Golden Boot : రేసులో మెస్సీ, ఎంబాపె..గోల్డెన్ బూట్ దక్కేదెవరికి ?

Golden Boot

ఫిఫా వరల్డ్ కప్ 2026లో ప్రతిష్టాత్మక గోల్డెన్ బూట్(Golden Boot) అవార్డు కోసం పోటీ మామూలుగా లేదు. టోర్నీలో ఇక మూడో స్థానం కోసం జరిగే మ్యాచ్, ఫైనల్ మాత్రమే మిగిలి ఉండగా గోల్డెన్ బూట్ రేసులో అర్జెంటీనా ఫుట్‌బాల్ దిగ్గజం లియోనెల్ మెస్సీ, ఫ్రాన్స్ స్టార్ ప్లేయర్ ఎంబాపె నిలిచారు.

ప్రస్తుతం వీరిద్దరూ 8 గోల్స్‌తో సమానంగా ఉండగా ఎవరిని అవార్డు వరిస్తుందనేది ఆసక్తికరంగా మారింది. సాకర్ ప్రపంచకప్‌లో ఈసారి కూడా మెస్సీ దుమ్మురేపుతున్నాడు. టోర్నీ ఆరంభం నుంచీ అంచనాలకు తగ్గట్టే రాణిస్తున్నాడు. ముఖ్యంగా మ్యాచ్ చివరి నిమిషాల్లో తన మ్యాజిక్ చూపిస్తూ ప్రత్యర్థి జట్లకు షాకిస్తున్నాడు.

సెమీస్‌లో ఇంగ్లాండ్‌పై అతడు చూపించిన అద్భుతమైన ప్రతిభ అందరినీ ఆకట్టుకుంది. రెండు అద్భుతమైన పాస్‌లు అందించి జట్టు విజయంలో కీలక పాత్ర పోషించాడు. ఈ అద్భుత ప్రదర్శనతోనే ప్రతిష్టాత్మక గోల్డెన్ బూట్ అవార్డు రేసులో మెస్సీ అందరికంటే ముందుకు దూసుకొచ్చాడు. ఇప్పటివరకు మెస్సీ ఖాతాలో మొత్తం ఎనిమిది గోల్స్, నాలుగు అసిస్ట్‌లు ఉన్నాయి.

మరోవైపు ఫ్రాన్స్ సూపర్ స్టార్ ఎంబాపె కూడా గట్టి పోటీనిస్తున్నాడు. అతను కూడా 8 గోల్స్ చేసినా అసిస్ట్‌ల విషయంలో వెనుకబడ్డాడు. అయితే గోల్డెన్ బూట్ ఎవరికి దక్కుతుందనేది ఆదివారమే తేలుతుంది. ఎందుకంటే సెమీస్‌లో ఓడినా కూడా మూడో స్థానం కోసం ఫ్రాన్స్, ఇంగ్లాండ్ తలపడబోతున్నాయి. ఈ మ్యాచ్‌లో ఎంబాపె ఎన్ని గోల్స్ చేస్తాడనేది చూడాలి.

ఈ మ్యాచ్‌లో ఎంబాపె తన అసిస్ట్‌ల సంఖ్యను పెంచుకునే అవకాశం ఉన్నా కూడా, ప్రస్తుతం మెస్సీనే రేసులో ముందున్నాడు. ఒకవేళ ఎంబాపె గోల్స్ చేయకపోతే అప్పుడు గోల్డెన్ బూట్ రేసులో ఏకైక ప్లేయర్ మెస్సీనే అవుతాడు. ఒకవేళ ఫైనల్లో మెస్సీ గోల్ చేయకున్నా అతన్నే అవార్డు వరిస్తుంది. ఎందుకంటే గోల్స్ సంఖ్య సమానంగా ఉన్నా.. అసిస్ట్‌ల లెక్కలో మెస్సీ పైచేయి సాధించాడు.

మెస్సీ నాలుగు అసిస్ట్‌లు చేయగా, ఎంబాపె ఖాతాలో రెండు అసిస్ట్‌లు మాత్రమే ఉన్నాయి. నిబంధనల ప్రకారం గోల్స్ సంఖ్య సమానంగా ఉన్నప్పుడు, అసిస్ట్‌ల ఆధారంగా విజేతను నిర్ణయిస్తారు. కాబట్టి ప్రస్తుతం మెస్సీనే ఆధిక్యంలో ఉన్నాడు. ఆదివారం జరిగే ఫైనల్లో స్పెయిన్‌తో అర్జెంటీనా తలపడనుంది. ఈ మ్యాచ్‌లో గెలిస్తే అర్జెంటీనా వరుసగా రెండోసారి ప్రపంచ ఛాంపియన్‌గా నిలవడమే కాకుండా.. మెస్సీ తన కెరీర్‌లో తొలిసారిగా ప్రపంచకప్ గోల్డెన్ బూట్‌(Golden Boot)ను గెలుచుకునే అవకాశం ఉంది.

FIFA World Cup : విజేతలకు ప్రత్యేక ఉంగరాలు..వరల్డ్ కప్ చరిత్రలో తొలిసారి