Gen Z Protests: మళ్లీ అట్టుడుకుతున్న నేపాల్‌..జెన్-జడ్ నిరసనలు, కర్ఫ్యూ

Gen Z Protests: నేపాల్ ప్రధాని సుశీల కర్కి తాజా ఉద్రిక్తతలపై స్పందించారు. ఆమె ప్రజలను ప్రశాంతంగా ఉండాలని విజ్ఞప్తి చేశారు.రాజకీయంగా రెచ్చగొట్టడం మానుకోవాలని అన్ని రాజకీయ పార్టీలకు సూచించారు.

JustTeluguLast Updated: November 20, 2025

Gen Z Protests

కొద్ది రోజులుగా సద్దు మణిగిందనుకున్న హిమాలయ దేశం నేపాల్‌లో.. మరోసారి ఆందోళనలతో కలకలం రేగింది. ముఖ్యంగా జనరేషన్-జడ్ (Gen Z) అని పిలవబడే యువ నిరసనకారులు రోడ్లపైకి వచ్చి ఆందోళనలు చేపట్టడంతో కొన్ని ప్రాంతాల్లో ఉద్రిక్త పరిస్థితులు ఏర్పడ్డాయి. ఈ నిరసనల వల్ల ప్రభుత్వం అప్రమత్తమై, వెంటనే కీలక నిర్ణయాలు తీసుకుంది.

నేపాల్‌లో ఇటీవల జరిగిన రాజకీయ అస్థిరతకు యువత ఆగ్రహం ప్రధాన కారణం. సెప్టెంబరు 8 , 9 తేదీలలో ప్రభుత్వం సోషల్ మీడియాపై నిషేధం విధించడంతో యువత(Gen Z)లో ఆగ్రహం కట్టలు తెంచుకుంది. అప్పటి ప్రధాని కేపీ శర్మ ఓలీ పాలనలోని ఆర్థిక స్తబ్దత , అవినీతిపై విసిగిపోయిన 3 కోట్ల మంది జనాభా కలిగిన ఈ దేశంలో హింసాత్మక తిరుగుబాటు చెలరేగింది. ఈ హింసలో కనీసం 76 మంది మరణించారు.

పార్లమెంటుతో పాటు కొన్నిచోట్ల ప్రభుత్వ కార్యాలయాలు కూడా తగలబెట్టబడ్డాయి. ఈ నిరసనల ధాటికి నాలుగుసార్లు ప్రధానిగా పనిచేసిన కేపీ శర్మ ఓలీ పదవి నుంచి దిగిపోవాల్సి వచ్చింది. తర్వాత దేశాన్ని ఎన్నికల దిశగా నడిపించడానికి మాజీ ప్రధాన న్యాయమూర్తి సుశీల కర్కి (Sushila Karki) తాత్కాలిక ప్రధానమంత్రిగా నియమితులయ్యారు.

ప్రస్తుతం ఏర్పడిన ఉద్రిక్తతలకు ప్రధాన కారణం మాజీ ప్రధాని కేపీ శర్మ ఓలీకి చెందిన కమ్యూనిస్ట్ పార్టీ ఆఫ్ నేపాల్ – యూనిఫైడ్ మార్క్సిస్ట్ లెనినిస్ట్ (CPN-UML) మద్దతుదారులు తిరిగి పట్టు కోసం ప్రయత్నాలు చేయడం. దీనిని అడ్డుకోవడానికి యువ నిరసనకారులు ప్రయత్నించడంతో, రెండు వర్గాల మధ్య ఘర్షణలు తలెత్తాయి.

బుధవారం ముఖ్యంగా బారా జిల్లాలోని సిమారా ప్రాంతంలో రెండు గ్రూపుల మధ్య పోటాపోటీ ర్యాలీలు, ఘర్షణలు చెలరేగాయి. ఎయిర్‌పోర్టుకు సమీపంలో ఘర్షణలు జరగడంతో పరిస్థితిని అదుపులోకి తెచ్చేందుకు ప్రభుత్వం తక్షణమే స్పందించింది. బారా జిల్లాలో ఎక్కువ మంది ఒక చోట చేరడంపై నిషేధం (గ్యాథరింగ్స్ బ్యాన్) విధించి, కర్ఫ్యూను అమలు చేసింది. రాత్రి 8 గంటల వరకు కర్ఫ్యూ అమల్లో ఉంటుందని అధికారులు తెలిపారు.

కాగా నేపాల్ ప్రధాని సుశీల కర్కి తాజా ఉద్రిక్తతలపై స్పందించారు. ఆమె ప్రజలను ప్రశాంతంగా ఉండాలని విజ్ఞప్తి చేశారు.రాజకీయంగా రెచ్చగొట్టడం మానుకోవాలని అన్ని రాజకీయ పార్టీలకు సూచించారు. మార్చి 5న జరగబోయే ఎన్నికలకు ముందు ప్రజలు ప్రజాస్వామ్య ప్రక్రియను విశ్వసించాలని పిలుపునిచ్చారు. అంతేకాకుండా, దేశం కొత్త తరం చేతుల్లో ఉండాలని , దార్శనికత కలిగిన వ్యక్తులు పాలించాలని కోరుకుంటున్నట్లు ఆమె నిన్న 110కి పైగా పార్టీల ప్రతినిధులతో నిర్వహించిన సమావేశంలో తెలిపారు.