Kokapet: ఎకరం రూ.151.25 కోట్లు.. కోకాపేట భూములకు ఎందుకంత క్రేజ్ ?

Kokapet

కోకాపేట(Kokapet).. ఈ పేరు చెప్పగానే అందరికీ గుర్తొచ్చేది కోట్లలో పలికే భూములే… అప్పట్లో కోకాపేట ఆంటీ అంటూ తులసి సినిమాలో ఝాన్సీ కూడా ఒక పాత్ర కూడా వచ్చినప్పుడు కోకాపేట క్రేజ్ ఏంటనేది అందరికీ అర్థమైంది. ప్రతీసారీ ఇక్కడ భూములను వేలం వేసినప్పుడు సరికొత్త రికార్డులు నమోదవుతూనే ఉంటున్నాయి. కోకాపేట చుట్టూ ఎప్పటికప్పుడు అభివృద్ధి పెరుగుతూనే ఉండడంతో అక్కడి భూముల ధరలు ఆకాశాన్నంటుతున్నాయి.

తాజాగా గండిపేట మండల పరిధిలోని కోకాపేట నియోపోలిస్ లేఅవుట్‌లో హెచ్‌ఎండీఏ నిర్వహించిన రెండో విడత ఈ-వేలంలో రికార్డు ధర పలికాయి. ఈ వేలంలో ఎకరం రూ. 151 కోట్ల 25 లక్షల రూపాయలు పలికి సరికొత్త రికార్డు సృష్టించింది. నియోపోలిస్ లేఅవుట్‌లోని 9.06 ఎకరాల భూమిని వేలం వేయగా… ప్లాట్ నంబర్ 15లో ఎకరం రూ. 151 కోట్ల 25 లక్షలు పలికింది.

అలాగే ప్లాట్ నంబర్ 16లో ఎకరం ధర రూ. 147 కోట్ల 75 లక్షలు పలికింది. ఇది రెండో అత్యధిక ధరగా నమోదైంది. ఈ 9.06 ఎకరాల వేలంతో హెచ్‌ఎండీఏకు రూ. 1,352 కోట్లు ఆదాయం దక్కింది.కాగా నవంబర్ 25న జరిగిన మొదటి విడత వేలంలో ఎకరానికి రూ. 137.25 కోట్లు ధర పలికితే ఇప్పుడు ఆ రికార్డ్ కూడా బ్రేక్ అయింది.

భూముల వేలంలో కోకాపేట (Kokapet)గతంలోనూ పలు రికార్డులు నెలకొల్పింది. ఇప్పుడు నియోపోలిస్ లే ఔట్ ప్రాజెక్ట్ వచ్చిన తర్వాత ఆ రికార్డులకు బ్రేక్ కూడా పడడం లేదు. దీంతో ఎందుకు ఇక్కడ భూములకు ఇంత క్రేజ్ అని చాలా మంది అనుకుంటుంటారు. ఈ లేఅవుట్‌లో ప్లాట్లను కొనుగోలు చేసే వారికి.. ఆకాశమే హద్దుగా ఎన్ని ఫ్లోర్లయినా నిర్మించుకునేందుకు అనుమతులు ఇస్తారు. అదే ఇక్కడ ప్రధాన ఆకర్షించే అంశం.

కమర్షియల్ , రెసిడెన్సీ , ఎంటర్‌టైన్‌మెంట్ అవసరాలకు భవనాలు నిర్మించుకునేందుకు ఇక్కడ పూర్తి అనుమతులున్నాయి. ఈ ప్రత్యేక అనుమతులే కారణంగానే కోకాపేట భూములకు ఈ రికార్డ్ స్థాయి ధరలు పలుకుతున్నాయి. రూ.300 కోట్లతో అభివృద్ధి పనులు చేపట్టిన వేళ 40 ఎకరాల్లో అన్ని రకాల మౌలిక సదుపాయాలు కల్పించారు. సైక్లింగ్​ట్రాక్స్​, 45 మీ. వెడల్పైన రోడ్లు, భూగర్భ డ్రైనేజీ, విద్యుత్​ సదుపాయాలను కల్పించారు. ఎప్పటికప్పుడు మౌలిక సౌకర్యాల విషయంలో సరికొత్త ప్రణాళికలతో ముందుకెళ్ళడం కూడా ఇక్కడి భూములకు బాగా కలిసొచ్చింది.

మరిన్ని తాజా వార్తల కోసం ఇక్కడ క్లిక్ చేయండి