CBI:సీబీఐకి ఫోన్ ట్యాపింగ్ కేసు.. తెలంగాణ రాజకీయాల నుంచి న్యాయవ్యవస్థ వరకూ

Phone tapping case to CBI

తెలంగాణ రాజకీయాలను ఇప్పుడు పెను తుఫానులా కుదిపేస్తున్న అంశం ‘ఫోన్ ట్యాపింగ్‘ కేసు. గత ప్రభుత్వంపై తీవ్రమైన ఆరోపణలతో తెరపైకి వచ్చిన ఈ కేసు, ఇప్పుడు అధికార కాంగ్రెస్ ప్రభుత్వం తీసుకున్న కీలక నిర్ణయంతో మరింత ఉద్రిక్తంగా మారింది. రూ. లక్ష కోట్లు విలువ చేసే ‘కాళేశ్వరం ప్రాజెక్టు అవినీతి’ కేసు తర్వాత,ఈ ఫోన్ ట్యాపింగ్ వ్యవహారాన్ని కూడా సీబీఐకి అప్పగించాలని రేవంత్ రెడ్డి ప్రభుత్వం నిర్ణయించింది. ఈ నిర్ణయం రాష్ట్ర రాజకీయాల్లోనే కాకుండా, జాతీయ స్థాయిలో కూడా చర్చకు దారి తీస్తోంది.

ఈ ఫోన్ ట్యాపింగ్ స్కాండల్ గత బీఆర్ఎస్ ప్రభుత్వ హయాంలో, ముఖ్యంగా 2018-2023 మధ్య కాలంలో జరిగినట్లు ఆరోపణలు ఉన్నాయి. గత ప్రభుత్వంలో ఇంటెలిజెన్స్ బ్యూరో (SIB) ఆధ్వర్యంలో రాజకీయ ప్రత్యర్థులు, బీజేపీ నేతలు, జడ్జిలు, వ్యాపారవేత్తలు, మీడియా ప్రతినిధులు , సినీ ప్రముఖులతో సహా సుమారు 1,600 మంది ఫోన్లు అక్రమంగా ట్యాప్ చేయబడినట్లు సిట్ (Special Investigation Team) దర్యాప్తులో వెల్లడైంది.

ఈ ట్యాపింగ్ ‘ప్రజా భద్రత’ పేరుతో జరిగిందని చెబుతున్నా, దాని వెనుక రాజకీయ ప్రయోజనాలు ఉన్నాయని సిట్ తేల్చి చెప్పింది. మాజీ SIB చీఫ్ టి. ప్రభాకర్ రావు, మాజీ డీసీపీలు రాధాకిషన్ రావు, ప్రణీత్ రావు వంటి కీలక అధికారులు ఈ వ్యవహారంలో ప్రధాన నిందితులుగా ఉన్నారు. ముఖ్యంగా, బండి సంజయ్, రేవంత్ రెడ్డి వంటి ప్రతిపక్ష నేతల ఫోన్లు, వారి కుటుంబ సభ్యుల ఫోన్లు కూడా ట్యాప్ అయినట్లు ఆరోపణలు ఉన్నాయి.

ఈ కేసు వెలుగులోకి రావడానికి కారణం, 2024 మార్చిలో బంజారాహిల్స్ పోలీసు స్టేషన్‌లో నమోదైన ఒక కేసు. అప్పటి బీజేపీ నాయకుడు బండి సంజయ్ ఈ ఫోన్ ట్యాపింగ్ వ్యవహారాన్ని మీడియా ముందు ప్రచారం చేసి, తన ఫోన్‌తో పాటు , కుటుంబ సభ్యుల ఫోన్లు ట్యాప్ అయ్యాయని ఆరోపించారు. దీనిపై రేవంత్ రెడ్డి కూడా ఫిర్యాదు చేయడంతో సిట్ విచారణ ముమ్మరం చేసింది. విచారణలో కొంతమంది పోలీసులు విదేశీ పరికరాలను వాడారని, ఆధారాలను నాశనం చేయడానికి ప్రయత్నించారని తేలింది. ఈ వ్యవహారంలో కీలక అధికారుల ప్రమేయం ఉన్నట్లు గుర్తించారు. ఈ కేసు దర్యాప్తు కేవలం రాజకీయ నాయకులకే కాకుండా, న్యాయవ్యవస్థ, మీడియా , వ్యాపార వర్గాలపై కూడా ప్రభావం చూపింది. హైకోర్టు జడ్జిల ఫోన్లు ట్యాప్ చేయడం వల్ల న్యాయవ్యవస్థపై ప్రజల నమ్మకం దెబ్బతింటుందని విశ్లేషణలు వెలువడ్డాయి.

కాంగ్రెస్ ప్రభుత్వం అధికారంలోకి వచ్చిన తర్వాత, ఈ కేసులో ‘నిజమైన, పారదర్శక విచారణ’ కోసం సీబీఐకి అప్పగించాలని నిర్ణయించింది. ఇది రాజకీయంగా అనేక ఆరోపణలకు, ప్రతి ఆరోపణలకు దారితీస్తోంది. బీజేపీ నాయకులు సిట్ దర్యాప్తు సరిగ్గా జరగడం లేదని, సీబీఐ విచారణ అవసరమని డిమాండ్ చేస్తున్నారు. మరోవైపు, ఈ కేసులో బీఆర్ఎస్ నాయకుల ప్రమేయం ఉండవచ్చునని భావిస్తున్నారు. ఈ పరిణామాలు తెలంగాణ రాజకీయాలను కొత్త మలుపు తిప్పాయి. ప్రజల వ్యక్తిగత స్వేచ్ఛ ,భద్రతపై ఈ వ్యవహారం చూపిన ప్రభావం, ప్రజాస్వామ్య వ్యవస్థలో పాలకుల జవాబుదారీతనంపై తీవ్ర ప్రశ్నలను లేవనెత్తింది.

                   Special Buses :పండుగకు ఊరెళ్లేవారికి గుడ్‌న్యూస్.. 7,754 ప్రత్యేక బస్సులు రెడీ