T20 World Cup : శ్రీలంకకు మార్చేది లేదు..బంగ్లాకు తేల్చిచెప్పేసిన ఐసీసీ

T20 World Cup

టీ20 ప్రపంచకప్ (T20 World Cup) లో తమ వేదికలను భారత్ నుంచి శ్రీలంకకు మార్చాలని బంగ్లాదేశ్ క్రికెట్ బోర్డు చేసిన విజ్ఞప్తిని ఐసీసీ తిరస్కరించింది. ప్రస్తుత పరిస్థుతుల్లో వేదికను మార్చే ప్రసక్తే లేదని తేల్చి చెప్పినట్టు సమాచారం. లాజిస్టిక్స్ పరంగా చాలా ఇబ్బందులు ఉంటాయని, కావాలంటే మరో రెండు నగరాల్లో ఆడాలని సూచించింది.

ఐసీసీ వర్గాల సమాచారం ప్రకారం బంగ్లాదేశ్ జట్టు చెన్నై ,తిరువనంతపురంలో ఆడొచ్చంటూ సూచన చేసింది. దీనిపై బంగ్లా బోర్డు తుది నిర్ణయం తీసుకోవాలని , ఇక తమ చేతుల్లో ఏమీ లేదని తేల్చి చెప్పేసినట్టు తెలుస్తోంది.బంగ్లాదేశ్ లో హిందువులుపై జరుగుతున్న దాడులకు నిరసనగా ఐపీఎల్ నుంచి ముస్తఫిజుర్ రహమాన్ ను బీసీసీఐ తప్పించింది.

దీంతో ఆగ్రహం వ్యక్తం చేసిన బంగ్లా క్రికెట్ బోర్డు ప్రతీకార చర్యలకు దిగింది. టీ20 ప్రపంచకప్ (T20 World Cup) ఆడేందుకు భారత్ కు రాలేమనీ, తమ మ్యాచ్ ల వేదికలను శ్రీలంకకు మార్చమని ఐసీసీని కోరింది. అయితే ఇప్పటికే విమాన టికెట్లు, హోటల్స్ వంటి లాజిస్టిక్స్ అంశాలు ఖరారైపోవడంతో షెడ్యూల్ , వేదికలు మారిస్తే తీవ్ర ఇబ్బందులు వస్తాయని బీసీసీఐ స్పష్టం చేసింది.

దీంతో బీసీబీ ప్రతిపాదనను తిరస్కరించిన ఐసీసీ భారత్ కు రాకుంటే పాయింట్లు కోల్పోవాల్సి ఉంటుందని కూడా హెచ్చరించింది. తర్వాత మరోసారి కూడా బీసీబీ లేఖ రాసినా ఐసీసీ మాత్రం వేదికను మార్చే అవకాశం లేదంటూ స్పష్టం చేయడంతో బంగ్లా బోర్డుకు ఏం చేయాలో తెలియడం లేదు.

నిజానికి బంగ్లా క్రికెట్ బోర్డు కంటే కూడా బంగ్లాదేశ్ ప్రభుత్వం ఈ విషయంలో ఎక్కువ జోక్యం చేసుకుంది. తమ ప్లేయర్ కు అవమానం జరిగిందంటూ నానా హంగామా చేస్తోంది. బంగ్లా బోర్డును తెరవెనుక నడిపిస్తూ, ఐసీసీకి లేఖలు రాయించింది కూడా బంగ్లా ప్రభుత్వమే.

పదే పదే ఐసీసీ తిరస్కరించినా కూడా బంగ్లా తీరు మారలేదు. పూర్తి సెక్యూరిటీ కల్పిస్తామని, ఎటువంటి ఇబ్బందులూ ఉండవని ఐసీసీ స్పష్టం చేసినా బంగ్లాదేశ్ ఓవరాక్షన్ చేయడంపై బీసీసీఐ వర్గాలు కూడా మండిపడుతున్నాయి. ఇదిలా ఉంటే టీ ట్వంటీ ప్రపంచకప్ కు ఈ సారి భారత్ , శ్రీలంక సంయుక్తంగా ఆతిథ్యమిస్తున్నాయి. ఈ మెగా టోర్నీ ఫిబ్రవరి 7 నుంచి మార్చి 8 వరకూ జరుగుతుంది.

Trump:నేనే వెనెజులా అధ్యక్షుడిని.. ట్రంప్ సంచలన పోస్ట్ వెనుక అసలు నిజమేంటి?