Talli ki Vandanam: ఏపీలో తల్లికి వందనం రెండో విడత నిధుల విడుదల

Talli ki Vandanam :ఆంధ్రప్రదేశ్ ప్రభుత్వం (AP Government)సంక్షేమ కార్యక్రమాలపై ప్రత్యేకంగా దృష్టి సారిస్తూ, విద్యారంగానికి పెద్దపీట వేస్తోంది. ఇందులో భాగంగా, విద్యార్థుల తల్లులకు ఆర్థిక తోడ్పాటు అందించే లక్ష్యంతో ప్రారంభించిన ‘తల్లికి వందనం'(Thalliki Vandanam) పథకం కింద రెండో విడత నిధులను రేపు అంటే జూలై 10, 2025న విడుదల చేయనుంది.

Talli ki Vandanam

ఒకటో తరగతి నుంచి ఇంటర్మీడియట్ వరకు చదువుతున్న విద్యార్థులందరికీ ఈ పథకం వర్తిస్తుంది. ఈ విద్యా సంవత్సరం ప్రారంభంలోనే మొదటి విడత నిధులను లక్షలాది మంది తల్లుల ఖాతాల్లో జమ చేసిన విషయం తెలిసిందే. ఇప్పుడు, మొదటి తరగతిలోకి కొత్తగా ప్రవేశించిన విద్యార్థులు, ఇంటర్ ఫస్టియర్‌లో చేరినవారు, కొన్ని సాంకేతిక కారణాల వల్ల గతంలో నిధులు పొందలేకపోయిన వారికి ఆర్థిక సాయం అందించేందుకు ప్రభుత్వం అన్ని ఏర్పాట్లు చేసింది.

లబ్ధిదారుల విస్తరణ: 9.51 లక్షల మంది తల్లులకు లబ్ధి
ఏపీ వ్యాప్తంగా మొత్తం 9.51 లక్షల మంది తల్లుల ఖాతాల్లో రేపు ‘తల్లికి వందనం'(Talli ki Vandanam) పథకం కింద నిధులు జమ కానున్నాయి. ఈసారి, కేంద్రీయ విద్యాలయాలు, నవోదయ పాఠశాలలు, సీబీఎస్ఈ సిలబస్ చదువుతున్న విద్యార్థుల తల్లుల ఖాతాల్లో కూడా రూ. 13,000/- చొప్పున నిధులను జమ చేయనున్నారు. గతంలో ఈ విద్యాసంస్థల విద్యార్థులకు పథకం అమలుపై నెలకొన్న అనుమానాలను ప్రభుత్వం నివృత్తి చేస్తూ, వారికి కూడా వర్తింపజేయడానికి సిద్ధమైంది.

విద్యా సంవత్సరం ప్రారంభంలో మొదటి విడత నిధులు విడుదలైనప్పటికీ, కొత్తగా ప్రవేశాలు పొందిన విద్యార్థులు (ముఖ్యంగా ఒకటో తరగతి, ఇంటర్ ఫస్టియర్), మరియు కొన్ని సాంకేతిక సమస్యల కారణంగా అర్హులైన కొంతమంది తల్లులు నిధులు పొందలేకపోయారు. అడ్మిషన్ల ప్రక్రియ పూర్తవడంతో, ఇప్పుడు ఆయా విద్యార్థులకు కూడా ‘తల్లికి వందనం’ పథకం కింద నగదు సాయం అందించాలని ప్రభుత్వం నిశ్చయించింది. ఈ మేరకు గ్రామ/వార్డు సచివాలయాలకు, అలాగే పాఠశాలల యాజమాన్యాలకు అర్హుల జాబితాలను పంపించారు. ఈ జాబితాల ఆధారంగా నిధులు జమ చేసేందుకు అవసరమైన అన్ని సన్నాహాలు పూర్తయ్యాయి.

పెండింగ్ దరఖాస్తుల పరిష్కారం, మెగా పేరెంట్స్ మీటింగ్
అర్హత ఉండి కూడా వివిధ కారణాల వల్ల ‘తల్లికి వందనం’ సాయానికి దూరంగా ఉండిపోయిన లక్షలాది మంది విద్యార్థుల తల్లుల కోసం ప్రభుత్వం సచివాలయాల్లో గ్రీవెన్స్ సెల్‌లను ఏర్పాటు చేసింది. ఈ సెల్‌లకు పెద్ద సంఖ్యలో ఫిర్యాదులు అందగా, సాంకేతిక లోపాలను సత్వరం సరిదిద్దారు. ఈ విధంగా సమస్యలు పరిష్కరించబడిన 1.35 లక్షల మంది లబ్ధిదారుల ఖాతాల్లో కూడా రేపు నిధులు జమ కానున్నాయి.

ఎన్నికల సమయంలో కూటమి ప్రభుత్వం ఇచ్చిన హామీ మేరకు, ఒకే ఇంట్లో ఎంత మంది పిల్లలు చదువుతుంటే, అంత మందికి ‘తల్లికి వందనం’ నిధులు జమ చేయాలని నిర్ణయించింది. ఈ హామీకి కట్టుబడి, విద్యా సంవత్సరం ఆరంభంలోనే భారీ ఎత్తున నిధులు విడుదల చేసిన ప్రభుత్వం, ఇప్పుడు మిగిలిన అర్హులందరికీ కూడా ఆర్థిక సాయం అందించేందుకు సంకల్పించింది.

‘తల్లికి వందనం’ నిధుల విడుదలతో పాటు, రేపు రాష్ట్రవ్యాప్తంగా అన్ని యాజమాన్యాల పాఠశాలల్లో మెగా పేరెంట్ టీచర్స్ మీటింగ్ (Parents Meeting) నిర్వహించబడుతుంది. పిల్లల చదువు, ప్రగతికి సంబంధించిన పలు అంశాలపై తల్లిదండ్రులకు అవగాహన కల్పించడమే ఈ సమావేశం ప్రధాన ఉద్దేశ్యం. ఆంధ్రప్రదేశ్ పాఠశాల విద్యాశాఖ ఈ సమావేశాలను తప్పనిసరిగా నిర్వహించాలని స్పష్టమైన ఆదేశాలు జారీ చేయగా, పాఠశాలలు తమ తల్లిదండ్రులకు ఇప్పటికే సమాచారం అందించాయి.

ఈ కీలకమైన రోజు, అన్ని సచివాలయాల్లో ‘తల్లికి వందనం’ పథకం రెండో విడతకు సంబంధించిన అర్హుల జాబితాలను కూడా ప్రదర్శిస్తారు. మొత్తానికి, ‘తల్లికి వందనం’ పథకాన్ని విజయవంతంగా అమలు చేయడం ద్వారా కూటమి ప్రభుత్వం విద్యారంగం పట్ల తన చిత్తశుద్ధిని మరియు ప్రజల సంక్షేమం పట్ల నిబద్ధతను మరోసారి చాటుకుంది.