Srushti Fertility Case:సృష్టి ఫెర్టిలిటీ కేసులో వైసీపీ నేత సోదరుడి హస్తం?

Srushti Fertility Case

హైదరాబాద్‌లోని యూనివర్సల్ సృష్టి ఫెర్టిలిటీ సెంటర్ (Srushti Fertility Case)కేంద్రంగా బయటపడిన అక్రమాలు ఇప్పుడు కేవలం వైద్య రంగంలో జరిగిన మోసంగా మిగల్లేదు. ఈ కేసు అనూహ్యంగా రాజకీయ మలుపు తీసుకుని, సంచలనం సృష్టిస్తోంది. మొదట ఒక దంపతుల ఫిర్యాదుతో వెలుగులోకి వచ్చిన ఈ వ్యవహారం, ఇప్పుడు ఏకంగా వైసీపీకి చెందిన ఒక నేత కుటుంబాన్ని చుట్టుముట్టడంతో రాజకీయ రంగు పులుముకుంది.

ఈ కేసులో కీలక నిందితులలో ఒకరైన డాక్టర్ వాసుపల్లి రవికుమార్, వైఎస్సార్‌సీపీ నేత వాసుపల్లి గణేష్ సోదరుడు కావడం ఇక్కడ ప్రధానాంశం.
వాసుపల్లి గణేష్ గతంలో విశాఖపట్నం దక్షిణ నియోజకవర్గం నుంచి తెలుగుదేశం పార్టీ తరపున ఎమ్మెల్యేగా గెలిచి, ఆ తర్వాత వైసీపీకి మద్దతు ప్రకటించారు. అయితే, 2024 ఎన్నికలలో ఆయన ఓడిపోయారు. ప్రస్తుతం ఆయన సోదరుడు డాక్టర్ రవికుమార్ పేరు ఈ కేసులో ప్రముఖంగా వినిపించడంతో, ఈ వ్యవహారం రాజకీయంగా చర్చనీయాంశమైంది.

కింగ్ జార్జ్ హాస్పిటల్ (కేజీహెచ్)లో డిప్యూటీ సూపరింటెండెంట్‌గా పనిచేస్తున్న రవికుమార్, వైసీపీ హయాంలోనే బదిలీ అయ్యి, తిరిగి అదే ఆసుపత్రిలో డిప్యుటేషన్‌పై పనిచేయడం అనేక అనుమానాలకు తావిస్తోంది. డాక్టర్ నమ్రతతో ఆయనకు ఉన్న సన్నిహిత సంబంధాలు, భారీగా జరిగిన ఆర్థిక లావాదేవీల వల్ల కేసులో రాజకీయ జోక్యం ఉందనే ఆరోపణలు బలంగా వినిపిస్తున్నాయి.

2024-25 మధ్యకాలంలో జరిగిన ఈ కుంభకోణానికి కేంద్ర బిందువు సృష్టి ఫెర్టిలిటీ సెంటర్‌(Srushti Fertility Case)ను నడిపిన డాక్టర్ నమ్రత. ఐవీఎఫ్‌/సరోగసి కోసం రూ.35 లక్షలు చెల్లించిన ఒక దంపతులు, వారికి జన్మించిన బిడ్డ డీఎన్‌ఏ తమకు సరిపోలేదని తేలడంతో పోలీసులకు ఫిర్యాదు చేశారు. ఈ ఫిర్యాదు ఆధారంగా జరిగిన దర్యాప్తులో షాకింగ్ విషయాలు వెలుగులోకి వచ్చాయి.

పోలీసుల ప్రకారం, ఈ గ్యాంగ్ పేద, నిరుపేద గర్భిణీ స్త్రీలను, ముఖ్యంగా అరకు, పాడేరు, ఒడిశా వంటి ఏజెన్సీ ప్రాంతాల నుంచి తీసుకువచ్చి, వారి ద్వారా జన్మించిన శిశువులను అక్రమంగా విక్రయించింది. ఈ అక్రమ కార్యకలాపాల్లో డాక్టర్ నమ్రత, ఆమెతో పాటు పనిచేసిన మరో వైద్యురాలు, మరియు ఏకంగా అధికార పార్టీ నేత సోదరుడు డాక్టర్ రవికుమార్ కూడా ప్రధాన పాత్ర పోషించారని పోలీసులు ఆధారాలు సేకరించారు.

ఇప్పటికే ముగ్గురు వైద్యులతో సహా 25 మందిని ఈ కేసులో అరెస్ట్ చేశారు. సృష్టి ఫెర్టిలిటీ సెంటర్‌(Srushti Fertility Case)కు గతంలోనే రిజిస్ట్రేషన్ రద్దు అయినా కూడా అవినీతితో ఈ కార్యకలాపాలు కొనసాగించారని పోలీసులు తెలిపారు. ఈ కేసులో 80 శాతం శిశువులను ఏజెన్సీ ప్రాంతాల నుంచి తీసుకువచ్చినట్లు ధృవీకరించారు. అయితే, డాక్టర్ రవికుమార్ వంటి రాజకీయ నేపథ్యం ఉన్న వ్యక్తి ఇందులో నిందితుడిగా ఉండటంతో దర్యాప్తుపై రాజకీయ ఒత్తిళ్లు ఉన్నాయా అనే సందేహాలు వ్యక్తమవుతున్నాయి. ప్రజల నమ్మకాన్ని గెలుచుకోవడానికి ఇప్పుడు పోలీసులకు, సీబీఐకి ఇది ఒక పెద్ద సవాలుగా మారింది.

ఈ కేసులో సముచిత న్యాయం జరగాలని ప్రజలు ఆశిస్తున్నారు. దర్యాప్తు ఇంకా కొనసాగుతున్నా కూడా, ఇందులో మరెన్ని రాజకీయ సంబంధాలు, ప్రముఖుల పేర్లు బయటపడతాయో అని అందరూ ఉత్కంఠతో ఎదురుచూస్తున్నారు.