Ajay Devgn:తెలంగాణకు పెట్టుబడుల వర్షం.. అజయ్ దేవ్‌గణ్ ఫిలిం సిటీకి హైదరాబాద్‌ ఎందుకు?

Ajay Devgn

తెలంగాణ రాష్ట్ర ప్రభుత్వం ఒక ప్రతిష్టాత్మకమైన లక్ష్యాన్ని నిర్దేశించుకుంది. 2047 నాటికి రాష్ట్రాన్ని మూడు ట్రిలియన్ డాలర్ల (Three Trillion Economy) ఆర్థిక వ్యవస్థగా తీర్చిదిద్దడం. ఈ లక్ష్యాన్ని సాధించేందుకు, రాష్ట్రం ‘తెలంగాణ రైజింగ్ మిషన్’లో భాగంగా పెట్టుబడులను ఆకర్షిస్తోంది.

ఈ ప్రయత్నంలో భాగంగా, డిసెంబర్ 8 , 9 తేదీల్లో భారత్ ఫ్యూచర్ సిటీలో ‘తెలంగాణ రైజింగ్ గ్లోబల్ సమ్మిట్’ ను నిర్వహించబోతున్నారు. ఈ సమ్మిట్‌కు దేశ విదేశాల నుంచి పారిశ్రామికవేత్తలు మరియు సీఈఓలు హాజరుకానున్నారు.

పెట్టుబడి ఒప్పందాలు (ఎంఓయూలు)..

అజయ్ దేవ్‌గణ్(Ajay Devgn) ఫిలిం సిటీ.. ప్రముఖ బాలీవుడ్ నటుడు అజయ్ దేవ్‌గణ్, హైదరాబాద్ ఫ్యూచర్ సిటీలో ప్రపంచ స్థాయి ఫిలిం సిటీని స్థాపించడానికి రాష్ట్ర ప్రభుత్వంతో గ్లోబల్ సమ్మిట్‌లో అవగాహన ఒప్పందం (MOU) కుదుర్చుకోబోతున్నారు.

అజయ్ దేవ్‌గణ్(Ajay Devgn) స్టూడియో పూర్తిగా యానిమేషన్, VFX , ఆర్టిఫిషియల్ ఇంటెలిజెన్స్ (AI) ఆధారిత అత్యాధునిక సాంకేతికత కోసం ఉద్దేశించబడింది. ముంబైలో ఇంతటి భారీ, టెక్-కేంద్రీకృత స్టూడియోను నిర్మించడానికి, కొత్త మౌలిక సదుపాయాలను ఏర్పాటు చేయడానికి అవసరమైన విశాలమైన స్థలం (Space) లభించడం కష్టం.

‘భారత్ ఫ్యూచర్ సిటీ’ వంటి ప్రాంతాల్లో కొత్తగా, పెద్ద స్థాయిలో (50-60 ఎకరాలు) భవిష్యత్తు సాంకేతికతకు అనుగుణంగా స్టూడియోను నిర్మించడానికి కావాల్సిన భూమి హైదరాబాద్‌లో అందుబాటులో ఉంది. హైదరాబాద్ ఇప్పటికే దేశంలోనే అత్యంత వేగంగా అభివృద్ధి చెందుతున్న నగరాల్లో ఒకటి. ఇక్కడ పెట్టుబడి పెట్టడం వల్ల వ్యాపార విస్తరణకు మెరుగైన అవకాశాలు లభిస్తాయి.

రిలయన్స్ వంతారా కన్జర్వేటరీ.. రిలయన్స్ గ్రూప్‌నకు చెందిన ‘వంతారా యానిమల్ రెస్క్యూ అండ్ రిహాబిలిటేషన్ సెంటర్’ ఆధ్వర్యంలో తెలంగాణలో వైల్డ్‌లైఫ్ కన్జర్వేటరీ మరియు నైట్ సఫారీ ఏర్పాటు చేయనున్నారు. గుజరాత్‌లోని వంతారా ప్రాజెక్ట్ తరహాలోనే ఉండే ఈ ప్రాజెక్ట్, తెలంగాణ టూరిజం రంగానికి కొత్త ఆకర్షణగా నిలవనుంది.

ఫుడ్ లింక్ ఎఫ్ అండ్ బీ హోల్డింగ్స్.. ఈ అంతర్జాతీయ కంపెనీ హైదరాబాద్ ఫ్యూచర్ సిటీలో రూ. 3,000 కోట్ల భారీ పెట్టుబడితో మూడు భారీ హోటల్స్ నిర్మాణం కోసం ప్రభుత్వంతో ఎంఓయూ చేసుకోనుంది.

ఈ మూడు ప్రధాన ఒప్పందాలతో పాటు, మరిన్ని ప్రపంచ ప్రముఖ కంపెనీలు కూడా తెలంగాణలో పెట్టుబడులు పెట్టడానికి సిద్ధంగా ఉన్నట్లు తెలుస్తోంది.

మరిన్ని తెలంగాణ వార్తల కోసం ఇక్కడ క్లిక్ చేయండి