ISRO: ఇస్రో ‘బాహుబలి’ ప్రయోగానికి కౌంట్ డౌన్..సముద్రం, అడవుల్లోనూ మెరుగైన ఇంటర్నెట్

ISRO

భారత అంతరిక్ష పరిశోధన సంస్థ (ఇస్రో-ISRO) అంతరిక్ష ప్రయోగాల పరంపరలో మరో కీలక మైలురాయిని అధిగమించడానికి సిద్ధమైంది. సరికొత్త సాంకేతిక పరిజ్ఞానంతో ముందుకు దూసుకెళ్తున్న ఇస్రో, తన ప్రతిష్టాత్మక ‘బాహుబలి’ రాకెట్ ప్రయోగానికి కౌంట్ డౌన్ ప్రక్రియను ప్రారంభించింది..

• రాకెట్ పేరు.. LVM3-M5 (లాంచ్ వెహికల్ మార్క్-3 M5)
• ఉపగ్రహం పేరు.. CMS-03 (CMS-3) లేదా GSAT-7R
• ప్రయోగ తేదీ & సమయం.. ఆదివారం (నవంబర్ 02) సాయంత్రం 5:26 నిమిషాలకు (5 గంటల 26 నిమిషాలకు),తిరుపతి జిల్లా, సతీష్ ధావన్ స్పేస్ సెంటర్ (SHAR), శ్రీహరికోటలోని రెండవ లాంచ్ ప్యాడ్‌లో ఈ ప్రయోగం జరగనుంది

ఈ ప్రయోగానికి సంబంధించిన కౌంట్ డౌన్ ప్రక్రియ ఇప్పటికే మొదలైంది. ఇది 24 గంటల పాటు నిర్విరామంగా కొనసాగిన తర్వాత రాకెట్ నింగిలోకి దూసుకెళ్తుంది.
ఈ భారీ ప్రయోగం ద్వారా ఇస్రో 4400 కేజీలు బరువు కలిగిన CMS-03 (GSAT-7R) ఉపగ్రహాన్ని అంతరిక్షంలోకి పంపనుంది.ఈ ఉపగ్రహాన్ని భూమి నుంచి దాదాపు 36,000 కిలోమీటర్ల ఎత్తున ఉన్న GTO ఆర్బిట్ (జియోసింక్రోనస్ ట్రాన్స్‌ఫర్ ఆర్బిట్) లోకి విజయవంతంగా ప్రవేశపెట్టనున్నారు.

ఇప్పటివరకు ఇస్రో(ISRO) శాస్త్రవేత్తలు శ్రీహరికోట నుంచి ఈ LVM-3 తరహా రాకెట్‌తో ఇంత బరువు కలిగిన ఉపగ్రహాన్ని ప్రయోగించడం ఇదే మొదటిసారి కావడం విశేషం. ఈ ప్రయోగం విజయవంతమైతే, ఇస్రో మరో ముఖ్యమైన మైలురాయిని చేరుకున్నట్టవుతుంది.

CMS-03/GSAT-7R కమ్యూనికేషన్ ఉపగ్రహం యొక్క ప్రధాన లక్ష్యం భారతదేశానికి మెరుగైన ఇంటర్నెట్ సేవలను అందించడం.

పాత ఉపగ్రహానికి ప్రత్యామ్నాయం.. ఇస్రో 2013లో ఇంటర్నెట్ సౌకర్యాల కోసం GSAT-7 ఉపగ్రహాన్ని ఫ్రెంచ్ గయానా నుండి ప్రయోగించింది. ఆ ఉపగ్రహం యొక్క కాలపరిమితి ముగియడంతో, దానికి ప్రత్యామ్నాయంగా, పూర్తి స్వదేశీ పరిజ్ఞానంతో, అధునాతన టెక్నాలజీలతో GSAT-7R (CMS-03) ఉపగ్రహాన్ని రూపొందించారు.

ఈ 4400 కేజీల ఉపగ్రహం ద్వారా భారతదేశంలోని భూభాగంతో సహా మారుమూల ప్రాంతాలైన అటవీ ప్రాంతం మరియు విస్తృత సముద్ర ప్రాంతంలో కూడా మెరుగైన మరియు సరిపడినంత ఇంటర్నెట్ సౌకర్యాలు అందించడానికి ఈ ఉపగ్రహం ఉపయోగపడుతుందని శాస్త్రవేత్తలు భావిస్తున్నారు.

ఈ CMS-03 కమ్యూనికేషన్ ఉపగ్రహం కక్ష్యలో ప్రవేశించిన రోజు నుంచి మరో పది సంవత్సరాల కాలం పాటు నిరంతరాయంగా దేశానికి సేవలు అందిస్తుంది.

ప్రయోగ రిహార్సల్స్, రాకెట్ అనుసంధాన పనులన్నీ పూర్తి చేసుకుని, రాకెట్‌ను లాంచ్ ప్యాడ్‌కు తరలించారు. వాతావరణం అనుకూలిస్తే, ఇస్రో శాస్త్రవేత్తలు ఈ భారీ ప్రయోగాన్ని విజయవంతంగా నింగిలోకి పంపడానికి పూర్తి సన్నద్ధతతో ఉన్నారు.

Janhvi Kapoor:పెద్దిలో జాన్వీ కపూర్ ఫస్ట్ లుక్ అదిరిపోయింది..!