదం, సినిమాల కోసం (ఉదాహరణకు, పాత తరం నటులను కొత్త సినిమాల్లో చూపించడం) వాడినా కూడా, ఇప్పుడు ఇది సమాజానికి ఒక పెద్ద ముప్పుగా మారింది. దీనివల్ల ముఖ్యంగా రాజకీయ దుర్వినియోగం పెరిగే ప్రమాదం ఉంది. ఎన్నికల సమయంలో ప్రత్యర్థుల ప్రతిష్టను దెబ్బతీయడానికి, లేదా సమాజంలో అబద్ధపు వార్తలను వేగంగా వ్యాప్తి చేసి గందరగోళం సృష్టించడానికి ఈ డీప్ ఫేక్ వీడియోల(Deepfake)ను వాడుతున్నారు.

ఈ ‘సింథటిక్ మీడియా’ యొక్క విశ్వసనీయత పెరిగే కొద్దీ, మన ప్రజాస్వామ్య వ్యవస్థలకే సవాళ్లు ఎదురవుతాయి. దీనితో పాటుగా, సైబర్ సెక్యూరిటీ సవాళ్లు కూడా పెరిగాయి. వ్యక్తుల వాయిస్‌లను అనుకరించి, బ్యాంకింగ్ మోసాలు, లేదా కార్పొరేట్ మోసాలు చేయడానికి కూడా ఈ సాంకేతికతను ఉపయోగిస్తున్నారు.

ఈ టెక్నాలజీ యొక్క పర్యవసానాలను అర్థం చేసుకోవడం చాలా ముఖ్యం. AI ఎంత వేగంగా అభివృద్ధి చెందుతుందో, అదే వేగంతో ఈ డీప్ ఫేక్‌లను గుర్తించే టెక్నాలజీ (Detection Technology) కూడా అభివృద్ధి చెందాల్సిన అవసరం ఉంది. లేదంటే, భవిష్యత్తులో ‘నిజం ఏది, నకిలీ ఏది'(Deepfake) అని తెలుసుకోవడం చాలా కష్టమవుతుంది. డీప్ ఫేక్ అనేది టెక్నాలజీలో ఒక అద్భుతమైన ఆవిష్కరణ అయినా కూడా, దానిని నైతిక విలువలతో వాడకపోతే, సమాజంలో నమ్మకాన్ని పూర్తిగా నాశనం చేయగల శక్తి దానికుంది కాబట్టి బీ అలర్ట్.

మరిన్ని టెక్నాలజీ వార్తల కోసం ఇక్కడ క్లిక్ చేయండి.