Just SportsLatest News

Boxing:నిఖత్ జరీన్ పసిడి పంచ్.. వరల్డ్ బాక్సింగ్ కప్ లో స్వర్ణం

Boxing: మాజీ వరల్డ్ ఛాంపియన్ అయిన నిఖత్ కు రెండేళ్ళ తర్వాత ఇదే తొలి అంతర్జాతీయ పతకం.

Boxing

తెలంగాణ బాక్సర్ నిఖత్ జరీన్ మరోసారి అంతర్జాతీయ పోటీల్లో దుమ్మురేపింది. గత ఏడాదిన్నర కాలంగా పతకం గెలవని నిఖత్ అద్భుత విజయంతో తన రీఎంట్రీని ఘనంగా చాటింది. గ్రేటర్ నోయిడాలో జరిగిన వరల్డ్ బాక్సింగ్ కప్ ఫైనల్స్ 2025(Boxing cup 2025)లో నిఖత్ స్వర్ణ పతకం కైవసం చేసుకుంది. 51 కేజీల విభాగంలో బరిలోకి దిగిన ఈ తెలంగాణ బాక్సర్ టైటిల్ పోరులో చైనీస్ తైపీకి చెందిన జువాన్ పై 5-0 స్కోర్ తో విజయం సాధించింది. తొలి రౌండ్ నుంచే ప్రత్యర్థిపై పంచ్ ల వర్షం కురిపించిన నిఖత్ ఏ దశలోనూ ఆమెకు అవకాశం ఇవ్వలేదు.

రెండో రౌండ్ లో ప్రత్యర్థి బాక్సర్ ఎటాకింగ్ చేసినా వ్యూహాత్మకంగా తప్పించుకుంటూ ఆధిక్యాన్ని నిలబెట్టుకుంది. ఇక మూడో రౌండ్ లోనూ పై చేయి సాధించి ప్రత్యర్థిని పంచ్ లతో ఉక్కిరి బిక్కిరి చేసింది. మాజీ వరల్డ్ ఛాంపియన్ అయిన నిఖత్ కు రెండేళ్ళ తర్వాత ఇదే తొలి అంతర్జాతీయ పతకం. నిఖత్ 51 కేజీల విభాగంలో ఐదుగురు బాక్సర్లు మాత్రమే బరిలో నిలిచారు. దీంతో నేరుగా సెమీఫైనల్ ఆడి అదరగొట్టేసింది. భుజం గాయంతో దాదాపు ఏడాది పాటు బాక్సింగ్ రింగ్ కు దూరమైన నిఖత్ ఇప్పుడు వరల్డ్ కప్ బాక్సింగ్ లో మెడల్ గెలిచి తన సత్తా నిరూపించుకుంది.

World Boxing Cup Finals 2025 (1)
World Boxing Cup Finals 2025 (1)

ఇదిలా ఉంటే ఈ విజయం తర్వాత నిఖత్ ఎమోషనల్ అయింది. చాలా రోజుల తర్వాత అద్భుత ప్రదర్శనతో మెడల్ గెలవడం ఎంతో సంతోషాన్నిచ్చిందని చెప్పుకొచ్చింది. ఈ సందర్భంగా హైదరాబాద్ లో బాక్సింగ్(Boxing) అకాడమీ పెట్టబోతున్నట్టు ప్రకటించింది. తద్వారా బాక్సింగ్ (Boxing)లో వస్తున్న యువ చాంపియన్లకు అత్యుత్తమ శిక్షణ అందిస్తానని పేర్కొంది. దీనిపై ఇప్పటికే సీఎం రేవంత్ రెడ్డిని కలిసి ప్రతిపాదన చెప్పినట్టు వెల్లడించింది.

సీఎం సానుకూలంగా స్పందించారని చెప్పిన నిఖత్ ఈ మెడల్ తో మరోసారి ముఖ్యమంత్రిని కలిసి గుర్తు చేయనున్నట్టు వెల్లడించింది. తన రీఎంట్రీలో ఇది ఆరంభం మాత్రమేనని మరిన్ని విజయాలు సాధిస్తానని తెలిపింది. ఒలింపిక్స్ లో మెడల్ గెలవడమే అతి పెద్ద లక్ష్యంగా నిర్థేశించుకున్నట్టు వివరించింది. కాగా ఈ ఛాంపియన్ షిప్ లో భారత మహిళా బాక్సర్లు దుమ్మురేపారు.

నిఖత్ తో పాటు మరో నలుగురు బాక్సర్లు కూడా మెడల్స్ గెలిచారు. మీనాక్షి , అరుంధతి, నుపుర్, ప్రీతి కూడా స్వర్ణాలు కైవసం చేసుకున్నారు. ఫలితంగా వరల్డ్ బాక్సింగ్ లో భారత్ బలమైన శక్తిగా ఎదిగేందుకు మరో అడుగు పట్టినట్టయిందని విశ్లేషకులు ప్రశంసిస్తున్నారు.

మరిన్ని స్పోర్ట్స్ న్యూస్ కోసం ఇక్కడ క్లిక్ చేయండి

Related Articles

Back to top button