Terrorism: చదువుకున్నోళ్లకే గాలం !  ఉగ్రవాద సంస్థల కొత్త పంథా

Terrorism

నిన్నటి వరకు ఉగ్ర కార్యకలాపాలకు పేద, మధ్య తరగతి యువతకు డబ్బు ఆశ చూపి.. వారి బ్రెయిన్ వాష్ చేయటమే పనిగా ఉండేది. కానీ ఇప్పుడు బాగా చదువుకున్నవారికి గాలమేసి లాగే కొత్త పద్ధతికి ఉగ్రవాద సంస్థలు తెరతీసాయి. నిఘా వర్గాలకు చిక్కకుండా దాడులు చేసేందుకు టెర్రర్‌ నెట్‌వర్క్ కొత్త వ్యూహాలను అమలు చేస్తోంది. పెరిగిన టెక్నాలజీతో దేశంలో యాంటీ టెర్రర్ నెట్‌వర్క్ పటిష్టంగా మారింది. ఉగ్ర కుటలను ముందే గుర్తిస్తున్న భద్రతా సంస్థలు వారి ప్లాన్స్ ను భగ్నం చేస్తున్నాయి .

కానీ ఇప్పుడు ఢిల్లీ పేలుడు కంటే దాని వెనుక ప్లానింగ్,బాధ్యులైన వ్యక్తులపై దర్యాప్తు ముందుకు సాగేకొద్దీ.. ఒళ్లు జలదరించే నిజాలు వెలుగుచూస్తున్నాయి. మొన్నటి వరకు టెర్రర్ యాక్టివిటీస్ వైపు కొన్ని వర్గాలకు చెందిన పేద, మధ్య తరగతి యువతే పెద్దగా ఆకర్షితులు అయ్యేవారు. వారి ఆర్ధిక పరిస్థితులను ఆసరాగా చేసుకుని.. డబ్బును వలగా విసిరి టెర్రరిజం వైపు బ్రెయిన్ వాష్ చేసి.. పేలుళ్లకు, దాడులకు పాల్పడేలా ఉపయోగించుకునేవారు. స్లీపర్స్‌ సెల్స్‌ను తయారు చేసేవారు.

ఐతే ఇటీవల కాలంలో అలాంటి అనుమానితులపై నిఘా పెరిగింది. సోషల్ మీడియాలో అనుమానంగా కనిపించే ఖాతాలను, విదేశీ వ్యక్తులతో సంప్రదింపులు జరిగే పోస్టులపై నిఘా పెట్టి.. కుట్రలను చేధిస్తున్నారు. ఇలా ఓ వైపు ఉగ్రవాదుల కార్మాగారంగా ఉన్న పాకిస్తాన్‌, ఇతర పక్క దేశాల నుంచి చొరబడే టెర్రరిస్టులను అడ్డుకోవడంతో పాటు.. భారత్‌లోని ఉగ్ర నీడలను గుర్తించి.. ఆడ్డుకుంటున్నాయి.

దీంతో ఉగ్ర సంస్థలు కొత్త దారులు వెతుక్కుంటున్నాయి. ఎవరికీ అనుమానం రాకుండా ఉన్నత విద్యావంతులను తమ లక్ష్యాలకు టార్గెట్‌గా ఎంచుకుంటున్నాయి. వారిలో విష బీజాలు నాటి.. దాడులకు ప్రోత్సహిస్తున్నాయి.

అత్యంత ప్రమాదకరంగా దేశంలో కొత్త రూపంలో వేళ్లూనుకుంటున్న వైట్‌ కాలర్‌ ఉగ్రవాదాని(Terrorism)కి కేంద్ర నిఘా, దర్యాప్తు సంస్థలతో కలిసి జమ్మూకశ్మీర్‌, హరియాణా, ఉత్తరప్రదేశ్‌ పోలీసులు చెక్‌ పెట్టారు. దేశ చరిత్రలోనే అత్యంత భారీ మొత్తంలో పేలుడు పదార్థాలను స్వాధీనం చేసుకున్నారు. 15 రోజుల పాటు అత్యంత పకడ్బందీగా నిర్వహించిన ఆపరేషన్‌లో జైషే మహ్మద్‌, అన్సార్‌ ఘజవత్‌ ఉల్‌ హింద్‌ సంస్థలకు చెందిన 8 మంది స్లీపర్ సెల్స్ ను అరెస్టు చేశారు.

వీరిలో ముగ్గురు వైద్యులు ఉండటం, వారిలో ఒక మహిళ కూడా ఉండటం కలకలం రేపుతోంది. ఇటీవల హైదరాబాద్‌లో అరెస్టు చేసిన డాక్టర్‌తో కలుపుకుంటే ఈ ఉగ్రనెట్‌వర్క్‌లో అరెస్టు అయిన వైద్యుల సంఖ్య నాలుగుకు పెరిగింది. అరెస్టయిన వారిలో ఏడుగురు జమ్మూకశ్మీర్‌కు చెందినవారే ఉన్నారు. పేదరికం, నిరుద్యోగం వంటి కారణాలతో యువత ఉగ్రవాదం(Terrorism) వైపు మళ్లుతుందన్న అభిప్రాయం ఇప్పుడు పాతబడింది.

ఈ మధ్యకాలంలో టెర్రరిజం కొత్త రూపం సంతరించుకుంది. అదే వైట్ కాలర్ ఉగ్రవాదం(Terrorism). ఇటీవల అరెస్టయిన వారిలో వైద్యులు, ప్రొఫెసర్లు, ఉన్నత విద్యావంతులు ఉండటం ఆందోళన కలిగిస్తోంది. వైట్ కాలర్ ఉగ్రవాదం సమాజంలో భయాందోళనలను రేకెత్తిస్తోంది.

మరిన్ని నేషనల్ న్యూస్అప్ డేట్ కోసం ఇక్కడ క్లిక్ చేయండి