Dussehra :ఇంద్రకీలాద్రిపై దసరా శోభ..11 రోజుల పాటు దుర్గమ్మకు ఏ రోజు ఏ అలంకారం?

Dussehra

దేశమంతా దసరా (Dussehra)నవరాత్రి ఉత్సవాలకు ముస్తాబవుతోంది. ఆధ్యాత్మిక వాతావరణం, భక్తి పారవశ్యంతో ప్రతి ఆలయం కళకళలాడుతోంది. ఈ ఏడాది ఈ పండుగకు ఒక అరుదైన విశేషం తోడైంది. సాధారణంగా తొమ్మిది రోజులు జరిగే నవరాత్రులు, ఈసారి 10 రోజులు జరగనున్నాయి. అంటే విజయదశమితో కలిపి మొత్తం 11 రోజుల పాటు అమ్మవారిని ఆరాధించే అద్భుత అవకాశం భక్తులకు లభించింది.

ఆంధ్రప్రదేశ్‌లోని విజయవాడ ఇంద్రకీలాద్రిపై ఉన్న శ్రీ కనకదుర్గమ్మ ఆలయం, ఈ మహోత్సవాలకు వైభవంగా ముస్తాబైంది. సెప్టెంబర్ 22 నుంచి అక్టోబర్ 2వ తేదీ వరకు ఈ ఉత్సవాలు ఘనంగా జరగనున్నాయి. ఈ 11 రోజుల పండుగలో, కనకదుర్గమ్మ ప్రతిరోజు ఒక ప్రత్యేక అలంకరణలో భక్తులకు దర్శనమివ్వనున్నారు. ఆలయ ఈవో శినా నాయక్ విడుదల చేసిన షెడ్యూల్ ప్రకారం, తొలి రోజు బాలాత్రిపుర సుందరి దేవిగా దర్శనమిచ్చి, చివరి రోజు రాజరాజేశ్వరి దేవిగా భక్తులను ఆశీర్వదించనున్నారు.

• సెప్టెంబర్ 22వ తేదీ (మొదటి రోజు): బాలాత్రిపుర సుందరి దేవి
• సెప్టెంబర్ 23వ తేదీ (రెండవ రోజు): గాయత్రీ దేవి
• సెప్టెంబర్ 24వ తేదీ (మూడవ రోజు): అన్నపూర్ణా దేవి
• సెప్టెంబర్ 25వ తేదీ (నాలుగవ రోజు): కాత్యాయని దేవి
• సెప్టెంబర్ 26వ తేదీ (ఐదవ రోజు): మహాలక్ష్మి దేవి
• సెప్టెంబర్ 27వ తేదీ (ఆరవ రోజు): లలితా త్రిపుర సుందరి దేవి
• సెప్టెంబర్ 28వ తేదీ (ఏడవ రోజు): మహాచండి దేవి
• సెప్టెంబర్ 29వ తేదీ (ఎనిమిదో రోజు): సరస్వతి దేవి (మూలానక్షత్రం)
• సెప్టెంబర్ 30వ తేదీ (తొమ్మిదో రోజు): దుర్గా దేవి
• అక్టోబర్ 1వ తేదీ (పదవ రోజు): మహిషాసురమర్దిని దేవి
• అక్టోబర్ 2వ తేదీ (విజయదశమి): రాజరాజేశ్వరి దేవి

ఈ ఉత్సవాలలో సెప్టెంబర్ 29న మూల నక్షత్రం రోజున అమ్మవారికి పట్టువస్త్రాల సమర్పణ ఒక ముఖ్య ఘట్టం. ఈ రోజు ముఖ్యమంత్రి చంద్రబాబు నాయుడు దంపతులు అమ్మవారికి పట్టువస్త్రాలు సమర్పిస్తారు. ఉత్సవాలు అక్టోబర్ 2న ఉదయం 9:30 గంటలకు పూర్ణాహుతితో ముగుస్తాయి. అదే రోజు సాయంత్రం, కృష్ణానదిలో అమ్మవారి హంసవాహన తెప్పోత్సవం జరుగుతుంది.

భక్తుల రద్దీని దృష్టిలో పెట్టుకుని, ఆలయ అధికారులు పటిష్టమైన ఏర్పాట్లు చేశారు. తెలుగు రాష్ట్రాల నుంచే కాకుండా, దేశవ్యాప్తంగా వివిధ ప్రాంతాల నుంచి వచ్చే భక్తులకు ఎలాంటి అసౌకర్యం కలగకుండా అన్ని జాగ్రత్తలు తీసుకున్నారు. ఈ ఉత్సవాలు కేవలం భక్తిని చాటుకోవడానికే కాకుండా, మన సంస్కృతి, సంప్రదాయాలకు నిలువెత్తు నిదర్శనంగా నిలవనున్నాయి. ఈ 11 రోజుల పండుగ భక్తులందరి జీవితాల్లో ఆనందం, ఐశ్వర్యం నింపాలని ఆశిద్దాం.

H-1B visa:హెచ్-1బీ వీసా ఫీజుపై క్లారిటీ..లక్ష డాలర్ల ఫీజు వారికి మాత్రమే